ನಾವೇನು ನಿಮಗೆ ಶಾಸಕರ ರೀತಿ ಕಾಣಿಸೋದಿಲ್ವಾ?: ಸಚಿವ ಈಶ್ವರಪ್ಪ ಸಮ್ಮುಖದಲ್ಲಿ ಆಯನೂರ್ ಮಂಜುನಾಥ್ ಅಸಮಾಧಾನ

ಶಿವಮೊಗ್ಗ, ಆ.9: ಗ್ರಾಮೀಣಾಭಿವೃದ್ಧಿ ಸಚಿವ  ಕೆ.ಎಸ್.ಈಶ್ವರಪ್ಪ ಎದುರು ಅವರದ್ದೇ ಪಕ್ಷದ ಎಂಎಲ್‌ಸಿ ಆಯನೂರ್ ಮಂಜುನಾಥ್ ಅಸಮಾಧಾನ ಹೊರ ಹಾಕಿರುವ ಪ್ರಸಂಗ ಸೋಮವಾರ ನಡೆಯಿತು.

ಜಿಲ್ಲಾಧಿಕಾರಿ ಕಚೇರಿ ಸಭಾಂಗಣದಲ್ಲಿ ಜಿಲ್ಲಾ ಉಸ್ತುವಾರಿ ಸಚಿವ ಕೆ.ಎಸ್. ಈಶ್ವರಪ್ಪ ನೇತೃತ್ವದಲ್ಲಿ ಹಮ್ಮಿಕೊಂಡಿದ್ದ ಮಳೆಹಾನಿ ಹಾಗು ಕೋವಿಡ್ ನಿರ್ವಹಣೆ ಕುರಿತ ಸಭೆಯಲ್ಲಿ ಈ ಘಟನೆ ನಡೆದಿದ್ದು, ಈ ವೇಳೆ ಆಯನೂರು ಸಭಾಂಗಣದ ಮುಂದೆ ಬಂದು ಆಕ್ರೋಶ ಹೊರ ಹಾಕಿದರು. ನಾವೇನು ಶಾಸಕರಲ್ಲವೇನು? ಮಷ್ಕಿರಿ ಮಾಡ್ತೀರಾ? ಎಂದು ಸಭೆಯಲ್ಲಿ ಪ್ರಶ್ನೆ ಮಾಡಿದರು. ಜಿಲ್ಲಾಧಿಕಾರಿ ಸಭೆ ಅಥವಾ ತಾಲೂಕಿನ ಆಡಳಿತದ ಸಭೆಗೆ ನಮಗೆ ಆಹ್ವಾನ ನೀಡುತ್ತಿಲ್ಲ. ಅದರ ಬಗ್ಗೆ ಮಾಹಿತಿ ಕೊಡೋದಿಲ್ಲ. ಯಾರಿಗಾದರು ಅನುದಾನ ಕೊಟ್ಟರೆ ಮಾಹಿತಿ ನೀಡೋದಿಲ್ಲ. ಪರಿಹಾರ ಧನ ನೀಡಿದ್ರೆ ನಮಗೆ ಮಾಹಿತಿ ಸಿಗೋದಿಲ್ಲ. ನಾವೇನು ನಿಮಗೆ ಶಾಸಕರ ರೀತಿ ಕಾಣಿಸೋದಿಲ್ವಾ? ಎಂದು ಪ್ರಶ್ನೆ ಮಾಡಿದರು

ಮಳೆ ಹಾನಿ ಬಗ್ಗೆ ಮಾಹಿತಿ ನೀಡುತ್ತಿಲ್ಲ. ಎಷ್ಟು ಜನರಿಗೆ ಪರಿಹಾರ ನೀಡಲಾಗಿದೆ ಎಂಬುದರ ಮಾಹಿತಿಯನ್ನೂ ನೀಡುತ್ತಿಲ್ಲ. ನಾವೇನು ಶಾಸಕರೇ ಅಲ್ಲವೆಂದು ಅಧಿಕಾರಿಗಳು ನಿರ್ಧರಿಸಿದಂತಿದೆ.ನೀವೇ ಸಭೆ ನಡೆಸಿಕೊಳ್ಳಿ ನಾವು ಹೊರ ಹೋಗುತ್ತೇವೆಂದು ಎಂಎಲ್ಸಿಗಳಾದ ಆರ್. ಪ್ರಸನ್ನ ಕುಮಾರ್, ಎಸ್. ರುದ್ರೇಗೌಡರನ್ನು ಕರೆದುಕೊಂಡು ಸಭೆಯಿಂದ ಹೊರ ನಡೆಯಲು ಮುಂದಾದಾಗ ಜಿಲ್ಲಾಧಿಕಾರಿ ಕೆ.ಬಿ. ಶಿವಕುಮಾರ್ ಹಾಗೂ ಜಿಪಂ ಸಿಇಓ ವೈಶಾಲಿಯವರು ಮನವೊಲಿಸಲು ಪ್ರಯತ್ನಿಸಿದರು.

'ನಿಮ್ಮ ಗಮನಕ್ಕೆ ಹತ್ತು ಬಾರಿ ತಂದಿದ್ದೇನೆ. ಅವಮಾನ ಅನುಭವಿಸಿದವರು ನಾವು. ಅಧಿಕಾರಿಗಳು ರಾಜಕಾರಣ ಮಾಡುತ್ತಿದ್ದಾರೆ. ಪ್ರತಿದಿನವೂ ಅವಮಾನ ಸಹಿಸಲು ಸಾಧ್ಯವೇ ಎಂದು ಆಯನೂರು ಹರಿಹಾಯ್ದರು.

'ನಿಮ್ಮ ಬಗ್ಗೆ ಗೌರವವಿದೆ. ನಮಗೆ ಅಗೌರವವಾದಾಗ ನೀವು ಸುಮ್ಮನಿದ್ದರೆ ನಾವು ಸುಮ್ಮನಿರಲ್ಲ. ನಾವು ಪ್ರತಿನಿಧಿಸುವ ಜಿಲ್ಲೆಯವರು ನಮಗೆ ಕರೆಯುತ್ತಾರೆ. ಇಲ್ಲಿ ಚಮಚಗಿರಿ ಮಾಡಿಕೊಂಡು ತಿರುಗಾಡುತ್ತಾರೆ. ನಮಗೇ ಅವಮಾನ ಮಾಡುತ್ತಾರೆ ಎಂದು ಜಿಲ್ಲಾಧಿಕಾರಿಯನ್ನು ತರಾಟೆಗೆ ತೆಗೆದುಕೊಂಡು, ಸಭೆಗೆ ತೊಂದರೆ ಕೊಡುವ ಉದ್ದೇಶವಿಲ್ಲ. ನಮ್ಮ ಪ್ರತಿಭಟನೆ ದಾಖಲಿಸಿದ್ದೇವೆ' ಎಂದು ಹೇಳಿದರು.

ಈಶ್ವರಪ್ಪ ಮಧ್ಯ ಪ್ರವೇಶಿಸಿ, ನಿಮಗೆ ಅವಮಾನವಾಗಿದೆ ಎಂದರೆ ಎಲ್ಲಾ ಚುನಾಯಿತ ಪ್ರತಿನಿಧಿಗಳಿಗೆ ಆದಂತೆ. ಈ ಸಂಬಂಧ ಸಂಬಂಧಿತ ಅಧಿಕಾರಿಗಳಿಗೆ ನೋಟೀಸ್ ನೀಡುವಂತೆ ಸೂಚಿಸಿದ ಬಳಿಕ ಸಭೆ ಮುಂದುವರಿಸಲಾಯಿತ.

ನಂತರ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಆಯನೂರು ಮಂಜುನಾಥ್ ಈ ಬಗ್ಗೆ ಮಾತನಾಡಿ, 'ಸರ್ಕಾರ ನಮ್ಮದಾದರೂ ಅಧಿಕಾರಿಗಳು ನಮ್ಮವರಲ್ಲ, ಜನಪ್ರತಿನಿಧಿಗಳ ಮಾತು ಎಂದರೆ ಅವರಿಗೆ ಅಸಡ್ಡೆಯಾಗಿದೆ. ಗೌರವವನ್ನು ಕೊಡುವುದಿಲ್ಲ. ಹಾಗಾಗಿಯೇ ಜಿಲ್ಲಾಧಿಕಾರಿ ಕಚೇರಿ ಸಭಾಂಗಣದಲ್ಲಿ ನಡೆದ ಸಭೆಯಿಂದ ಹೊರ ಬರಬೇಕಾಯಿತು. ಈ ಪ್ರತಿಭಟನೆ ಸಚಿವ ಈಶ್ವರಪ್ಪನವರ ವಿರುದ್ಧವಲ್ಲ. ಸಹಜ ನ್ಯಾಯಕ್ಕಾಗಿ ಹೇಳಿದ್ದೇವೆ' ಎಂದರು.

ಸಚಿವ ಸ್ಥಾನ ಸಿಗದೇ ಇರುವುದರ ಬಗ್ಗೆ ಪ್ರತಿಕ್ರಿಯೆ ನೀಡಿದ ಅವರು, ಕೆಲವರಿಗೆ ಯೋಗ್ಯತೆ ಇರುತ್ತದೆ. ಆದರೆ, ಯೋಗ ಇರುವುದಿಲ್ಲ. ನನಗೂ ಹಾಗೆಯೇ ಆಗಿದೆ. ಅದರ ಬಗ್ಗೆ ಅಸಮಾಧಾನ ಹೊಂದುವುದಿಲ್ಲ ಎಂದರು.