ರಶ್ಯ: ಟೆಲಿಗ್ರಾಂ ವೇದಿಕೆಯಿಂದಲೂ ನವಾಲ್ನಿ ಆ್ಯಪ್ ಗೆ ತಡೆ

ಮಾಸ್ಕೋ, ಸೆ.18: ರಶ್ಯಾದ ವಿಪಕ್ಷ ಮುಖಂಡ ಅಲೆಕ್ಸಿ ನವಾಲ್ನಿ ರೂಪಿಸಿದ ‘ಸ್ಮಾರ್ಟ್ ವೋಟಿಂಗ್’ ಸ್ವಯಂಚಾಲಿತ ಸಂದೇಶ ವ್ಯವಸ್ಥೆಯನ್ನು ತಡೆಹಿಡಿದಿರುವಾಗಿ ಟೆಲಿಗ್ರಾಂ ಸಾಮಾಜಿಕ ಮಾಧ್ಯಮ ವೇದಿಕೆ ಶನಿವಾರ ಹೇಳಿದೆ. ಈ ಮೂಲಕ ಆ್ಯಪಲ್ ಮತ್ತು ಗೂಗಲ್ ಸ್ಟೋರ್ಸ್ ವೇದಿಕೆಯ ನಿಷೇಧದ ಬಳಿಕ ಟೆಲಿಗ್ರಾಂ ಕೂಡಾ ಸ್ಮಾರ್ಟ್ ವೋಟಿಂಗ್ಗೆ ತಡೆನೀಡಿದಂತಾಗಿದೆ.

 ಚುನಾವಣಾ ಪ್ರಚಾರ ಅಭಿಯಾನಕ್ಕೆ ಸಂಬಂಧಿಸಿದ ಸ್ವಯಂಚಾಲಿತ ಸಂದೇಶ ವ್ಯವಸ್ಥೆಗಳ ಕಾರ್ಯನಿರ್ವಹಣೆಯನ್ನು ಸೀಮಿತಗೊಳಿಸುವ ತನ್ನ ನಿಯಮದ ಪ್ರಕಾರ ಈ ಕ್ರಮ ಕೈಗೊಳ್ಳಲಾಗಿದೆ. ಆ್ಯಪಲ್ ಮತ್ತು ಗೂಗಲ್ ಸ್ಟೋರ್ಸ್ ನ ಉಪಕ್ರಮವನ್ನು ತಾವು ಅನುಸರಿಸಿದ್ದೇವೆ . ಇದೊಂದು ನ್ಯಾಯಬದ್ಧ ಪ್ರಕ್ರಿಯೆಯಾಗಿದ್ದು ಟೆಲಿಗ್ರಾಂ ಬಳಕೆದಾರರು ಇದನ್ನು ಗೌರವಿಸಬೇಕೆಂದು ಆಗ್ರಹಿಸುವುದಾಗಿ ಟೆಲಿಗ್ರಾಂ ವೇದಿಕೆಯ ರಶ್ಯ ಮೂಲದ ಸಂಸ್ಥಾಪಕ ಪಾವೆಲ್ ಡ್ಯುರೋವ್ ಹೇಳಿದ್ದಾರೆ.

ಆದರೆ ಆ್ಯಪಲ್ ಮತ್ತು ಗೂಗಲ್‌ನ ಆ್ಯಪ್ ಗಳನ್ನು ತಡೆಹಿಡಿಯುವ ಮೂಲಕ , ರಶ್ಯ ಹಾಗೂ ವಿಶ್ವದಾದ್ಯಂತ ಅಭಿವ್ಯಕ್ತಿ ಸ್ವಾತಂತ್ರ್ಯದ ಮೇಲೆ ಪರಿಣಾಮ ಬೀರಬಲ್ಲ ಅಪಾಯಕಾರಿ ಪೂರ್ವನಿರ್ದೇಶನ ಹಾಕಿಕೊಟ್ಟಂತಾಗುತ್ತದೆ ಎಂದು ಅವರು ಎಚ್ಚರಿಸಿದ್ದಾರೆ.

ರಶ್ಯದಲ್ಲಿ ಸಂಸದೀಯ ಚುನಾವಣೆಗಾಗಿ 3 ದಿನಗಳ ಮತದಾನ ಶುಕ್ರವಾರ ಆರಂಭವಾಗುತ್ತಿದ್ದಂತೆಯೇ, ಬಂಧನದಲ್ಲಿರುವ ವಿಪಕ್ಷ ಮುಖಂಡ ಅಲೆಕ್ಸಿ ನವಾಲ್ನಿಯ ಮಿತ್ರರು ಚುನಾವಣೆ ಪ್ರಕ್ರಿಯೆ ಸಂಬಂಧ ರೂಪಿಸಿದ್ದ ಆ್ಯಪ್ ಅನ್ನು ಆ್ಯಪಲ್ ಮತ್ತು ಗೂಗಲ್ ಸ್ಟೋರ್ಸ್      ನಿಂದ ತೆಗೆದು ಹಾಕಲಾಗಿತ್ತು.

 ಪುಟಿನ್ ಬೆಂಬಲಿತ ಅಭ್ಯರ್ಥಿಗಳನ್ನು ಸೋಲಿಸುವ ಉದ್ದೇಶದಿಂದ ಎದುರಾಳಿ ಅಭ್ಯರ್ಥಿಗಳ ಬಗ್ಗೆ ಪ್ರಚಾರ ಮಾಡುವ ‘ಸ್ಮಾರ್ಟ್ ವೋಟಿಂಗ್’ ಆ್ಯಪ್ ಅನ್ನು ತೆಗೆದುಹಾಕುವಂತೆ ಕಳೆದ ವಾರ ಸೂಚಿಸಿದ್ದ ರಶ್ಯ ಅಧಿಕಾರಿಗಳು, ಇದಕ್ಕೆ ತಪ್ಪಿದರೆ ಚುನಾವಣೆಯಲ್ಲಿ ಹಸ್ತಕ್ಷೇಪ ನಡೆಸಿದ ಆರೋಪ ದಾಖಲಿಸುವ ಜತೆಗೆ ಭಾರೀ ದಂಡ ವಿಧಿಸಲಾಗುವುದು ಎಂದು ಎಚ್ಚರಿಸಿದ್ದರು.

ಕಟ್ಟಕಡೆಯ ಸಾಧನ ಉಳಿದಿದೆ: ನವಾಲ್ನಿ

ಟೆಲಿಗ್ರಾಂನಿಂದ ‘ಸ್ಮಾರ್ಟ್ ವೋಟಿಂಗ್’ ಆ್ಯಪ್ ಮಾಯವಾಗುತ್ತಿದ್ದಂತೆಯೇ, ನವಾಲ್ನಿಗೆ ಸಂಬಂಧಿಸಿದ ಟ್ವಿಟರ್ ಖಾತೆಯಲ್ಲಿ ಬೆಂಬಲಿತ ಅಭ್ಯರ್ಥಿಗಳ ವಿವರವನ್ನು ಪ್ರಕಟಿಸಲಾಗಿದ್ದು ‘ಇದು ತಮ್ಮ ಬಳಿ ಉಳಿದಿರುವ ಕಟ್ಟಕಡೆಯ ಸಾಧನವಾಗಿದೆ’ ಎಂದು ಅಡಿಬರಹ ನೀಡಲಾಗಿದೆ. ಅಧ್ಯಕ್ಷ ವ್ಲಾದಿಮಿರ್ ಪುಟಿನ್ರ ರಾಜಕೀಯ ಎದುರಾಳಿಗಳ ವಿರುದ್ಧ ವ್ಯಾಪಕ ದಮನ ಕಾರ್ಯಾಚರಣೆಯ ಬಳಿಕ ಸಂಸತ್ತಿನ ಕೆಳಮನೆಗೆ ನಡೆಯುತ್ತಿರುವ ಚುನಾವಣೆ ಇದಾಗಿದೆ. ವಿಪಕ್ಷ ಮುಖಂಡ ನವಾಲ್ನಿ ಜನವರಿಯಿಂದ ಜೈಲಿನಲ್ಲಿದ್ದು ಕಂಬಿಗಳ ಹಿಂದಿನಿಂದಲೇ ಚುನಾವಣೆಯ ತಂತ್ರಗಾರಿಕೆ ರೂಪಿಸುತ್ತಿದ್ದಾರೆ. ಆದರೆ ಅವರ ನೇತೃತ್ವದ ಮೈತ್ರಿಕೂಟದ ಬಹುತೇಕ ಮುಖಂಡರು ಜೈಲಿನಲ್ಲಿದ್ದಾರೆ ಅಥವಾ ದೇಶ ಬಿಟ್ಟು ಪರಾರಿಯಾಗಿದ್ದಾರೆ.