ವೈದ್ಯಕೀಯ ವಿದ್ಯಾರ್ಥಿಗಳ ಮೇಲೆ ಗೂಂಡಾಗಿರಿ ದ.ಕ. ಜಿಲ್ಲೆಗೆ ಕಪ್ಪು ಚುಕ್ಕೆ: ಯು.ಟಿ.ಖಾದರ್
ಮಂಗಳೂರು, ಸೆ.29: ಯಾರದೋ ಮಕ್ಕಳನ್ನು ಸಾರ್ವಜನಿಕವಾಗಿ ಹಿಡಿದು ಹೊಡೆಯುವ ರೌಡಿಗಳ ಅಟ್ಟಹಾಸವು ದಕ್ಷಿಣ ಕನ್ನಡ ಜಿಲ್ಲೆಗೆ ಕಪ್ಪು ಚುಕ್ಕೆಯಾಗಿದ್ದು, ಇದರಿಂದ ಇಲ್ಲಿಯ ಆರ್ಥಿಕ ಪ್ರಗತಿ, ಶಿಕ್ಷಣ ಸಂಸ್ಥೆಗಳಿಗೆ ವಿದ್ಯಾರ್ಥಿಗಳ ಸೇರ್ಪಡೆ ಮೇಲೆ ದುಷ್ಪರಿಣಾಮ ಬೀರಲಿದೆ ಎಂದು ಮಾಜಿ ಸಚಿವ, ಶಾಸಕ ಯು.ಟಿ.ಖಾದರ್ ಎಚ್ಚರಿಸಿದರು.
ಸುದ್ದಿಗೋಷ್ಠಿಯಲ್ಲಿಂದು, ಎನ್ಐಟಿಕೆ ಬಳಿ ವೈದ್ಯಕೀಯ ವಿದ್ಯಾರ್ಥಿಗಳ ಮೇಲಿನ ಹಲ್ಲೆ ಘಟನೆಯನ್ನು ಪ್ರಸ್ತಾಪಿಸಿ ಮಾತನಾಡಿದ ಅವರು, ಕಾನೂನು ಮತ್ತು ಪೊಲೀಸ್ ಇಲಾಖೆಯ ಭಯವಿಲ್ಲದೆ, ಆಡಳಿತ ಪಕ್ಷದ ಕುಮ್ಮಕ್ಕಿನಿಂದ ರೌಡಿಗಳು ಅಟ್ಟಹಾಸ ಮೆರೆಯುತ್ತಿದ್ದಾರೆ. ಪೊಲೀಸ್ ಇಲಾಖೆಯು ಬಾಸ್ಗಳ ಅಡಿಯಾಳಾಗದೆ, ಕಾನೂನಿನ ಮೂಲಕ ದುಷ್ಕರ್ಮಿಗಳ ಹೆಡೆಮುರಿ ಕಟ್ಟಬೇಕು ಎಂದು ಒತ್ತಾಯಿಸಿದರು.
ಕಾನೂನಿನ ಭಯವಿಲ್ಲದೆ ಬೀದಿ ರೌಡಿಗಳ ಅಟ್ಟಹಾಸ ಮರುಕಳಿಸುತ್ತಿದೆ. ಯಾರದೋ ಅಮಾಯಕ ಮಕ್ಕಳು ಪೆಟ್ಟು ತಿನ್ನುತ್ತಿದ್ದಾರೆ. ಪೊಲೀಸ್ ಇಲಾಖೆ ಸುಮ್ಮನೆ ಕೂತಿದ್ದರಿಂದ ಕರಾವಳಿಯಲ್ಲಿ ಅರಾಜಕತೆ ಸೃಷ್ಟಿಯಾಗಿದೆ. ರೌಡಿಗಳು ಜೀಪಿಗೆ ನುಗ್ಗಿ ಹೊಡೆಯವಾಗ ಪೊಲೀಸ್ ಇನ್ಸ್ಪೆಕ್ಟರ್ ಅಂಗಲಾಚುವ ವೀಡಿಯೊ ನಾಚಿಕೆಗೇಡು. ಆಗ ಪೊಲೀಸರ ಲಾಠಿ ಎಲ್ಲಿತ್ತು? ಪೊಲೀಸರು ಲಾಠಿ ಕೆಳಗಿಟ್ಟರೆ, ಜನರು ಲಾಠಿ ಹಿಡಿಯಬೇಕಾದ ಪರಿಸ್ಥಿತಿ ನಿರ್ಮಾಣವಾಗಬಹುದು ಎಂದು ಅವರು ಎಚ್ಚರಿಸಿದರು.
ಬೆಂಗಳೂರಿನಲ್ಲಿ ಬೈಕ್ನಲ್ಲಿ ಸಹೋದ್ಯೋಗಿಯನ್ನು ಕರೆದುಕೊಂಡಾತನ ಮೇಲೆ ಹಲ್ಲೆ ನಡೆಸಿದ ಘಟನೆಯನ್ನು ಸಹಿಸಲು ಸಾಧ್ಯವಿಲ್ಲ ಎಂದು ಸಿಎಂ ಟ್ವೀಟ್ ಮಾಡಿದ್ದರು. ಈಗೇಕೆ ಅವರು ಸುಮ್ಮನಿದ್ದಾರೆ. ಪೆಟ್ಟು ತಿಂದ ಮಕ್ಕಳ ಹೆತ್ತವರ ಕಣ್ಣೀರು ಪಾತಕಿಗಳ ಜತೆಗೆ, ರಾಜಕಾರಣಿಗಳು ಮತ್ತು ಪೊಲೀಸರಿಗೂ ತಟ್ಟದೇ ಇರುವುದಿಲ್ಲ. ಪೆಟ್ಟು ತಿಂದವರು ಬಂದು ಕೇಸು ದಾಖಲಿಸಬೇಕಂತೆ. ಯಾವ ಹೆಣ್ಣು ಮಕ್ಕಳು ಠಾಣೆಗೆ ಬಂದು ಮಾನ ಹರಾಜು ಮಾಡಲು ಸಿದ್ಧರಿದ್ದಾರೆ? ಆ ಮಕ್ಕಳಿಗೆ ಮಾನಸಿಕ ಸ್ಥೈರ್ಯ ಕೊಡುವ ಕೆಲಸ ಪೊಲೀಸರಿಂದ ಆಗಿದೆಯಾ? ಬೆಳಗ್ಗೆ ಆರೋಪಿಗಳನ್ನು ಬಂಧಿಸಿ, ಸಂಜೆ ಜಾಮೀನು ಸಿಗುತ್ತದೆ. ಇದು ಇನ್ನಷ್ಟು ಮಂದಿಗೆ ಪ್ರಚೋದನೆಗೆ ಕಾರಣವಾಗಲಿದೆ. ಪೊಲೀಸರ ಹೆಸರು ಕೂಡಾ ಕೆಡಿಸಿದಂತಾಗುತ್ತದೆ ಎಂದರು.ಸುಮೊಟೊ ಕೇಸು ಯಾಕಿಲ್ಲ?: ಎಲ್ಲ ಪ್ರದೇಶ, ವರ್ಗಗಳಲ್ಲೂ ಇಂಥ ದುಷ್ಟ ಶಕ್ತಿಗಳಿದ್ದಾರೆ. ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಹಿಂದೆ ಇಂಥ ಘಟನೆ ನಡೆದಾಗ ಸ್ವಯಂಪ್ರೇರಿತವಾಗಿ 307 ಕೇಸು ದಾಖಲಿಸುತ್ತಿದ್ದರು. ಇನ್ಸ್ಪೆಕ್ಟರ್ ಮುಂದೆ ಹಲ್ಲೆ ನಡೆಸಿದಾಗ ಯಾವ ಕೇಸು ದಾಖಲಿಸಿದ್ದಾರೆ. ಬೈಕ್ನಲ್ಲಿ ಹೋಗುವ ಯುವಕರನ್ನು ಪೊಲೀಸರು ತಡೆದಾಗ, ಒಂದು ವಾಕ್ಯ ಮಾತನಾಡಿದರೂ, ಕರ್ತವ್ಯಕ್ಕೆ ಅಡ್ಡಿ ಎಂದು ಠಾಣೆಗೆ ಕರೆದೊಯ್ಯುವ ಪೊಲೀಸರಿಗೆ ಈಗ ಸ್ವಯಂಪ್ರೇರಿತ ಕೇಸು ದಾಖಲಿಸಲು ಅಡ್ಡ ಬಂದದ್ದಾದರೂ ಯಾರು? ನೀವು ಸಮಾಜಕ್ಕೆ ಯಾವ ಸಂದೇಶ ಕೊಡುತ್ತೀರಾ? ಎಂದು ಖಾದರ್ ಪ್ರಶ್ನಿಸಿದರು.
ಹಾನಗಲ್ ಮತ್ತು ಸಿಂಧಗಿ ಉಪಚುನಾವಣೆಯಲ್ಲಿ ಕಾಂಗ್ರೆಸ್ ಗೆಲ್ಲಲಿದೆ. ರಾಜ್ಯದ ಜನತೆ ಬಿಜೆಪಿ ಆಡಳಿತದಿಂದ ಬೇಸತ್ತಿದ್ದು, ದೇಶಕ್ಕೊಂದು ಸಂದೇಶ ನೀಡಲಿದ್ದಾರೆ. ದೇಶ ಮತ್ತು ರಾಜ್ಯಕ್ಕೆ ಕಾಂಗ್ರೆಸ್ ಏಕೆ ಅನಿವಾರ್ಯ ಎಂದು ಈಗ ಜನರಿಗೆ ಅರ್ಥವಾಗಿದೆ ಎಂದು ಖಾದರ್ ಉತ್ತರಿಸಿದರು.
ಸೋಮೇಶ್ವರದ ಕೆಲವು ಮನೆಗಳ ಬಳಿ ಕರಪತ್ರಗಳನ್ನಿಟ್ಟು, ಮತಾಂತರ ನಡೆಯುತ್ತಿದೆ ಎಂದು ಆರೋಪ ಮಾಡಿರುವ ಘಟನೆಗೆ ಸಂಬಂಧಿಸಿದಂತೆ ಪೊಲೀಸರು ತನಿಖೆ ನಡೆಸಿ, ಇದರ ಹಿಂದಿನ ಒಳಸಂಚು ಭೇದಿಸಬೇಕು. ಜನರ ಮಧ್ಯೆ ಅಪನಂಬಿಕೆ ಮೂಡಿಸಿ ಅಶಾಂತಿ ಸೃಷ್ಟಿಸುವವರ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ಶಾಸಕ ಖಾದರ್ ಒತ್ತಾಯಿಸಸಿದರು.
ಪೊಲೀಸ್ ಇಲಾಖೆಗೆ ಪೂರ್ಣ ಸಹಕಾರ
ನಾನೂ ಜಿಲ್ಲಾ ಉಸ್ತುವಾರಿ ಸಚಿವನಾಗಿದ್ದೆ. ನಾನಂತೂ ಇಂಥ ದುಷ್ಕೃತ್ಯಗಳಿಗೆ ಅವಕಾಶವೇ ಕೊಟ್ಟಿರಲಿಲ್ಲ. ಗೂಂಡಾಗಿರಿ ಮಾಡುವವರಿಗೆ ಅಂದಿನ ಕಮೀಷನರ್ ಶೂಟೌಟ್ ಆದೇಶ ಕೊಟ್ಟಿದ್ದರು. ಗೂಂಡಾಗಳು ನಡುಗುತ್ತಿದ್ದರು. ಅವರ ಕಾಲಿಗೆ ಬೀಳುತ್ತಿದ್ದರು. ಕಾನೂನು ಸುವ್ಯವಸ್ಥೆ ಸರಿಪಡಿಸುವ ಕೆಲಸ ಆಗಬೇಕು. ಪೊಲೀಸರು ಕಠಿಣ ಕ್ರಮ ಕೈಗೊಂಡರೆ ಮಾತ್ರ ಈ ರೌಡಿಸಂ ನಿಲ್ಲಿಸಲು ಸಾಧ್ಯವಿದೆ. ನಮಗೆ ಪೊಲೀಸ್ ಇಲಾಖೆ ಮೇಲೆ ಗೌರವ ಇದೆ ಎಂದು ಯು.ಟಿ.ಖಾದರ್ ಹೇಳಿದರು.
ಸುದ್ದಿಗೋಷ್ಠಿಯಲ್ಲಿ ಜಿಲ್ಲಾ ಕಾಂಗ್ರೆಸ್ ಉಪಾಧ್ಯಕ್ಷ ಸದಾಶಿವ ಉಳ್ಳಾಲ್, ಪ್ರಧಾನ ಕಾರ್ಯದರ್ಶಿ ಸಂತೋಷ್ ಕುಮಾರ್ ಶೆಟ್ಟಿ, ಮುರಳಿ ನರಿಂಗಾನ ಉಪಸ್ಥಿತರಿದ್ದರು.
