ಬೆಲೆ ಏರಿಕೆಯಂತಹ ನೈಜ ಸಮಸ್ಯೆಗಳಿಂದ ಗಮನ ಬೇರೆಡೆ ಸೆಳೆಯಲು ಸರಕಾರ ಯತ್ನ:ಕಾಂಗ್ರೆಸ್

ಹೊಸದಿಲ್ಲಿ: ಸಾಮಾನ್ಯ ಜನರು ಎದುರಿಸುತ್ತಿರುವ ಬೆಲೆ ಏರಿಕೆಯಂತಹ ನೈಜ ಸಮಸ್ಯೆಗಳಿಂದ ಜಾತಿ ಹಾಗೂ ಧರ್ಮದಂತಹ ಅಪ್ರಸ್ತುತ ವಿಚಾರಗಳತ್ತ ದೇಶದ ಗಮನವನ್ನು ತಿರುಗಿಸಲು ಬಿಜೆಪಿ ಸರಕಾರ ಪ್ರಯತ್ನಿಸುತ್ತಿದೆ ಎಂದು ಕಾಂಗ್ರೆಸ್ ಮಂಗಳವಾರ ದಿಲ್ಲಿಯಲ್ಲಿ ಆರೋಪಿಸಿದೆ.

ಪಕ್ಷದ ನಾಯಕ ರಾಹುಲ್ ಗಾಂಧಿ ಅವರು ಬಟ್ಟೆ ಮತ್ತು ಕೆಲವು ಸರಕುಗಳ ಮೇಲಿನ ಜಿಎಸ್‌ಟಿ ಹೆಚ್ಚಳದ ವಿಷಯವನ್ನು ಪ್ರಸ್ತಾಪಿಸಿದರು ಮತ್ತು ಬಿಜೆಪಿಯ ಚುನಾವಣಾ ಘೋಷಣೆಯಾದ 'ಅಚ್ಚೇ ದಿನ್' ನ ವಾಸ್ತವವನ್ನು ನಿರಂತರವಾಗಿ "ಬಹಿರಂಗಪಡಿಸಲಾಗುತ್ತಿದೆ" ಎಂದು ಪ್ರತಿಪಾದಿಸಿದರು.

''140ರಷ್ಟು ಜಿಎಸ್‌ಟಿ ಹೆಚ್ಚಳ, ‘ಅಚ್ಛೇ ದಿನ್’ಬಹಿರಂಗವಾಗುತ್ತಲೇ ಇದೆ’’ ಎಂದು ‘ಲೂಟ್’ ಎಂಬ ಹ್ಯಾಶ್‌ಟ್ಯಾಗ್‌ ಬಳಸಿ ಹಿಂದಿಯಲ್ಲಿ ಟ್ವೀಟ್ ಮಾಡಿದ್ದಾರೆ.

ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಪ್ರಿಯಾಂಕಾ ಗಾಂಧಿ ವಾದ್ರಾ ಅವರು ಬೆಲೆ ಏರಿಕೆಯ ಬಗ್ಗೆ ಸರಕಾರವನ್ನು ಟೀಕಿಸಿದರು. ಗೋಧಿ ಹಿಟ್ಟು, ಮೊಬೈಲ್ ಡೇಟಾ, ಜೀವ ವಿಮೆಯಿಂದ ಬಟ್ಟೆ, ಶೂ, ತರಕಾರಿಗಳು ಹಾಗೂ ಬೇಳೆಕಾಳುಗಳವರೆಗೆ ಎಲ್ಲವೂ ದುಬಾರಿಯಾಗಿದೆ ಹಾಗೂ  ಜೀವನವು ದುಬಾರಿಯಾಗಿದೆ ಎಂದು ಹೇಳಿದರು.

"ಮೋದೀಜಿಯವರ ಆಡಳಿತದಲ್ಲಿ ದುಬಾರಿ ಮಾಡದಿರುವುದು ಯಾವುದೂ ಉಳಿದಿಲ್ಲ. 'ಬಹುತ್ ಹುಯಿ ಮೆಹಂಗೈ ಕಿ ಮಾರ್' ಎಂಬ  ಘೋಷಣೆಯನ್ನು ನೀಡಿದವರು ಈಗ ಬೆಲೆ ಏರಿಕೆ ಮತ್ತು ಹಣದುಬ್ಬರದಿಂದ ಸಾರ್ವಜನಿಕರ ಮೇಲೆ ದಿನನಿತ್ಯ ದಾಳಿ ನಡೆಸುತ್ತಿದ್ದಾರೆ" ಎಂದು ಹಿಂದಿಯಲ್ಲಿ ಟ್ವೀಟ್ ಮಾಡಿದ್ದಾರೆ. 

ದಿನಬಳಕೆಯ ವಸ್ತುಗಳ ಬೆಲೆ ಗಗನಕ್ಕೇರಿದ್ದು ಇದರಿಂದ ಜನಸಾಮಾನ್ಯರು ತೊಂದರೆ ಅನುಭವಿಸುತ್ತಿದ್ದಾರೆ ಎಂದು ಕಾಂಗ್ರೆಸ್ ವಕ್ತಾರ ಪವನ್ ಖೇರಾ ಆರೋಪಿಸಿದ್ದಾರೆ.

"ಅಡುಗೆಮನೆಯಲ್ಲಿ ಸೆಕ್ಷನ್ 144 ಇದೆ ಎಂದು ತೋರುತ್ತಿದೆ. ನೀವು ನಾಲ್ಕು ಟೊಮ್ಯಾಟೊ ಅಥವಾ ಈರುಳ್ಳಿಗಿಂತ ಹೆಚ್ಚು ಇಡುವಂತಿಲ್ಲ" ಎಂದು ಅವರು ಬೆಲೆ ಏರಿಕೆಯನ್ನು ಉಲ್ಲೇಖಿಸಿ ಹೇಳಿದರು.

“ಸರಕಾರವು ಜನರ ಗಮನವನ್ನು  ನೈಜ ಸಮಸ್ಯೆಗಳಿಂದ ಅಪ್ರಸ್ತುತ ವಿಷಯಗಳತ್ತ ಬೇರೆಡೆಗೆ ಸೆಳೆಯಲು ಏಕೆ ಪ್ರಯತ್ನಿಸುತ್ತಿದೆ. ತನ್ನ ವೈಫಲ್ಯಗಳನ್ನು ಮರೆಮಾಚುವ ಮೂಲಕ ಈ ಸರಕಾರವು ದೇಶದ ಎಲ್ಲರ ಗಮನವನ್ನು ಹೈಜಾಕ್ ಮಾಡಲು ನಾವು ಬಿಡುವುದಿಲ್ಲ"ಎಂದು ಅವರು ಸುದ್ದಿಗಾರರಿಗೆ ತಿಳಿಸಿದರು.

ಮೋದಿಯವರ 7.5 ವರ್ಷಗಳು ತಪ್ಪುಗಳ ಸುದೀರ್ಘ ಸರಪಳಿಯಾಗಿದೆ.  ಕೆಲವೊಂದು ಒಪ್ಪಿಕೊಂಡಿದ್ದಾರೆ ಮತ್ತು ಕೆಲವನ್ನು ಅರಿತುಕೊಂಡಿದ್ದಾರೆ ಹಾಗೂ ಇನ್ನೂ ಕೆಲವು ಏನೂ ಮಾಡಿಲ್ಲ. ಮೋದಿಯವರ ಈ ಸರಣಿ ತಪ್ಪುಗಳಿಗೆ ದೇಶ ಏಕೆ ಬೆಲೆ ತೆರಬೇಕು?" ಎಂದು ಅವರು ಪ್ರಶ್ನಿಸಿದರು.