ರಾಹುಲ್ ಗಾಂಧಿ ಬಳಿಕ ಸುರ್ಜೇವಾಲ ಸೇರಿದಂತೆ ಐವರು ಕಾಂಗ್ರೆಸ್ ನಾಯಕರ ಟ್ವಿಟ್ಟರ್ ಖಾತೆಗಳು ಲಾಕ್

ಹೊಸದಿಲ್ಲಿ : ಅತ್ಯಾಚಾರಕ್ಕೊಳಗಾಗಿ ನಂತರ ಕೊಲೆಗೀಡಾದ ನಂಗಲ್ ದಲಿತ ಬಾಲಕಿಯ ಹೆತ್ತವರನ್ನು ಭೇಟಿಯಾದ ಫೋಟೋ ಟ್ವೀಟ್ ಮಾಡಿದ್ದಕ್ಕಾಗಿ ಸಂಸದ ಹಾಗೂ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಅವರ ಟ್ವಿಟ್ಟರ್ ಖಾತೆಯನ್ನು ಲಾಕ್ ಮಾಡಿದ ಬೆನ್ನಲ್ಲೇ ಮೂವರು ಹಿರಿಯ ಪಕ್ಷ ನಾಯಕರುಗಳಾದ ರಣದೀಪ್ ಸಿಂಗ್ ಸುರ್ಜೇವಾಲ, ಅಜಯ್ ಮಾಕೆನ್ ಹಾಗೂ ಸುಷ್ಮಿತಾ ದೇವ್ ಅವರ ಟ್ವಿಟ್ಟರ್ ಖಾತೆಗಳನ್ನೂ ಲಾಕ್ ಮಾಡಲಾಗಿರುವ ಬಗ್ಗೆ ಪಕ್ಷ ಆಕ್ರೋಶ ಹೊರಹಾಕಿದೆ. ಇಲ್ಲಿಯ ತನಕ ರಾಹುಲ್ ಹೊರತಾಗಿ ಒಟ್ಟು ಐದು ನಾಯಕರ ಟ್ವಿಟ್ಟರ್ ಖಾತೆಗಳು ಲಾಕ್ ಆಗಿವೆ.

ಸುರ್ಜೇವಾಲ ಅವರು ಪಕ್ಷದ ಸಂವಹನ ವಿಭಾಗದ ಮುಖ್ಯಸ್ಥರಾಗಿದ್ದರೆ, ಮಾಜಿ ಕೇಂದ್ರ ಸಚಿವ ಅಜಯ್ ಮಾಕೆನ್ ಅವರು ರಾಜಸ್ಥಾನ ವ್ಯವಹಾರಗಳ ಎಐಸಿಸಿ ಉಸ್ತುವಾರಿ ಪ್ರಧಾನ ಕಾರ್ಯದರ್ಶಿಯಾಗಿದ್ದಾರೆ. ಸುಷ್ಮಿತಾ ದೇವ್ ಅವರು ಕಾಂಗ್ರೆಸ್ ಮಹಿಳಾ ಘಟಕದ ಅಧ್ಯಕ್ಷೆಯಾಗಿದ್ದಾರೆ.

ಎಐಸಿಸಿ ಸಂವಹನ ವಿಭಾಗದ ಉಸ್ತುವಾರಿ ಪ್ರಣವ್ ಝಾ ಈ ಕುರಿತು ಟ್ವೀಟ್ ಮಾಡಿದ್ದಾರೆ, ಹಾಗೂ  ಕಾಂಗ್ರೆಸ್ ಈ ಕ್ರಮವನ್ನು ಖಂಡಿಸುತ್ತದೆ ಹಾಗೂ ತಪ್ಪಾಗಿ ಲಾಕ್ ಮಾಡಲ್ಪಟ್ಟ ಎಲ್ಲರಿಗಾಗಿ ಹೋರಾಟ ಮುಂದುವರಿಸಲಿದೆ ಎಂದು ಬರೆದು ಪ್ರಧಾನಿ, ಟ್ವಿಟ್ಟರ್ ಸಿಇಒ ಹಾಗೂ ಐಟಿ ಸಚಿವ ಅಶ್ವಿನಿ ವೈಷ್ಣವ್ ಅವರನ್ನು ಟ್ಯಾಗ್ ಮಾಡಿದ್ದಾರೆ.

ಮಾಜಿ ಕೇಂದ್ರ ಸಚಿವ ಹಾಗೂ ಅಸ್ಸಾಂ ಉಸ್ತುವಾರಿ ಜಿತೇಂದ್ರ ಸಿಂಗ್ ಆಲ್ವಾರ್ ಹಾಗೂ ಲೋಕಸಭೆಯಲ್ಲಿ ಪಕ್ಷದ ಸಚೇತಕ ಮಣಿಕ್ಕಮ್ ಠಾಗೋರ್ ಅವರ ಖಾತೆಗಳೂ ಲಾಕ್ ಆಗಿವೆ ಎಂದು ಕಾಂಗ್ರೆಸ್ ಹೇಳಿದೆ.