ಧಾರ್ಮಿಕ ವ್ಯವಹಾರಗಳ ಮೇಲೆ ಸರಕಾರದ ಬಿಗಿ ನಿಯಂತ್ರಣ: ಚೀನಾ ಅಧ್ಯಕ್ಷ ಕ್ಸಿ ಜಿಂಪಿಂಗ್ ಕರೆ

ಬೀಜಿಂಗ್, ಡಿ.6: ದೇಶದ ಭದ್ರತೆಗೆ ಕಸುವು ತುಂಬುವ ಉದ್ದೇಶದಿಂದ ಧಾರ್ಮಿಕ ವ್ಯವಹಾರಗಳ ಮೇಲೆ ಸರಕಾರದ ನಿಯಂತ್ರಣವನ್ನು ಬಿಗಿಗೊಳಿಸಲು ಹೆಚ್ಚಿನ ಕ್ರಮಗಳ ಅಗತ್ಯವಿದೆ ಮತ್ತು ಧಾರ್ಮಿಕ ನಂಬಿಕೆಗಳನ್ನು ಚೀನಾ ಸಂಸ್ಕೃತಿಯ ಪ್ರಭಾವದಡಿ ತರುವ ಅಗತ್ಯವಿದೆ ಎಂದು ಚೀನಾದ ಅಧ್ಯಕ್ಷ ಕ್ಸಿ ಜಿಂಪಿಂಗ್ ಹೇಳಿದ್ದಾರೆ. 

2019ರಲ್ಲಿ ಚೀನಾ ಸರಕಾರ ಪ್ರಕಟಿಸಿರುವ ಶ್ವೇತಪತ್ರದ ಪ್ರಕಾರ, ದೇಶದಲ್ಲಿ ಸುಮಾರು 200 ಮಿಲಿಯನ್ ಧಾರ್ಮಿಕ ಅನುಯಾಯಿಗಳಿದ್ದು ಇವರಲ್ಲಿ ಟಿಬೆಟ್ ನ ಬೌದ್ಧ ಧರ್ಮೀಯರು ಹೆಚ್ಚಿನ ಸಂಖ್ಯೆಯಲ್ಲಿದ್ದಾರೆ. ಉಳಿದಂತೆ 20 ಮಿಲಿಯನ್ ಮುಸ್ಲಿಮರು, 38 ಮಿಲಿಯನ್ ಪ್ರೊಟೆಸ್ಟೆಂಟ್ ಕ್ರೈಸ್ತರು, 6 ಮಿಲಿಯನ್ ಕ್ಯಾಥೊಲಿಕ್ ಕೈಸ್ತರು ಇದ್ದಾರೆ. ಅಲ್ಲದೆ ಸುಮಾರು 1,40,000 ಪ್ರಾರ್ಥನಾ ಮಂದಿರಗಳಿವೆ. ಕ್ಸಿನ್‌ಜಿಯಾಂಗ್ ಪ್ರಾಂತದಲ್ಲಿ ಉಯಿಗರ್ ಮುಸ್ಲಿಮರ ವಿರುದ್ಧ ಚೀನಾ ಅನುಸರಿಸುವ ದಮನಕಾರಿ ನೀತಿ ಜನಾಂಗಹತ್ಯೆಗೆ ಕಾರಣವಾಗುತ್ತಿದೆ ಎಂಬ ಆರೋಪವಿದೆ. ಧರ್ಮಗಳನ್ನು ಚೀನಾದ ಸಂಸ್ಕೃತಿಯ ಪ್ರಭಾವದಡಿ ತರಬೇಕಿದೆ. 

ಸೈದ್ಧಾಂತಿಕವಾಗಿ ನಾಸ್ತಿಕವಾಗಿ ಉಳಿದಿರುವ ಚೀನಾ ಕಮ್ಯುನಿಸ್ಟ್ ಪಕ್ಷದ ಮಾರ್ಗದರ್ಶನದಡಿ ಕಾರ್ಯ ನಿರ್ವಹಿಸುವಂತೆ ದಿಗ್ದರ್ಶನ ನೀಡಬೇಕಾಗಿದೆ. ಧಾರ್ಮಿಕ ಮುಖಂಡರ ಪ್ರಜಾಸತ್ತಾತ್ಮಕ ಮೇಲ್ವಿಚಾರಣೆ ಸುಧಾರಿಸುವ ಅಗತ್ಯವಿದೆ ಮತ್ತು ಧಾರ್ಮಿಕ ಕಾರ್ಯಗಳನ್ನು ದೇಶದ ಕಾನೂನಿನ ವ್ಯಾಪ್ತಿಯೊಳಗೆ ತರಬೇಕಿದೆ. ಆನ್‌ಲೈನ್  ಮೂಲಕ ನಡೆಯುವ ಧಾರ್ಮಿಕ ವ್ಯವಹಾರಗಳನ್ನು ಚೀನಾದ ತತ್ವಗಳಡಿ ತರಬೇಕಾಗಿದೆ ಎಂದು ಧಾರ್ಮಿಕ ವ್ಯವಹಾರಗಳ ಕುರಿತು ನಡೆದ ಸಮಾವೇಶದಲ್ಲಿ ಕ್ಸಿ ಜಿಂಪಿಂಗ್ ಪ್ರತಿಪಾದಿಸಿದ್ದಾರೆ. 

ಧಾರ್ಮಿಕ ನಂಬಿಕೆಯ ಸ್ವಾತಂತ್ರ್ಯದ ಕುರಿತು ಪಕ್ಷದ ನೀತಿಯನ್ನು ಸಂಪೂರ್ಣವಾಗಿ ಮತ್ತು ನಿಷ್ಟೆಯಿಂದ ಜಾರಿಗೆ ತರಬೇಕು. ಧಾರ್ಮಿಕ ವಲಯಗಳ ಜನರು ಮತ್ತು ಧಾರ್ಮಿಕ ಭಕ್ತರೊಂದಿಗೆ ಸರಕಾರವನ್ನು ಸಂಪರ್ಕಿಸುವ ಸೇತುವೆಯಾಗಿ ಧಾರ್ಮಿಕ ಗುಂಪುಗಳು ಕಾರ್ಯನಿರ್ವಹಿಸಬೇಕು ಎಂದವರು ಹೇಳಿದರು. 2016ರ ಬಳಿಕ ಮೊದಲ ಬಾರಿಗೆ ನಡೆದ ಸಮಾವೇಶದಲ್ಲಿ ದೇಶದ ಉನ್ನತ ಮುಖಂಡರು ಪಾಲ್ಗೊಂಡಿದ್ದು ಮುಂದಿನ ಕೆಲ ವರ್ಷಗಳಲ್ಲಿ ಚೀನಾದ ಧಾರ್ಮಿಕ ವ್ಯವಹಾರ ಹಾಗೂ ಅದರ ನಿಯಂತ್ರಣ ಕ್ರಮದ ಬಗ್ಗೆ ಮಾನದಂಡವನ್ನು ರೂಪಿಸುವ ಚರ್ಚೆ ನಡೆಸಿದ್ದಾರೆ ಎಂದು ವರದಿಯಾಗಿದೆ.