ವಿದ್ಯುತ್ ಉತ್ಪಾದಕರಿಗೆ ಬಾಕಿ ಬಿಲ್ ಪಾವತಿಸಿ: ಹೈಕೋರ್ಟ್

ಬೆಂಗಳೂರು, ಡಿ.10: ವಿದ್ಯುತ್ ಖರೀದಿ ಒಪ್ಪಂದಗಳ ಅಡಿಯಲ್ಲಿ ಯಾವುದೇ ವಿಳಂಬವಿಲ್ಲದೆ ವಿದ್ಯುತ್ ಉತ್ಪಾದಕರಿಗೆ ಬಾಕಿ ಬಿಲ್ ಪಾವತಿಸಬೇಕೆಂದು ಹೈಕೋರ್ಟ್, ವಿದ್ಯುತ್ ಸರಬರಾಜು ಕಂಪೆನಿಗಳು ಹಾಗೂ ರಾಜ್ಯ ಸರಕಾರಕ್ಕೆ ನಿರ್ದೇಶನ ನೀಡಿದೆ.

ಇಂಧನ ಉತ್ಪಾದಿಸುವ ಹಲವು ಕಂಪೆನಿಗಳು ಸಲ್ಲಿಸಿದ್ದ ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಎಸ್.ಆರ್.ಕೃಷ್ಣಕುಮಾರ್ ಅವರಿದ್ದ ನ್ಯಾಯಪೀಠ, ಈ ನಿರ್ದೇಶನ ನೀಡಿದೆ.

ಎಸ್ಕಾಂಗಳ ಪರ ವಾದಿಸಿದ ವಕೀಲರು, ಗ್ರಾಮೀಣ ಸ್ಥಳೀಯ ಸಂಸ್ಥೆಗಳು, ನಗರ ಸ್ಥಳೀಯ ಸಂಸ್ಥೆಗಳು, ರಾಜ್ಯ ಸರಕಾರ ಹಾಗೂ ರೈತರಿಗೆ ನೀಡಿರುವ ವಿದ್ಯುತ್ ಸಬ್ಸಿಡಿ ಬಾಕಿ ಇನ್ನೂ ಎಸ್ಕಾಂಗಳಿಗೆ ಬಂದಿಲ್ಲ ಎಂದು ಪೀಠಕ್ಕೆ ತಿಳಿಸಿದರು. ವಕೀಲರ ವಾದ ಆಲಿಸಿದ ನ್ಯಾಯಪೀಠ, ವಿದ್ಯುತ್ ಉತ್ಪಾದಕರಿಗೆ ಬಾಕಿ ಬಿಲ್ ಪಾವತಿಸಲು ನಿರ್ದೇಶಿಸಿ ವಿಚಾರಣೆಯನ್ನು ಮುಂದೂಡಿತು.