ಒಳಉಡುಪು ಧರಿಸಿ ರೈಲಿನಲ್ಲಿ ಅಡ್ಡಾಡಿದ್ದ ಪಾನಮತ್ತ ಶಾಸಕ ನನ್ನ ಚಿನ್ನದ ಉಂಗುರ ಕಸಿದಿದ್ದಾರೆ: ಸಹ ಪ್ರಯಾಣಿಕ ದೂರು
ಹೊಸದಿಲ್ಲಿ: ರೈಲು ಪ್ರಯಾಣವೊಂದರ ವೇಳೆ ಒಳಉಡುಪಿನಲ್ಲಿ ರೈಲಿನೊಳಗೆ ಅಡ್ಡಾಡುತ್ತಿದ್ದುದಕ್ಕೆ ಈಗಾಗಲೇ ಟೀಕೆಗೆ ಗುರಿಯಾಗಿರುವ ಬಿಹಾರ ಜೆಡಿಯು ಶಾಸಕ ಗೋಪಾಲ್ ಮಂಡಲ್ ಮದ್ಯದ ಅಮಲಿನಲ್ಲಿದ್ದರೆಂದು ಅವರ ಸಹಪ್ರಯಾಣಿಕರೊಬ್ಬರು ಆರೋಪಿಸಿದ್ದಾರೆ. ಅಷ್ಟೇ ಅಲ್ಲದೆ ಶಾಸಕನಿಗೆ ಆಕ್ಷೇಪ ಸೂಚಿಸಿದ್ದಕ್ಕೆ ತನ್ನ ಚಿನ್ನದ ಆಭರಣಗಳನ್ನು ಸೆಳೆದಿದ್ದಾರೆಂದು ಆರೋಪಿಸಿ ಸಹಪ್ರಯಾಣಿಕ ಪ್ರಹ್ಲಾದ್ ಪಾಸ್ವಾನ್ ಎಂಬವರು ದಿಲ್ಲಿಯ ಸರಕಾರಿ ರೈಲ್ವೆ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.
"ಮದ್ಯ ಸೇವಿಸಿದ್ದ ಶಾಸಕ ಬೋಗಿಯಲ್ಲಿ ಬಿಳಿ ಬನಿಯನ್ ಮತ್ತು ಅಂಡರ್ವೇರ್ ಧರಿಸಿ ಅಡ್ಡಾಡುತ್ತಿದ್ದರು,'' ಎಂದು ಪಾಸ್ವಾನ್ ತಮ್ಮ ದೂರಿನಲ್ಲಿ ತಿಳಿಸಿದ್ದಾರೆ.
"ನಾನು ಅವರ ವರ್ತನೆಗೆ ಆಕ್ಷೇಪಿಸಿದಾಗ ನನ್ನ ಚಿನ್ನದ ಉಂಗುರ ಮತ್ತು ಸರ ಸೆಳೆದು ನನ್ನೊಂದಿಗೆ ಅನುಚಿತವಾಗಿ ವರ್ತಿಸಿದರು,'' ಎಂದು ಪಾಸ್ವಾನ್ ಆರೋಪಿಸಿದ್ದಾರೆ.
ಘಟನೆ ಪಾಟ್ನಾ-ಹೊಸದಿಲ್ಲಿ ತೇಜಸ್ ರಾಜಧಾನಿ ಎಕ್ಸ್ ಪ್ರೆಸ್ನ ಎಸಿ ಮೊದಲನೇ ದರ್ಜೆ ಬೋಗಿಯಲ್ಲಿ ನಡೆದಿತ್ತು.
ಆದರೆ ತಾವು ಒಳಉಡುಪಿನಲ್ಲಿ ರೈಲಿನಲ್ಲಿದ್ದ ವೈರಲ್ ಫೋಟೋ ಕುರಿತು ಪ್ರತಿಕ್ರಿಯಿಸಿದ ಗೋಪಾಲಪುರ ಶಾಸಕರಾಗಿರುವ ಮಂಡಲ್, ``ಹೌದು ನಾನು ಬನಿಯನ್ ಮತ್ತು ಅಂಡರ್ವೇರ್ನಲ್ಲಿದ್ದೆ. ನನ್ನ ಹೊಟ್ಟೆ ಸರಿಯಿರಲಿಲ್ಲ ಹಾಗೂ ನಾನು ಆಗಷ್ಟೇ ರೈಲು ಹತ್ತಿದ್ದೆ. ನಾನು ಸುಳ್ಳು ಹೇಳುವುದಿಲ್ಲ,'' ಎಂದಿದ್ದಾರೆ.
"ಒಬ್ಬ ವ್ಯಕ್ತಿ ನನ್ನನ್ನು ಅಡ್ಡಗಟ್ಟಿ ಪ್ರಶ್ನಿಸಿದ್ದರು. ಆಗ ಆತನನ್ನು ಅತ್ತ ಸರಿಸಿ, ಶೌಚಾಲಯಕ್ಕೆ ಹೋಗಿ ಬಂದ ನಂತರ ಅತನ ಜತೆ ಮಾತನಾಡಿದ್ದೆ,'' ಎಂದು ಅವರು ಹೇಳಿದ್ದಾರೆ.
ತಮ್ಮ ಉಡುಪು ಮಹಿಳಾ ಪ್ರಯಾಣಿಕರಿಗೆ ಮುಜುಗರ ಸೃಷ್ಟಿಸಿದೆ ಎಂಬ ಆರೋಪಕ್ಕೆ ಪ್ರತಿಕ್ರಿಯಿಸಿದ ಅವರು ಬೋಗಿಯಲ್ಲಿ ಯಾವುದೇ ಮಹಿಳಾ ಪ್ರಯಾಣಿಕರಿರಲಿಲ್ಲ ಎಂದಿದ್ದಾರೆ.
