ಸೋದ್-5 ರಿಯಾಲಿಟಿ ಶೋ : ಟಾಪ್ 10 ಆಯ್ಕೆ
ಮಂಗಳೂರು, ಸೆ.26: ಮಾಂಡ್ ಸೊಭಾಣ್ ಪ್ರಸ್ತುತಪಡಿಸುವ ಕೊಂಕಣಿಯ ಬಹು ದೊಡ್ಡ ಗಾಯನ ರಿಯಾಲಿಟಿ ಸ್ಪರ್ಧೆ ‘ಎಂಸಿಸಿ ಬ್ಯಾಂಕ್ ಲಿ. ಸೋದ್-5 ಮ್ಯಾಂಗೋವಾ’ ಟಾಪ್ 10 ಹಂತಕ್ಕೆ ತಲುಪಿದೆ.
ವಿವಿಧ ಐದು ಹಂತಗಳಲ್ಲಿ ಕಠಿಣ ಸ್ಪರ್ಧೆಯನ್ನು ಎದುರಿಸಿ ಟಾಪ್ 10 ಹಂತಕ್ಕೆ ಜೇಸನ್ ಲೋಬೊ, ಬೊಂದೆಲ್, ವೈಭವ್ ಶ್ವಾಸ್ ಕಾಮತ್ ಗೋವಾ, ಮಾರ್ವೆಲ್ ಕ್ರಿಸ್ಟನ್ ಡಿಸೋಜ ಉಡುಪಿ, ರೈನಲ್ ಸಿಕ್ವೇರಾ, ಕುಲ್ಶೇಕರ, ಜೀವನ್ ಬಸ್ತ್ಯಾಂವ್ ಸಿದ್ದಿ, ಮುಂಡಗೋಡ ಹಾಗೂ ಗಾಯಕಿಯರಾದ ಲೀಶಾ ಗ್ರೇಟಲ್ ಡಿಸಿಲ್ವಾ ದೇರೆಬೈಲ್, ಸೋನಲ್ ಆ್ಯಗ್ನೆಸ್ ಮೊಂತೇರೊ ಕುಲಶೇಖರ, ಲವೀಟಾ ರೊಲಿಟಾ ಡಿಸೋಜ ತೊಕ್ಕೊಟ್ಟು, ಟ್ರೀಜಾ ಲೊಪೆಸ್ ಹೊನ್ನಾವರ ಮತ್ತು ಕ್ಯಾರಲ್ ಪ್ರೀಮಾ ಸಿಕ್ವೇರಾ ವೆಲೆನ್ಸಿಯಾ ಆಯ್ಕೆಯಾಗಿದ್ದಾರೆ. ಟಾಪ್ 10 ವಿಜೇತರಿಗೆ ನೆಲ್ಸನ್ ರೊಡ್ರಿಕ್ಸ್ ಪ್ರಾಯೋಜಿತ ತಲಾ 10,000 ರೂ. ಮತ್ತು ಪ್ರಮಾಣ ಪತ್ರ ಲಭಿಸಲಿದೆ.
ಮುಂದೆ ಸೂಪರ್ ಸಿಕ್ಸ್ ಮತ್ತು ಫೈನಲ್ ಫೊರ್ ಹಂತಗಳಿದ್ದು, ಅಂತಿಮವಾಗಿ ಓರ್ವ ಗಾಯಕ ‘ರಾಯ್ ಕೊಗುಳ್’ ಮತ್ತು ಗಾಯಕಿ ’ರಾಣಿ ಕೊಗುಳ್’ ಆಗಿ ಆಯ್ಕೆಯಾಗಲಿದ್ದಾರೆ. ವಿಜೇತರಿಗೆ 50.000 ರೂ.ನಗದು ಮತ್ತು ಬಿರುದು ಲಭಿಸಲಿದೆ.
ವಿಜೇತರಿಗೆ ಪ್ರತಿಷ್ಠಿತ ಎಸ್ಕೆಎ, ಲಂಡನ್ ಸಂಘಟನೆಯ ಒಂದು ಕಾರ್ಯಕ್ರಮಕ್ಕೆ ಲಂಡನ್ಗೆ ತೆರಳುವ ಅವಕಾಶ ಲಭಿಸಲಿದೆ. ಈ ಹತ್ತು ಗಾಯಕರಿಂದ ತಿಂಗಳ ವೇದಿಕೆ ಸರಣಿಯ 239 ನೇ ಕಾರ್ಯಕ್ರಮವಾಗಿ, ಆಕ್ಟೋಬರ್ನಲ್ಲಿ ಸಂಗೀತ ರಸಮಂಜರಿ ನಡೆಯಲಿದೆ.
