ಹರ್ಯಾಣ ಎಸ್ಸೈ ಹುದ್ದೆ ನೇಮಕಾತಿ ಪರೀಕ್ಷೆ ಅಭ್ಯರ್ಥಿಗಳಿಗೆ ಬಿಜೆಪಿ ರಾಜಕಾರಣಿಗಳ, ಸಿನೆಮಾ ತಾರೆಯರ ಕುರಿತ ಪ್ರಶ್ನೆಗಳು

ಚಂಡೀಗಢ: ಇತ್ತೀಚೆಗೆ ಬಿಜೆಪಿ ಆಡಳಿತವಿರುವ ಹರ್ಯಾಣದಲ್ಲಿ 463 ಸಬ್ ಇನ್‍ಸ್ಪೆಕ್ಟರ್ ಹುದ್ದೆಗಳ ನೇಮಕಾತಿಗಾಗಿ ನಡೆದ ಪರೀಕ್ಷೆಯಲ್ಲಿ ಭಾಗವಹಿಸಿದ ಅಭ್ಯರ್ಥಿಗಳಿಗೆ ಪ್ರಶ್ನೆಪತ್ರಿಕೆಯಲ್ಲಿ ಕಾನೂನು ಅಥವಾ ತಮ್ಮ ವೃತ್ತಿಗೆ ಸಂಬಂಧಿಸಿದ ಪ್ರಶ್ನೆಗಳಿಗಿಂತ ಹೆಚ್ಚಾಗಿ ಬಿಜೆಪಿ ರಾಜಕಾರಣಿಗಳು ಹಾಗೂ ಸಿನೆಮಾ ತಾರೆಯರ ಕುರಿತಾದ ಪ್ರಶ್ನೆಗಳೇ ಕಂಡು ಬಂದು ಅಚ್ಚರಿ ಹಾಗೂ ಆಘಾತ ಮೂಡಿಸಿದೆ.

"ಬಿಜೆಪಿ ನಾಯಕ ಹಾಗೂ ಹರ್ಯಾಣ ಗೃಹ ಸಚಿವ ಅನಿಲ್ ವಿಜ್ ಅವರ  ವಿಶಿಷ್ಟತೆಯೇನು? ಹರ್ಯಾಣದ ಜತೆ ನಂಟು ಹೊಂದಿರುವ  ಉತ್ತರಾಖಂಡ ಬಿಜೆಪಿ ಸರಕಾರದ ಸಚಿವರನ್ನು ಹೆಸರಿಸಿ. ಇತ್ತೀಚೆಗೆ ತಮ್ಮ ತಂದೆಯನ್ನು ಕಳೆದುಕೊಂಡ ಹರ್ಯಾಣ ಬಿಜೆಪಿ ಸಂಸದರ ಹೆಸರು ತಿಳಿಸಿ. ಬರೋಡ ಉಪಚುನಾವಣೆಯಲ್ಲಿ ಬಿಜೆಪಿ ಟಿಕೆಟಿನಿಂದ ಯಾರು ಸ್ಪರ್ಧಿಸಿದ್ದರು. ಬೇಬಿ ರಾಣಿ ಮೌರ್ಯ ಯಾರು? ಹರ್ಯಾಣ ರಾಜ್ಯ ಬಿಜೆಪಿ ಅಧ್ಯಕ್ಷರ್ಯಾರು? ಹರ್ಯಾಣಾದ ವಿತ್ತ ಹಾಗೂ ಪ್ರವಾಸೋದ್ಯಮ ಸಚಿವರ್ಯಾರು, ವಿಶ್ವ ಹಿಂದು ಪರಿಷದ್ ಅಧ್ಯಕ್ಷ ಯಾರು?" ಇವೇ ಮುಂತಾದ ಪ್ರಶ್ನೆಗಳನ್ನು ಅಭ್ಯರ್ಥಿಗಳು ಉತ್ತರಿಸಬೇಕಿತ್ತು. ಕಾನೂನಿಗೆ ಸಂಬಂಧಿಸಿದ ಹಲವು ಪ್ರಶ್ನೆಗಳಿಗೆ ಉತ್ತರಿಸಲು ಸಿದ್ಧರಾಗಿ ಬಂದಿದ್ದ ಅಭ್ಯರ್ಥಿಗಳಿಗೆ ಪ್ರಶ್ನೆಪತ್ರಿಕೆ ನೋಡಿ ಕಕ್ಕಾಬಿಕ್ಕಿಯಾಗಿತ್ತು.

ಹರ್ಯಾಣಾದ ಖ್ಯಾತ ಕ್ರಿಕೆಟಿಗರೊಬ್ಬರು ಸೊಸೆ ಈ ಮೂವರಲ್ಲಿ ಯಾರು (ಪ್ರಿಯಾಂಕ ಚೋಪ್ರಾ, ಕರೀನಾ ಕಪೂರ್, ಮಾನುಷಿ ಚಿಲ್ಲಾರ್ ಹಾಗೂ ಮಲ್ಲಿಕಾ ಶೇರಾವತ್)? ಬಾಲಿವುಡ್ ಚಿತ್ರ ಎನ್‍ಎಚ್-10 ಇದರ ನಾಯಕನಟಿ ಯಾರು ಎಂಬ ಪ್ರಶ್ನೆಗಳೂ ಇದ್ದವು.

ಈ ಕುರಿತು ಪ್ರತಿಕ್ರಿಯಿಸಿದ ಹರ್ಯಾಣ ರಾಜ್ಯ ಲೋಕಸೇವಾ ಆಯೋಗದ ಅಧ್ಯಕ್ಷ ಭೋಪಾಲ್ ಸಿಂಗ್ ಖಾದ್ರಿ, "ಕೆಲ ಪ್ರಶ್ನೆಗಳು ಅಪ್ರಸ್ತುತ ಎಂಬುದನ್ನು ಒಪ್ಪುತ್ತೇನೆ, ಪ್ರಶ್ನೆಪತ್ರಿಕೆ ತಯಾರಿಸಿದ ಏಜನ್ಸಿಗೆ ನೋಟಿಸ್ ಜಾರಿಗೊಳಿಸಿ ಅದರ ಉತ್ತರ ದೊರೆತ ನಂತರ ಅದನ್ನು ಕಪ್ಪು ಪಟ್ಟಿಗೆ ಸೇರಿಸುವ ಸಾಧ್ಯತೆಯಿದೆ, ಹರ್ಯಾಣ ಸರಕಾರ ಕೂಡ ಈ ಪರೀಕ್ಷೆಯಿಂದ ಸಮಾಧಾನಗೊಂಡಿಲ್ಲ, ಭವಿಷ್ಯದಲ್ಲಿ ಹೀಗಾಗದಂತೆ ನೋಡಿಕೊಳ್ಳುತ್ತೇವೆ"ಎಂದು ಹೇಳಿದರಲ್ಲದೆ ಮರುಪರೀಕ್ಷೆ ನಡೆಸುವ ಸಾಧ್ಯತೆಯಿಲ್ಲ ಎಂದಿದ್ದಾರೆ.