ಎಐಸಿಟಿಇ-ಲೈಟ್ ಕಾರ್ಯಕ್ರಮಕ್ಕೆ ಸಂತ ಜೋಸೆಫ್ ಇಂಜಿನಿಯರಿಂಗ್ ಕಾಲೇಜು ಆಯ್ಕೆ
ಮಂಗಳೂರು, ಆ.19: ನಗರ ಹೊರವಲಯದ ವಾಮಂಜೂರಿನ ಸಂತ ಜೋಸೆಫ್ ಇಂಜಿನಿಯರಿಂಗ್ ಕಾಲೇಜು (ಎಸ್ಜೆಇಸಿ), ಭಾರತ ಸರಕಾರದ ಶಿಕ್ಷಣ ಸಚಿವಾಲಯದ ಸಹಭಾಗಿತ್ವದ ರಾಷ್ಟ್ರೀಯ ಶಿಕ್ಷಣ ಅಲಯನ್ಸ್ ಫಾರ್ ಟೆಕ್ನಾಲಜಿ (ನೀಟ್) ಉಪಕ್ರಮದಡಿ ಬರುವ ಎಐಸಿಟಿಇಯ ಲೀಡರ್ ಶಿಪ್ ಇನ್ ಟೀಚಿಂಗ್ ಎಕ್ಸೆಲೆನ್ಸ್ (ಲೈಟ್) ಕಾರ್ಯಕ್ರಮಕ್ಕೆ ಆಯ್ಕೆಯಾಗಿದೆ.
ಒಟ್ಟು 136 ಅರ್ಹ ಸಂಸ್ಥೆಗಳಲ್ಲಿ ಸಂತ ಜೋಸೆಫ್ ಇಂಜಿನಿಯರಿಂಗ್ ಕಾಲೇಜು ಕೂಡ ಒಂದಾಗಿದೆ.ಈ ಕಾರ್ಯಕ್ರಮವನ್ನು ಕಾರ್ಯಗತಗೊಳಿಸಲು ಕಾಲೇಜು ಎಐಸಿಟಿಇಯ ಉದ್ಯಮ ಪಾಲುದಾರರಲ್ಲಿ ಒಂದಾದ ಕೇರಳದ ಪ್ಯೂಪಿಲ್ಫಸ್ಟ್ ಪ್ರೈವೇಟ್ ಲಿ.ನೊಂದಿಗೆ ಒಪ್ಪಂದವನ್ನು ಮಾಡಿಕೊಂಡಿದೆ.
ಈ ಒಪ್ಪಂದವು ಆನ್ಲೈನ್ ಬೋಧನೆ-ಕಲಿಕೆಯ ವಿಧಾನಗಳ ಮೂಲಕ ಆಧುನಿಕ ಸಾಫ್ಟ್ವೇರ್ ಇಂಜಿನಿಯರಿಂಗ್ನಲ್ಲಿ ವಿದ್ಯಾರ್ಥಿಗಳ ಜ್ಞಾನವನ್ನು ಬಲಪಡಿಸುವತ್ತ ಗಮನ ಹರಿಸುತ್ತದೆ. ಈ ಮೂಲಕ ಕಾಲೇಜಿನ ವಿದ್ಯಾರ್ಥಿಗಳಿಗೆ 20 ಕ್ರೆಡಿಟ್ಗಳನ್ನು ಹೊಂದಿರುವ ಅಡ್ವಾನ್ಸ್ಡ್ ವೆಬ್ ಡೆವಲಪ್ಮೆಂಟ್ನಲ್ಲಿ ಪದವಿಯನ್ನು ಪರಿಚಯಿಸಲಾಗುವುದು.
ಇದನ್ನು ಮೂರು ಕೋರ್ಸ್ಗಳಾಗಿ ಹಾಗೂ ಫುಲ್-ಸ್ಟಾಕ್ ವೆಬ್ ಆಪ್ ಡೆವಲಪ್ಮೆಂಟ್ನ ಮೇಲೆ ಮೈನರ್ ಪ್ರಾಜೆಕ್ಟ್ ಅಥವಾ ಇಂಡಸ್ಟ್ರಿ ಇಂಟರ್ನ್ಶಿಪ್ ಎಂದು ವಿಂಗಡಿಸಲಾಗಿದೆ. ಈ ಕಾರ್ಯಕ್ರಮವನ್ನು ರೂಪಿಸುವ ಪ್ರಕ್ರಿಯೆಯಲ್ಲಿ ಕಾಲೇಜಿನ ಬೋಧಕವರ್ಗಕ್ಕೆ ಉದ್ಯಮದ ತರಬೇತುದಾರರಿಂದ ತಾಂತ್ರಿಕ ಪರಿಕರಗಳು, ಪಠ್ಯಕ್ರಮ ಮತ್ತು ನಿರಂತರ ಮೌಲ್ಯಮಾಪನ ವಿಧಾನಗಳಲ್ಲಿ ವೃತ್ತಿಪರ ತರಬೇತಿ ನೀಡಲಾಗುತ್ತದೆ. ಅದು ಕಲಿಕಾ-ಕೇಂದ್ರಿತ ಶಿಕ್ಷಣದ ಮೂಲಕ ಕಾರ್ಯಕ್ರಮವನ್ನು ಅನುಷ್ಠಾನಗೊಳಿಸಲು ಅಗತ್ಯವಾದ ಕೌಶಲ್ಯ ಮತ್ತು ಜ್ಞಾನವನ್ನು ನೀಡಲಿದೆ ಎಂದು ಪ್ರಕಟನೆ ತಿಳಿಸಿದೆ.
