"ಎಲ್ ಪಿಜಿ ಸಿಲಿಂಡರ್ ಬೆಲೆ ಕೂಡ ಇಳಿಕೆ ಮಾಡಿ": ಕೇಂದ್ರ ಸರಕಾರಕ್ಕೆ ಮೇನಕಾ ಗಾಂಧಿ ಮನವಿ

ಹೊಸದಿಲ್ಲಿ, ನ. 7: ಪೆಟ್ರೋಲ್ ಹಾಗೂ ಡೀಸೆಲ್ ಬೆಲೆ ಕಡಿತವನ್ನು ಶನಿವಾರ ಸ್ವಾಗತಿಸಿರುವ ಕೇಂದ್ರದ ಮಾಜಿ ಸಚಿವೆ ಹಾಗೂ ಸುಲ್ತಾನ್ ಪುರದ ಸಂಸದೆ ಮೇನಕಾ ಗಾಂಧಿ, ಎಲ್ ಪಿಜಿ ಸಿಲಿಂಡರ್ ಗಳ ಬೆಲೆಯನ್ನು ಕೂಡ ಕಡಿತಗೊಳಿಸುವಂತೆ ಆಗ್ರಹಿಸಿದ್ದಾರೆ. ನಾಲ್ಕು ದಿನಗಳ ಭೇಟಿಗಾಗಿ ತನ್ನ ಲೋಕಸಭಾ ಕ್ಷೇತ್ರವಾದ ಸುಲ್ತಾನ್ಪುರಕ್ಕೆ ಆಗಮಿಸಿದ ಮೇನಕಾ ಗಾಂಧಿ ಪ್ರವಾಸದ ಸಂದರ್ಭ ಕೇಂದ್ರ ಸರಕಾರದಲ್ಲಿ ಈ ಮನವಿ ಮಾಡಿದ್ದಾರೆ. 

‘‘ಪೆಟ್ರೋಲ್ ಹಾಗೂ ಡೀಸೆಲ್ ಬೆಲೆ ಇಳಿಕೆಯಾಗಿದೆ. ಜನರಿಗೆ ಪರಿಹಾರ ಒದಗಿಸಲು ಎಲ್ಪಿಜಿ ಸಿಲಿಂಡರ್ಗಳ ಬೆಲೆಯನ್ನು ಕೂಡ ಇಳಿಕೆ ಮಾಡುವ ಬಗ್ಗೆ ಕೂಡ ಕೇಂದ್ರ ಸರಕಾರ ಪರಿಶೀಲಿಸಬೇಕು’’ ಎಂದು ಅವರು ತನ್ನ ಕ್ಷೇತ್ರದಲ್ಲಿ ನಡೆದ ಕಾರ್ಯಕ್ರಮದ ಸಂದರ್ಭ ಹೇಳಿದರು. ಕೇಂದ್ರ ಸರಕಾರ ಪೆಟ್ರೋಲ್ ಹಾಗೂ ಡೀಸೆಲ್ ನ ಎಕ್ಸೈಸ್ ಸುಂಕವನ್ನು ಅನುಕ್ರಮವಾಗಿ 5 ರೂ. ಹಾಗೂ 10 ರೂ. ಕಡಿತಗೊಳಿಸಿದ ಹಾಗೂ ಅದನ್ನು ಅನುಸರಿಸಿ ಬಿಜೆಪಿ ಆಡಳಿತ ಇರುವ ರಾಜ್ಯಗಳು ಕೂಡ ಎರಡೂ ತೈಲಗಳ ಮೇಲಿನ ವ್ಯಾಟ್ ಅನ್ನು ಇಳಿಕೆ ಮಾಡುವ ಮೂಲಕ ಸಾಮಾನ್ಯ ಜನರಿಗೆ ನೇರವಾದ ಬಳಿಕ ಬಳಿಕ ಮೇನಕಾ ಗಾಂಧಿ ಅವರು ಈ ಹೇಳಿಕೆ ನೀಡಿದ್ದಾರೆ. 

ಇಸೌಲಿ ವಿಧಾನ ಸಭಾ ವಿಭಾಗದ ದಿಲ್ಲಿ ಬಝಾರ್ ಟೌನ್ಶಿಫ್ನಲ್ಲಿ ತನ್ನ ಪಕ್ಷದ ಸದಸ್ಯತ್ಯ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಮಾತನಾಡಿದ ಮೇನಕಾ ಗಾಂಧಿ, ‘‘ನಮ್ಮ ಪರಿಶ್ರಮದಿಂದ ಇಸೌಲಿಯಲ್ಲಿ ಪಕ್ಷ ಜಯ ಗಳಿಸಲಿದೆ. ನಾನು ಎಲ್ಲಿಗೆಲ್ಲ ಹೋಗುತ್ತೇನೆಯೋ, ಅಲ್ಲೆಲ್ಲಾ ಸದಸ್ಯರನ್ನು ಮಾಡುತ್ತೇನೆ. 100 ದಿನಗಳಲ್ಲಿ 100 ಕಾರ್ಯಕ್ರಮಗಳು ನಡೆಯಲಿವೆ’’ ಎಂದರು. 

‘‘ನಾವು ಚುನಾವಣೆಯಲ್ಲಿ ಗೆಲ್ಲಬೇಕು. ಈ ಹಿಂದೆ ಕೂಡ ನಾವು ಲಕ್ಷಾಂತರ ಸದಸ್ಯರನ್ನು ಮಾಡಿದ್ದೆವು. ಆದರೆ, ಜಿಲ್ಲಾ ಪರಿಷತ್ನಲ್ಲಿ ಒಂದು ಸ್ಥಾನ ಮಾತ್ರ ದೊರಕಿತು. ಒಂದು ವೇಳೆ ಬಿಜೆಪಿಯ ಪದಾಧಿಕಾರಿಗಳು ಮಾತ್ರ ಮತ ಚಲಾಯಿಸಿದರೂ ನಾವು ಜಯ ಗಳಿಸಲಿದ್ದೇವೆ. ಒಂದು ವೇಳೆ ಬೂತ್ ಅಧ್ಯಕ್ಷ, ಅವರ ಕುಟುಂಬ, ಅವರ ಸಂಬಂಧಿಕರು ಮತ ನೀಡಿದರೂ ನಾವು ಜಯ ಗಳಿಸಲಿದ್ದೇವೆ.’’ ಎಂದು ಅವರು ಪಂಚಾಯತ್ ಚುನಾವಣೆಯನ್ನು ಉಲ್ಲೇಖಿಸಿ ಹೇಳಿದರು.