ಮಂಗಳೂರು : ಸಿನೊಡ್ ಲಾಂಛನ ಅನಾವರಣ

ಮಂಗಳೂರು, ಅ.17: ಮಂಗಳೂರು ಧರ್ಮಾಧ್ಯಕ್ಷ ಅ.ವಂ. ಡಾ. ಪೀಟರ್ ಪಾವ್ಲ್ ಸಲ್ಡಾನ್ಹಾ ಮಂಗಳೂರಿನ ಅವರ್ ಲೇಡಿ ಆಫ್ ಹೋಲಿ ರೋಸರಿ ಪ್ರಧಾನಾಲಯದಲ್ಲಿ ರವಿವಾರ ನಡೆದ ದಿವ್ಯ ಬಲಿಪೂಜೆಯಲ್ಲಿ ‘ಸಿನೊಡ್ 2021-2023’ರ ಪ್ರಕ್ರಿಯೆಯ ಭಾಗವಾಗಿ ಧರ್ಮಪ್ರಾಂತ್ಯದ ಮಟ್ಟದಲ್ಲಿ ಸಿನೊಡ್‌ನ ಲಾಂಛನವನ್ನು ಅನಾವರಣಗೊಳಿಸಿದರು.

ಧರ್ಮಾಧ್ಯಕ್ಷರು ಧರ್ಮಪ್ರಾಂತ್ಯದಲ್ಲಿ ಸಿನೊಡಲ್ ಪ್ರಕ್ರಿಯೆಗೆ ಅಧಿಕೃತ ಚಾಲನೆ ನೀಡಿದಂತಾಗಿದೆ. ದಿವ್ಯ ಬಲಿಪೂಜೆಯಲ್ಲಿ ಯಾಜಕರು, ಧಾರ್ಮಿಕ ಸಹೋದರ-ಸಹೋದರಿಯರು ಹಾಗೂ ಭಕ್ತ ಸಮೂಹ ಕೂಡಿತ್ತು. ‘‘ಜೊತೆಯಲ್ಲಿ ಸಾಗುವ ಧರ್ಮಸಭೆಗಾಗಿ: ಅನ್ಯೋನ್ನತೆ, ಸಹಭಾಗಿತ್ವ, ಮತ್ತು ಸುವಾರ್ತಾ ಪ್ರಸಾರ’’ ಎನ್ನುವುದು ಸಿನೋಡ್ ಲಾಂಛನದಲ್ಲಿ ಚಿತ್ರಿಸಲಾಗಿದೆ.

ಧರ್ಮಾಧ್ಯಕ್ಷ ಅ.ವಂ.ಡಾ. ಪೀಟರ್ ಪೌಲ್ ಸಲ್ಡಾನ್ಹಾ ಮಾತನಾಡಿ, ವಿಶ್ವಗುರು ಪೋಪ್ ಫ್ರಾನ್ಸಿಸ್ ರೋಮ್‌ನ ವ್ಯಾಟಿಕನ್ ನಗರದಲ್ಲಿ ಅ.9 ಮತ್ತು 10ರಂದು ಸಮಾಲೋಚನೆ ಮತ್ತು ವಿವೇಚನೆಯ ಮೂರು ವರ್ಷಗಳ ಸಿನೊಡಲ್ ಪ್ರಯಾಣವನ್ನು ಆರಂಭಿಸಿದ್ದಾರೆ. ರೋಮ್‌ನಲ್ಲಿ ಅ.2023ರಲ್ಲಿ ನಡೆಯಲಿರುವ ಸಭೆಯೊಂದಿಗೆ ಇದು ಮುಕ್ತಾಯಗೊಳ್ಳುತ್ತದೆ. 2023ರಲ್ಲಿ ವ್ಯಾಟಿಕನ್ ನಗರದಲ್ಲಿ ನಡೆಯಲಿರುವ ಧರ್ಮಾಧ್ಯಕ್ಷರ ಸಭೆಗಾಗಿ, ಜಾಗತಿಕ ಧರ್ಮಸಭೆಯ ಸಿದ್ಧತೆಯ ಭಾಗವಾಗಿ ಧರ್ಮಪ್ರಾಂತ್ಯ ಪೂರ್ವಸಿದ್ಧತಾ ದಾಖಲೆ ಮತ್ತು ಮಾಹಿತಿ ನೀಡುವ ಕೈಪಿಡಿ ಪುಸ್ತಕ ನೀಡಿಲಾಗಿದೆ ಎಂದು ಧರ್ಮಾಧ್ಯಕ್ಷರು ಹೇಳಿದರು. 

ಈ ಸಿನೊಡ್ ಕೇವಲ ಧರ್ಮಾಧ್ಯಕ್ಷರಿಗೆ ಮಾತ್ರ ಸೀಮಿತವಲ್ಲ; ಬದಲಾಗಿ ದೀಕ್ಷೆ ಪಡೆದ ಯಾಜಕರು, ಧಾರ್ಮಿಕರು ಮತ್ತು ಎಲ್ಲ ಶ್ರೀಸಾಮಾನ್ಯ ಭಕ್ತರು ಸಿನೊಡ್‌ನ ಭಾಗವಾಗಿದ್ದಾರೆ. ಈ ಪ್ರಕ್ರಿಯೆಯನ್ನು ಪ್ರಾರಂಭಿಸಲು ಆಳವಾದ ಅಧ್ಯಯನದ ಅಗತ್ಯವಿದೆೆ. ನಾವೆಲ್ಲರೂ ಐಕ್ಯಮತ್ಯದಿಂದ ಜೊತೆಜೊತೆಯಾಗಿ ಸಾಗೋಣ ಎಂದು ಅವರು ಹೇಳಿದರು.

ಧರ್ಮಪ್ರಾಂತ್ಯದಲ್ಲಿ ಸಿನೊಡಲ್ ಪ್ರಕ್ರಿಯೆಯನ್ನು ಚರ್ಚಿಸಲು ಯಾಜಕರಿಗೆ, ಧಾರ್ಮಿಕ ಸಹೋದರ ಸಹೋದರಿಯರಿಗೆ, ಕನ್ಯಾ ಭಗಿನಿಯರಿಗೆ ಮತ್ತು ಧರ್ಮಪ್ರಾಂತ್ಯದ ಪಾಲನ ಸದಸ್ಯರಿಗೆ ಅಧ್ಯಯನ ಅಧಿವೇಶನವನ್ನು ಇದೇ ಅ.21ರಂದು ಉರ್ವ ಧರ್ಮ ಕೇಂದ್ರದಲ್ಲಿ ಆಯೋಜಿಸಲಾಗಿದ್ದು, ಧರ್ಮಪ್ರಾಂತ್ಯದ ಪಾಲನ ಸಭೆಯ 50ನೇ ವಾರ್ಷಿಕೋತ್ಸವ ಸಮಾರಂಭದಲ್ಲಿ ಇದನ್ನು ನಡೆಸಲಾಗುವುದು ಎಂದು ಧರ್ಮಾಧ್ಯಕ್ಷರು ಮಾಹಿತಿ ನೀಡಿದರು.

ಧರ್ಮಕೇತ್ರದ ಶ್ರೇಷ್ಠ ಗುರು ಅ.ವಂ. ಮ್ಯಾಕ್ಸಿಮ್ ಎಲ್. ನೊರೊನ್ಹ, ಧರ್ಮಾಧ್ಯಕ್ಷರ ಧಾರ್ಮಿಕ ಪ್ರತಿನಿಧಿ ಶ್ರೇಷ್ಟಗುರು ಹಾಗೂ ಸಿಎಪಿ ಅ.ವಂ. ಪಾಲ್ ಮೆಲ್ವಿನ್ ಡಿಸೋಜ, ಸಿನೊಡಲ್ ಪ್ರಕ್ರಿಯೆಯ ಮುಖ್ಯ ಕಾರ್ಯನಿರ್ವಾಹಕ ಅ.ವಂ. ಜೋಸೆಫ್ ಮಾರ್ಟಿಸ್, ಅವರ್ ಲೇಡಿ ಆಫ್ ಹೋಲಿ ರೋಸರಿ ಪ್ರಧಾನಾಲಯದ ಮುಖ್ಯಸ್ಥ ವಂ.ಗುರು ಆಲ್ಫ್ರೆಡ್ ಪಿಂಟೊ ಮತ್ತಿತರರು ಉಪಸ್ಥಿತರಿದ್ದರು.