ರೈಲಿನಲ್ಲಿ ಮುಸ್ಲಿಂ ವ್ಯಕ್ತಿಯನ್ನು ತಾನು ಥಳಿಸುತ್ತಿರುವ ವೀಡಿಯೋ ಪೋಸ್ಟ್ ಮಾಡಿದ ಹಿಂದುತ್ವ ನಾಯಕಿ ಮಾ ಮಧುರಾ

ಹೊಸದಿಲ್ಲಿ: ಹಿಂದುತ್ವ ನಾಯಕಿ ಮಾ ಮಧುರಾ ಎಂದೇ ಕರೆಯಲ್ಪಡುವ ಮಧು ಶರ್ಮ ಎಂಬಾಕೆ  ರೈಲೊಂದರಲ್ಲಿ ಮುಸ್ಲಿಂ ವ್ಯಕ್ತಿಯ ಮೇಲೆ ಹಲ್ಲೆಗೈದಿದ್ದೇ ಅಲ್ಲದೆ ತನ್ನ ಪಾದ ಮುಟ್ಟುವಂತೆ ಆತನನ್ನು ಬಲವಂತಪಡಿಸಿದ ವೀಡಿಯೋವೊಂದು ಹರಿದಾಡುತ್ತಿದೆ. ರೈಲ್ವೆ ಕೋಚ್ ಗ್ಯಾಲರಿಯಲ್ಲಿ ಹಾದು ಹೋಗುವ ವೇಳೆ ಆತ ತನ್ನನ್ನು ದೂಡಿದ್ದಾನೆಂಬುದು ಮಧು ಶರ್ಮಾ ಆರೋಪವಾಗಿದೆ.

ವೀಡಿಯೋದಲ್ಲಿ ಆಕೆ ಆ ವ್ಯಕ್ತಿಯ ಕೂದಲು ಹಿಡಿದೆಳೆಯುತ್ತಿರುವುದು ಹಾಗೂ  ಆತನ ಕೆನ್ನೆಗೆ ಬಾರಿಸುತ್ತಿರುವುದು ಕಾಣಿಸುತ್ತದೆ. "ನಾನು ನಿನ್ನನ್ನು ಕೊಲ್ಲುತ್ತೇನೆ, ನನ್ನ ಪಾದ ಮುಟ್ಟು" ಎಂದು ಆಕೆ ಆತನಿಗೆ ಹೇಳುತ್ತಿರುವುದೂ ಕೇಳಿಸುತ್ತದೆ. ಈ 41 ಸೆಕೆಂಡುಗಳ ವೀಡಿಯೋದಲ್ಲಿ ಮಧು ಶರ್ಮ ಆ ಮುಸ್ಲಿಂ ವ್ಯಕ್ತಿಗೆ ಒಂದು ಡಜನಿಗೂ ಅಧಿಕ ಬಾರಿ ಕೆನ್ನೆಗೆ ಬಾರಿಸಿದಾಳಲ್ಲದೆ ಆತ ಟೋಪಿ ಧರಿಸುವಂತೆಯೂ ಮಾಡಿದ್ದಾಳೆ. ಆಕೆಯನ್ನು ದೂಡಿದ ಆರೋಪ ಕುರಿತಂತೆ ಆತ ನಾನು ಗಮನಿಸಲಿಲ್ಲ ಎಂದು ಹೇಳುತ್ತಿದ್ದರೂ ಅದು ಶರ್ಮಾಳ ಕಿವಿಗೆ ಬೀಳಲೇ ಇಲ್ಲ.

ಆಕೆ ಈ ವೀಡಿಯೋವನ್ನು ತನ್ನ ಫೇಸ್ಬುಕ್ ಪುಟದಲ್ಲಿ ಶೇರ್ ಮಾಡಿಕೊಂಡಿದ್ದಾಳೆ. ಟ್ವಿಟ್ಟರ್ ನಲ್ಲೂ ಶೇರ್ ಆಗಿದೆ. ಫೇಸ್ಬುಕ್‍ನಲ್ಲಿ ಸೆನ್ಸಿಟಿವ್ ಕಂಟೆಂಟ್ ಎಂಬ ಲೇಬಲ್ ಹಾಕಲಾಗಿದೆಯಾದರೂ  ಬೇರೆ ಯಾವುದೇ ಕ್ರಮಕೈಗೊಳ್ಳಲಾಗಿಲ್ಲ.

"ಸ್ನೇಹಿತರೇ, ಇದು ನಿಮ್ಮ ಮಾ ಮಧುರಾ,  ಗ್ಯಾಲರಿ ಮೂಲಕ ಹಾದು ಹೋಗುವಾಗ ಆತ ನನ್ನ ಭುಜಕ್ಕೆ ತಾಗಿಸಿದ್ದರಿಂದ  ಈ ಜಿಹಾದಿ ಹಾವನ್ನು ಥಳಿಸುತ್ತಿದ್ದೇನೆ. ಆತ ಪರಿಣಾಮ ಎದುರಿಸಲೇಬೇಕು" ಎಂದು ವೀಡಿಯೋ ಜತೆಗೆ ಪೋಸ್ಟ್ ಮಾಡಲಾಗಿದೆ.

ಈಕೆ ಕಟ್ಟಾ ಹಿಂದುತ್ವವಾದಿ ಹಾಗೂ ಹಲವು ಪ್ರಕರಣಗಳ ಆರೋಪಿ ಯತಿ ನರಸಿಂಗಾನಂದ್ ಎಂಬಾತನ ಶಿಷ್ಯೆಯಾಗಿದ್ದು ಹಲವಾರು ಬಿಜೆಪಿ ನಾಯಕರುಗಳ ಜತೆಗೆ ಆಕೆಯಿರುವ ಫೋಟೋಗಳೂ ಇವೆ.