ಅವಧಿ ಮೀರಿದ ಪಾಲಿಸಿಗಳ ಪುನರುಜ್ಜೀವನಕ್ಕೆ ವಿಮೆದಾರರಿಗೆ ಅವಕಾಶ ಒದಗಿಸಿದ ಎಲ್ ಐ ಸಿ

ಹೊಸದಿಲ್ಲಿ: ಅವಧಿ ಮೀರಿದ ಪಾಲಿಸಿಗಳ ಪುನರುಜ್ಜೀವನದಂತಹ ಅಪೂರ್ವ ಅವಕಾಶವೊಂದನ್ನು ವಿಮೆದಾರರಿಗೆ ಒದಗಿಸಲು ಎಲ್ ಐಸಿ ಮುಂದಾಗಿದೆ. ಅವಧಿ ಮೀರಿದ ವೈಯಕ್ತಿಕ ಪಾಲಿಸಿಗಳ ವಿಶೇಷ ಪುನರುಜ್ಜೀವನ ಅಭಿಯಾನ 2021ರ ಆಗಸ್ಟ್ 23ರಿಂದ 2021ರ ಅಕ್ಟೋಬರ್ 22ರ ತನಕ ನಡೆಯಲಿದೆ. 

ಸದ್ಯದ ಪರಿಸ್ಥಿತಿಯನ್ನು ದೃಷ್ಟಿಯಲ್ಲಿಟ್ಟುಕೊಂಡು ಒಟ್ಟು ಪ್ರೀಮಿಯಮ್ ಪಾವತಿಯನ್ನು ಆಧರಿಸಿ ಟರ್ಮ್ ಅಶ್ಯೂರೆನ್ಸ್ ಹಾಗೂ ಹೈರಿಸ್ಕ್ ಪ್ಲಾನ್ ಗಳನ್ನು ಹೊರತುಪಡಿಸಿದ ಪಾಲಿಸಿಗಳಿಗೆ ವಿಳಂಬ ಶುಲ್ಕದಲ್ಲಿ ರಿಯಾಯಿತಿ ಕೊಡುಗೆ ನೀಡಲಾಗುವುದು. ವೈದ್ಯಕೀಯ ಅಗತ್ಯತೆಗಳಿಗೆ ರಿಯಾಯಿತಿ ಇಲ್ಲ. ಅರ್ಹ ಆರೋಗ್ಯ ಹಾಗೂ ಮೈಕ್ರೊ ಇನ್ಸುರೆನ್ಸ್ ಪ್ಲಾನ್ ಗಳು ವಿಳಂಬ ಶುಲ್ಕದಲ್ಲಿ ರಿಯಾಯಿತಿ ಪಡೆಯಲು ಅರ್ಹವಾಗಿವೆ.

ವಿಶೇಷ ಪುನರುಜ್ಜೀವನ ಅಭಿಯಾನದ ಅಡಿ ನಿರ್ದಿಷ್ಟ ಅರ್ಹ ಯೋಜನೆಗಳ ಪಾಲಿಸಿಗಳನ್ನು ಕೆಲವು ನಿಯಮಗಳು ಹಾಗೂ  ಷರತ್ತುಗಳಿಗೆ ಒಳಪಟ್ಟು ಮೊದಲ ಪಾವತಿಸದ ಪ್ರೀಮಿಯಂ ದಿನಾಂಕದಿಂದ 5 ವರ್ಷಗಳಲ್ಲಿ ಪುನಶ್ಚೇತನಗೊಳಿಸಬಹುದು.

1 ಲಕ್ಷ ರೂ. ತನಕದ ಒಟ್ಟು ಸ್ವೀಕರಿಸಬಹುದಾದ ಪ್ರೀಮಿಯಮ್ ಗೆ ಶೇ.20ರಷ್ಟು ವಿಳಂಬ ಶುಲ್ಕದ ರಿಯಾಯಿತಿ ಇದೆ. 1 ಲಕ್ಷದ 1 ರೂ.ನಿಂದ 3 ಲಕ್ಷ ರೂ. ತನಕ ಶೇ.25 ಹಾಗೂ 3 ಲಕ್ಷ 1 ರೂ. ಹಾಗೂ ಅದಕ್ಕಿಂತ ಹೆಚ್ಚಿನ ಪ್ರೀಮಿಯಮ್ ಗೆ ಶೇ.30ರಷ್ಟು ರಿಯಾಯಿತಿ ಇರುತ್ತದೆ. 

ಅನಿವಾರ್ಯ ಪರಿಸ್ಥಿತಿಯಲ್ಲಿ ಸರಿಯಾದ ಸಮಯಕ್ಕೆ ಪ್ರೀಮಿಯಮ್ ಪಾವತಿಸದೆ ಅವಧಿಮೀರಿದ  ಪಾಲಿಸಿಗಳ ವಿಮೆದಾರರಿಗೆ ಲಾಭ ತರಲು ಈ ಅಭಿಯಾನ ಆರಂಭಿಸಲಾಗಿದೆ. ಎಲ್ ಐಸಿ ವಿಮೆದಾರರಿಗೆ  ತಮ್ಮ ಪಾಲಿಸಿಗಳ ಪುನರುಜ್ಜೀವನಕ್ಕೆ ಈ ಅಭಿಯಾನವು ಉತ್ತಮ ಅವಕಾಶವಾಗಿದೆ.