ನಾಲ್ಕು ವಾರಗಳ ಬಳಿಕ ಕೋವಿಶೀಲ್ಡ್ ಎರಡನೇ ಡೋಸ್ ಗೆ ಅನುಮತಿ ನೀಡಲು ಕೇಂದ್ರಕ್ಕೆ ಕೇರಳ ಹೈಕೋರ್ಟ್ ನಿರ್ದೇಶ

ಕೊಚ್ಚಿ,ಸೆ.6: ಜನರು ಕೋವಿಶೀಲ್ಡ್ ಲಸಿಕೆಯ ಮೊದಲ ಡೋಸ್ ಪಡೆದ ನಾಲ್ಕು ವಾರಗಳ ಬಳಿಕ ಎರಡನೇ ಡೋಸ್ಗಾಗಿ ಸ್ಲಾಟ್ ಬುಕ್ ಮಾಡಲು ಅವಕಾಶ ನೀಡುವಂತೆ ಕೇರಳ ಉಚ್ಚ ನ್ಯಾಯಾಲಯವು ಸೋಮವಾರ ಕೇಂದ್ರ ಸರಕಾರಕ್ಕೆ ನಿರ್ದೇಶವನ್ನು ಹೊರಡಿಸಿದೆ. ಪ್ರಸ್ತುತ ಕೋವಿಶೀಲ್ಡ್ನ ಮೊದಲ ಡೋಸ್ ನ ಕನಿಷ್ಠ 84 ದಿನಗಳ ನಂತರವೇ ಎರಡನೇ ಡೋಸ್ ನ್ನು ನೀಡಲಾಗುತ್ತಿದೆ.

ಕೋವಿಶೀಲ್ಡ್ ಲಸಿಕೆಯ ಎರಡು ಡೋಸ್ ಗಳ ನಡುವಿನ ಆರರಿಂದ ಎಂಟು ವಾರಗಳ ಅಂತರವನ್ನು ಕೇಂದ್ರ ಆರೋಗ್ಯ ಸಚಿವಾಲಯವು ಮೇ 13ರಂದು 12ರಿಂದ 12 ವಾರಗಳಿಗೆ ಹೆಚ್ಚಿಸಿತ್ತು.
ಜನರು ಕೋವಿಶೀಲ್ಡ್ ಲಸಿಕೆಯ ತಮ್ಮ ಮೊದಲ ಡೋಸ್ ಪಡೆದ ನಾಲ್ಕು ವಾರಗಳ ಬಳಿಕ ಎರಡನೇ ಡೋಸ್ ಗಾಗಿ ಸ್ಲಾಟ್ ಬುಕ್ ಮಾಡಲು ಕೋವಿನ್ ಪೋರ್ಟಲ್ ನಲ್ಲಿ ಅಗತ್ಯ ವ್ಯವಸ್ಥೆಗಳನ್ನು ಮಾಡುವಂತೆಯೂ ಸೋಮವಾರ ಉಚ್ಚ ನ್ಯಾಯಾಲಯವು ಕೇಂದ್ರಕ್ಕೆ ಸೂಚಿಸಿದೆ.

ತನ್ನ ಉದ್ಯೋಗಿಗಳಿಗೆ 84 ದಿನಗಳ ಅಂತರದ ಮೊದಲೇ ಎರಡನೇ ಡೋಸ್ ನ್ನು ನೀಡಲು ಅವಕಾಶವನ್ನು ಕೋರಿ ಕಿಟೆಕ್ಸ್ ಗಾರ್ಮೆಂಟ್ಸ್ ಸಲ್ಲಿಸಿದ್ದ ಅರ್ಜಿಯ ವಿಚಾರಣೆಯನ್ನು ನ್ಯಾಯಾಲಯವು ಕೈಗೆತ್ತಿಕೊಂಡಿತ್ತು. ಎರಡನೇ ಡೋಸ್ ಗಾಗಿ ತಾನು ಲಸಿಕೆಯನ್ನು ವ್ಯವಸ್ಥೆಗೊಳಿಸಿದ್ದೇನಾದರೂ ನಿಗದಿತ ಅವಧಿಗೆ ಮುನ್ನ ಅದನ್ನು ಬಳಸಲು ಸಾಧ್ಯವಾಗುತ್ತಿಲ್ಲ ಎಂದು ಕಂಪನಿಯು ಅರ್ಜಿಯಲ್ಲಿ ತಿಳಿಸಿತ್ತು.

ಕಿಟೆಕ್ಸ್ ನ ಅರ್ಜಿಯನ್ನು ವಿರೋಧಿಸಿದ್ದ ಕೇಂದ್ರವು ಲಸಿಕೆಯ ಪರಿಣಾಮಕಾರಿತ್ವವನ್ನು ಹೆಚ್ಚಿಸಲು ಎರಡು ಡೋಸ್ ಗಳ ನಡುವೆ 84 ದಿನಗಳ ಅಂತರವನ್ನು ನಿಗದಿಗೊಳಿಸಿದ್ದಾಗಿ ತಿಳಿಸಿತ್ತು. ತನ್ನ ನಿರ್ಧಾರವು ರಾಷ್ಟ್ರೀಯ ಪ್ರತಿರಕ್ಷಣಾ ತಾಂತ್ರಿಕ ಸಲಹಾ ಸಮಿತಿಯ ಸಲಹೆಯನ್ನು ಆಧರಿಸಿದೆ ಎಂದೂ ಅದು ಹೇಳಿತ್ತು.

84 ದಿನಗಳ ಮಧ್ಯಂತರಕ್ಕೆ ಪರಿಣಾಮಕಾರಿತ್ವ ಕಾರಣವಾಗಿದ್ದರೆ ಅದು ಮೊದಲ ಡೋಸ್ ನ ನಾಲ್ಕರಿಂದ ಆರು ವಾರಗಳಲ್ಲಿ ಎರಡನೇ ಡೋಸ್ ಪಡೆದಿದ್ದ ತನಗೆ ಚಿಂತೆಯ ವಿಷಯವಾಗಿದೆ ಎಂದು ಹೇಳಿದ ನ್ಯಾ.ಪಿ.ಬಿ.ಸುರೇಶಕುಮಾರ್ ಅವರು,ಹೆಚ್ಚಿನ ಪರಿಣಾಮಕಾರಿತ್ವ ಕುರಿತು ತನ್ನ ವಾದವನ್ನು ಸಮರ್ಥಿಸಿಕೊಳ್ಳಲು ಸರಕಾರವು ವೈಜ್ಞಾನಿಕ ದತ್ತಾಂಶಗಳನ್ನು ಒದಗಿಸಬೇಕು ಎಂದು ಹೇಳಿದರು.

 ಸರಕಾರವು ವಿದೇಶಗಳಿಗೆ ಪ್ರಯಾಣಿಸುವವರಿಗೆ ನಾಲ್ಕು ವಾರಗಳ ಅಂತರದ ಬಳಿಕ ಎರಡನೇ ಡೋಸ್ ಪಡೆದುಕೊಳ್ಳಲು ಅನುಮತಿ ನೀಡಿದೆ,ಹೀಗಿರುವಾಗ 84 ದಿನಗಳ ಅಂತರವು ತಾರತಮ್ಯದಿಂದ ಕೂಡಿದೆ ಎಂದೂ ನ್ಯಾಯಾಧೀಶರು ಬೆಟ್ಟು ಮಾಡಿದರು. ತಮ್ಮ ಉದ್ಯೋಗ,ಶಿಕ್ಷಣ ಇತ್ಯಾದಿಗಳಿಗೆ ಸಂಬಂಧಿಸಿದಂತೆ ಮುಂಚಿತವಾಗಿಯೇ ರಕ್ಷಣೆಯನ್ನು ಪಡೆಯಲು ಬಯಸುವ ಜನರಿಗೆ ಇದೇ ಸೌಲಭ್ಯವನ್ನು ಏಕೆ ಒದಗಿಸಬಾರದು ಎನ್ನುವುದಕ್ಕೆ ಯಾವದೇ ಕಾರಣಗಳೇ ಇಲ್ಲ ಎಂದು ಅವರು ಹೇಳಿದರು.
ಬೇಗ ಲಸಿಕೆಯನ್ನು ಪಡೆದುಕೊಳ್ಳುವ ಆಯ್ಕೆಯನ್ನು ಜನರಿಗೆ ನೀಡಿರುವ ಕೇಂದ್ರ ಆರೋಗ್ಯ ಸಚಿವಾಲಯದ ನೀತಿಯನ್ನೂ ತನ್ನ ಆದೇಶದಲ್ಲಿ ಉಲ್ಲೇಖಿಸಿರುವ ಉಚ್ಚ ನ್ಯಾಯಾಲಯವು, ತಮ್ಮ ಲಸಿಕೆ ಡೋಸ್ ನ್ನು ಬೇಗ ಪಡೆದುಕೊಳ್ಳಲು ಸಿದ್ಧವಿರುವ ಜನರಿಗಾಗಿ ಖಾಸಗಿ ಆಸ್ಪತ್ರೆಗಳ ಹೆಚ್ಚಿನ ಲಸಿಕೆಗಳನ್ನು ವಿತರಿಸಲಾಗುತ್ತಿದೆ ಎಂದು ಹೇಳಿತು.

 ಲಸಿಕೆ ಪಡೆಯುವುದು ಸ್ವಯಂಪ್ರೇರಿತವಾಗಿದೆ ಎಂದು ಕೇಂದ್ರ ಆರೋಗ್ಯ ಸಚಿವಾಲಯವು ತನ್ನ ವೆಬ್ ಸೈಟ್ ನಲ್ಲಿ ಹೇಳಿರುವುದನ್ನು ಬೆಟ್ಟು ಮಾಡಿದ ನ್ಯಾಯಾಲಯವು,ಹಾಗಿದ್ದರೆ ಲಸಿಕೆಯ ಎರಡು ಡೋಸ್ ಗಳನ್ನು ಪಡೆಯುವ ಅಗತ್ಯ ಮತ್ತು ಸೋಂಕಿನಿಂದ ಉತ್ತಮ ರಕ್ಷಣೆಗಾಗಿ ಎರಡು ಡೋಸ್ ಗಳ ನಡುವಿನ ಅಂತರವು ಕೇವಲ ಸಲಹೆ ಎಂದಷ್ಟೇ ಪರಿಗಣಿಸಬಹುದಾಗಿದೆ ಎಂದು ಹೇಳಿತು.