ಇನ್ನೂ ಒಂದು ರಾತ್ರಿ ಅರ್ಥರ್ ರೋಡ್ ಜೈಲಿನಲ್ಲಿ ಕಳೆಯಲಿರುವ ಆರ್ಯನ್ ಖಾನ್

 ಮುಂಬೈ: ಆರ್ಥರ್ ರೋಡ್ ಜೈಲಿನ ಅಧಿಕಾರಿಗಳು ಸೂಪರ್ ಸ್ಟಾರ್ ಶಾರುಖ್ ಖಾನ್ ಅವರ ಪುತ್ರ ಆರ್ಯನ್ ಖಾನ್ ನನ್ನು ಅಕ್ಟೋಬರ್ 29 ಶುಕ್ರವಾರ ಬಿಡುಗಡೆ ಮಾಡುವುದಿಲ್ಲ ಎಂದು ಖಚಿತಪಡಿಸಿದ್ದಾರೆ.

 "ಆರ್ಯನ್ ಇಂದು ಬಿಡುಗಡೆಯಾಗುವುದಿಲ್ಲ, ನಾಳೆ ಬಿಡುಗಡೆಯಾಗುತ್ತಾರೆ" ಎಂದು ಜೈಲಿನ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

26 ದಿನಗಳ ಕಾಲ ಬಂಧನದಲ್ಲಿದ್ದ ಆರ್ಯನ್ ಖಾನ್ ಗೆ  ಅಕ್ಟೋಬರ್ 28 ರಂದು ಜಾಮೀನು ನೀಡಲಾಯಿತು. ಪ್ರಕರಣದ ಇತರ ಇಬ್ಬರು ಆರೋಪಿಗಳಾದ ಅರ್ಬಾಝ್  ಮರ್ಚೆಂಟ್ ಹಾಗೂ  ಮುನ್‌ಮುನ್ ಧಮೇಚಾ ಅವರಿಗೂ ಜಾಮೀನು ನೀಡಲಾಗಿದೆ.

ಜೈಲಿನ ಅಧಿಕಾರಿಗಳ ಪ್ರಕಾರ, ಜೈಲಿನಲ್ಲಿ ಕಾಗದಪತ್ರದ  ಕೆಲಸಕ್ಕಾಗಿ ಶುಕ್ರವಾರ ಸಂಜೆ 5.30 ರ ಗಡುವು ತಪ್ಪಿಸಿಕೊಂಡಿರುವುದರಿಂದ ಆರ್ಯನ್ ಖಾನ್ ಶನಿವಾರವಷ್ಟೇ ಆರ್ಥರ್ ರೋಡ್ ಜೈಲಿನಿಂದ ಬಿಡುಗಡೆಯಾಗಲಿದ್ದಾರೆ. ಗುರುವಾರ ಜಾಮೀನು ಪಡೆದ ಆರ್ಯನ್ ಖಾನ್ ಶುಕ್ರವಾರ ಜೈಲಿನಿಂದ ಹೊರಬರುವ ನಿರೀಕ್ಷೆಯಲ್ಲಿದ್ದರು. ಆದರೆ ವಿಧಿವಿಧಾನಗಳಿಗೆ ಸಮಯ ತೆಗೆದುಕೊಂಡಿದ್ದು  ಸಂಜೆ 5:30 ರ ಮೊದಲು ಪೂರ್ಣಗೊಳಿಸಲು ಸಾಧ್ಯವಾಗಲಿಲ್ಲ, ಇದರಿಂದಾಗಿ ಅವರು ಜೈಲಿನಲ್ಲಿ ಮತ್ತೊಂದು ರಾತ್ರಿ ಕಳೆಯಬೇಕಾಗಿದೆ.

1 ಲಕ್ಷ ರೂಪಾಯಿ ಜಾಮೀನು ಬಾಂಡ್ ಗೆ ಸಹಿ ಹಾಕಿದ ಜೂಹಿ ಚಾವ್ಲಾ

ಬಾಂಬೆ ಹೈಕೋರ್ಟ್ ಜಾಮೀನು ಷರತ್ತುಗಳನ್ನು ಸ್ಪಷ್ಟಪಡಿಸಿದ ನಂತರ ನಟಿ ಜೂಹಿ ಚಾವ್ಲಾ ಶುಕ್ರವಾರ ಸಂಜೆ ವಿಶೇಷ ಎನ್ ಡಿಪಿಎಸ್  (ನಾರ್ಕೋಟಿಕ್ ಡ್ರಗ್ಸ್ ಹಾಗೂ  ಸೈಕೋಟ್ರೋಪಿಕ್ ಸಬ್ಸ್ಟೆನ್ಸಸ್) ನ್ಯಾಯಾಲಯಕ್ಕೆ ತೆರಳಿದರು. ಶಾರುಖ್ ಖಾನ್ ಅವರ ಪುತ್ರ  ಆರ್ಯನ್ ಖಾನ್ ಬಿಡುಗಡೆಗಾಗಿ ಬಾಲಿವುಡ್ ನಟಿ ಜೂಹಿ ಚಾವ್ಲಾ 1 ಲಕ್ಷ ರೂಪಾಯಿ ಜಾಮೀನು ಬಾಂಡ್‌ಗೆ ಸಹಿ ಹಾಕಿದರು. ಬಾಂಬೆ ಹೈಕೋರ್ಟ್ ಶುಕ್ರವಾರ ಆರ್ಯನ್ ಖಾನ್ ಅವರನ್ನು 1 ಲಕ್ಷ ರೂಪಾಯಿಗಳ ವೈಯಕ್ತಿಕ ಬಾಂಡ್‌ನಲ್ಲಿ ಅದೇ ಮೊತ್ತದ ಒಂದು ಅಥವಾ ಇಬ್ಬರು ಶ್ಯೂರಿಟಿಗಳೊಂದಿಗೆ ಬಿಡುಗಡೆ ಮಾಡಬೇಕೆಂದು ತೀರ್ಪು ನೀಡಿತ್ತು.

ಶಾರುಖ್ ಖಾನ್ ಅವರ ಆಪ್ತ ಸ್ನೇಹಿತೆ  ಹಾಗೂ ಒಟ್ಟಿಗೆ ಸಾಲು ಸಾಲು ಚಿತ್ರಗಳಲ್ಲಿ ನಟಿಸಿರುವ ಬಾಲಿವುಡ್ ನಟಿ ಜೂಹಿ ಚಾವ್ಲಾ ಆರ್ಯನ್ ಖಾನ್‌ಗೆ ಶ್ಯೂರಿಟಿ ನೀಡಿದರು ಎಂದು ಆರ್ಯನ್ ಖಾನ್ ಅವರ ವಕೀಲ ಸತೀಶ್ ಮಾನೆಶಿಂಧೆ ಹೇಳಿದ್ದಾರೆ.