ಪತ್ನಿಗಾಗಿ ತಾಜ್ಮಹಲ್ ಹೋಲುವ ಮನೆ ಕಟ್ಟಿಸಿದ ಶಿಕ್ಷಣತಜ್ಞ !
ಭೋಪಾಲ್: ಮಧ್ಯಪ್ರದೇಶದ ಪಟ್ಟಣದಲ್ಲಿ ವ್ಯಕ್ತಿಯೊಬ್ಬರು ತನ್ನ ಪತ್ನಿಗೆ ಉಡುಗೊರೆಯಾಗಿ ತಾಜ್ಮಹಲ್ ಕಟ್ಟಡವನ್ನೇ ಹೋಲುವ ಮನೆಯೊಂದನ್ನು ಕಟ್ಟಿಸಿದ್ದಾರೆ!
ಬುರ್ಹಾನ್ಪುರ ಮೂಲದ ಶಿಕ್ಷಣ ತಜ್ಞ, ಆಸ್ಪತ್ರೆ ಹಾಗೂ ಶಾಲೆಯ ಮಾಲಕ ಆನಂದ್ ಪ್ರಕಾಶ್ ಚೋಕ್ಸಿ ತಮ್ಮ ಶಾಲೆಯ ಸಮೀಪ ತಾಜ್ಮಹಲ್ ಕಟ್ಟಡವನ್ನೇ ಹೋಲುವ ಕಟ್ಟಡವನ್ನು ನಿರ್ಮಿಸಿ, ಪತ್ನಿ ಮಂಜೂಷಾ ಚೋಕ್ಸಿಗೆ ಉಡುಗೊರೆಯಾಗಿ ನೀಡಿದ್ದಾರೆ.
"ಈ ಮನೆ ಆಗ್ರಾದ ವಿಶ್ವವಿಖ್ಯಾತ ಐತಿಹಾಸಿಕ ಸ್ಮಾರಕ ಎನಿಸಿದ ತಾಜ್ಮಹಲ್ನ ಮೂರನೇ ಒಂದರಷ್ಟು ದೊಡ್ಡದಿದೆ. ಮೂರು ವರ್ಷದ ಹಿಂದೆ ನಾನು ಹಾಗೂ ಪತ್ನಿ ತಾಜ್ಮಹಲ್ಗೆ ಭೇಟಿ ನೀಡಿದ್ದೇ ಈ ಪ್ರತಿಕೃತಿ ನಿರ್ಮಾಣಕ್ಕೆ ಸ್ಫೂರ್ತಿ. ಇದರ ವಾಸ್ತುಶಿಲ್ಪವನ್ನು ನಾವು ಅಧ್ಯಯನ ಮಾಡಿ, ವಿವರಗಳನ್ನು ಗಮನಿಸುವಂತೆ ಎಂಜಿನಿಯರ್ಗಳಿಗೆ ಸೂಚಿಸಿದೆವು. ಬುರ್ಹಾನ್ಪುರ ಮತ್ತು ಹೊರಗಿನ ಕುಶಲಕರ್ಮಿಗಳು ಸುಮಾರು ಎರಡೂವರೆ ವರ್ಷ ಕೆಲಸ ಮಾಡಿ ತಾಜ್ಮಹಲ್ ಕಟ್ಟಡವನ್ನೇ ಹೋಲುವ ಮನೆ ನಿರ್ಮಾಣವನ್ನು ಪೂರ್ಣಗೊಳಿಸಿದರು. ಇದೀಗ ಈ ಮನೆ, ಆಗ್ರಾಗೆ ಪ್ರಯಾಣ ಬೆಳೆಸಲು ಶಕ್ತರಾಗದ ಪ್ರವಾಸಿಗಳಿಗೆ ಮತ್ತು ವಿವಾಹಪೂರ್ವ ಚಿತ್ರೀಕರಣಕ್ಕೆ ತಾಣಗಳನ್ನು ಹುಡುಕುವ ಯುವ ಜೋಡಿಗಳಿಗೆ ಇದು ಪ್ರಮುಖ ಆಕರ್ಷಣೆಯಾಗಲಿದೆ" ಎಂದು ಚೋಕ್ಸಿ ಹೇಳಿದರು.
55-60 ಅಡಿ ಎತ್ತರದ (ಮೂಲವಾಗಿ 80 ಅಡಿ ಎತ್ತರದ ಕಟ್ಟಡ ನಿರ್ಮಿಸುವ ಉದ್ದೇಶವಿತ್ತು. ಆದರೆ ಸ್ಥಳೀಯ ಪ್ರಾಧಿಕಾರ ಅನುಮತಿ ನೀಡಲಿಲ್ಲ) ಈ ಕಟ್ಟಡ ದೊಡ್ಡದಾದ ಹಜಾರ, ನಾಲ್ಕು ಶಯನಗೃಹಗಳು, ಒಂದು ವಿಶಾಲವಾದ ಪಾಕಶಾಲೆ ಮತ್ತು ಧ್ಯಾನಕ್ಕಾಗಿ ಒಂದು ಹಜಾರವನ್ನು ಹೊಂದಿದೆ.
ತಾಜ್ಮಹಲ್ ಹೋಲುವ ಮನೆಯ ಮಾದರಿಯನ್ನು ನಿರ್ಮಿಸಿದ ಎಂಜಿನಿಯರ್ ಪ್ರವೀಣ್ ಚೋಕ್ಸಿ ಹೇಳುವಂತೆ, "ನಮ್ಮ ತಂಡಕ್ಕೆ ತಾಜ್ಮಹಲ್ನ ವಿವರವಾದ ವಿನ್ಯಾಸವನ್ನು ಅಧ್ಯಯನ ಮಾಡಲು ಸುಮಾರು ಒಂದು ತಿಂಗಳು ತಗುಲಿತು. ಬಳಿಕ ನಾಲ್ಕು ವಾರಗಳ ಪ್ಲಾನ್ ಸಿದ್ಧಪಡಿಸಲಾಯಿತು. ಅನುಭವಿ ಗುತ್ತಿಗೆದಾರ ಮುಸ್ತಾಕ್ ಭಾಯ್ ಅವರ ಮಾರ್ಗದರ್ಶನದಲ್ಲಿ ಬುರ್ಹಾನ್ಪುರ ಮತ್ತು ಹೊರಗಿನ ಕುಶಲಕರ್ಮಿಗಳು ಈ ಕನಸಿನ ಯೋಜನೆಯನ್ನು ಎರಡೂವರೆ ವರ್ಷಗಳಲ್ಲಿ ಮುಗಿಸಿದರು"
ಇಂಧೋರ್ ಮತ್ತು ಪಶ್ಚಿಮ ಬಂಗಾಳದಿಂದ ಆಗಮಿಸಿದ ಕುಶಲಕರ್ಮಿಗಳು ಸಿಮೆಂಟಿನ ಕೆತ್ತನೆಗಳನ್ನು ಮಾಡಿದ್ದರೆ ಮಕ್ರಾನಾದಿಂದ ತಂದ ಅಮೃತಶಿಲೆಯ ಆಕರ್ಷಕ ಕೆತ್ತನೆಗಳನ್ನು ರಾಜಸ್ಥಾನದ ಕುಶಲಕರ್ಮಿಗಳು ಮಾಡಿದ್ದಾರೆ. ಆಗ್ರಾದ ಕುಶಲಕರ್ಮಿಗಳು ನೆಲಹಾಸು ಅಳವಡಿಸಿದ್ದಾರೆ. ಪೀಠೋಪಕರಣ ಮತ್ತು ಒಳಾಂಗಣ ವಿನ್ಯಾಸವನ್ನು ಮುಂಬೈ ಹಾಗೂ ಸೂರತ್ನಿಂದ ಬಂದ ತಂಡಗಳು ನಿರ್ವಹಿಸಿವೆ ಎಂದು ವಿವರಿಸಿದ್ದಾರೆ.
