ಕುವೆಂಪು ವಿವಿಯ ಪ್ರೊ. ನರಸಿಂಹಮೂರ್ತಿಗೆ ಅಂತರಾಷ್ಟ್ರೀಯ ಫೆಲೋಷಿಪ್ ಪ್ರಶಸ್ತಿ

ಶಂಕರಘಟ್ಟ, ಅ. 28: ಕುವೆಂಪು ವಿಶ್ವವಿದ್ಯಾಲಯದ ಗಣಿತಶಾಸ್ತ್ರ ವಿಭಾಗದ ಹಿರಿಯ ಪ್ರಾಧ್ಯಾಪಕ ಪ್ರೊ.‌ ಎಸ್. ಕೆ. ನರಸಿಂಹಮೂರ್ತಿ ಅವರು ಅಲಹಾಬಾದ್ ಮೂಲದ ಪ್ರತಿಷ್ಠಿತ ಅಂತರಾಷ್ಟ್ರೀಯ ಭೌತಿಕ ವಿಜ್ಞಾನಗಳ ಅಕಾಡೆಮಿಯ 2021ರ ಅಸೋಸಿಯೇಟ್ ಫೆಲೋಷಿಪ್ ಪ್ರಶಸ್ತಿಗೆ ಪಾತ್ರರಾಗಿದ್ದಾರೆ. 

ಇತ್ತೀಚೆಗೆ ನಡೆದ ಭೌತಿಕ ವಿಜ್ಞಾನಗಳ ಅಕಾಡೆಮಿಯ 26ನೇಯ ವಾರ್ಷಿಕ ಸಮ್ಮೇಳನದಲ್ಲಿ ಕಾರ್ಯಕಾರಿ ಸಮಿತಿ‌ಯು ಪ್ರಶಸ್ತಿಯನ್ನು ಪ್ರಕಟಿಸಿದ್ದು, ನರಸಿಂಹಮೂರ್ತಿ ಅವರು ಗಣಿತಶಾಸ್ತ್ರ ವಿಷಯಕ್ಕೆ ನೀಡಿರುವ ಅಮೂಲ್ಯವಾದ ಕೊಡುಗೆಯನ್ನು ಪರಿಗಣಿಸಿ ಈ ಗೌರವ ನೀಡಲಾಗಿದೆ ಎಂದು ಕಾರ್ಯದರ್ಶಿ ಪ್ರೊ. ಪಿ. ಎನ್. ಪಾಂಡೆ ತಿಳಿಸಿದ್ದಾರೆ. 

ಗಣಿತಶಾಸ್ತ್ರದಂತಹ ಕಠಿಣವಾದ ವಿಷಯದಲ್ಲಿ ರಾಷ್ಟ್ರಮಟ್ಟದ ಸಾಧನೆ ಮಾಡಿರುವ ಪ್ರೊ. ನರಸಿಂಹಮೂರ್ತಿ ಅವರು ವಿಶ್ವವಿದ್ಯಾಲಯದ ಘನತೆಯನ್ನು ಹೆಚ್ಚಿಸಿದ್ದಾರೆ. ಇವರ ಸಾಧನೆ ವಿಶ್ವವಿದ್ಯಾಲಯದ ಸಂಶೋಧನಾ ಚಟುವಟಿಕೆಗಳಿಗೆ ಸ್ಫೂರ್ತಿಯಾಗಲಿ ಎಂದು ಕುಲಪತಿ ಪ್ರೊ. ಬಿ. ಪಿ. ವೀರಭದ್ರಪ್ಪ ಅಭಿನಂದಿಸಿದ್ದಾರೆ.