ಕೋಟೇಶ್ವರ-ಸೋಮೇಶ್ವರ ರಾಜ್ಯ ಹೆದ್ದಾರಿ ಅಗಲೀಕರಣಕ್ಕೆ ತೊಡಕು; ಅನಧಿಕೃತ ಕಟ್ಟಡ ತೆರವಿಗೆ ಗ್ರಾಮಸ್ಥರಿಂದ ಪ್ರತಿಭಟನೆ

ಕುಂದಾಪುರ, ಡಿ.16:ಕೋಟೇಶ್ವರ-ಸೋಮೇಶ್ವರ ರಾಜ್ಯ ಹೆದ್ದಾರಿಯಲ್ಲಿ ಕಾಳಾವರ ಬಸ್ಸು ನಿಲ್ದಾಣದ ಸಮೀಪದ ದೀರ್ಘ ತಿರುವನ್ನು ವೈಜ್ಞಾನಿಕವಾಗಿ ನೆರಗೊಳಿಸುವ ಕಾರ್ಯವನ್ನು ಕುಂದಾಪುರ ಉಪವಿಭಾಗ ಹಮ್ಮಿಕೊಂಡಿದ್ದು, ಇದಕ್ಕೆ ಅಡ್ಡಿಯಾಗಿರುವ ಖಾಸಗಿಯವರ ಅನಧಿಕೃತ ಕಟ್ಟಡವನ್ನು ತೆರವು ಗೊಳಿಸುವಂತೆ ಒತ್ತಾಯಿಸಿ ಕಾಳಾವರ ಗ್ರಾಮಸ್ಥರು ಗುರುವಾರ ಕಾಳಾವರ ಬಸ್ ನಿಲ್ದಾಣ ಬಳಿ ಪ್ರತಿಭಟನೆ ನಡೆಸಿದರು.

ಪ್ರತಿಭಟನಕಾರರನ್ನು ಉದ್ದೇಶಿಸಿ ಮಾತನಾಡಿದನಿವೃತ್ತ ಮುಖ್ಯೋಪಾಧ್ಯಾಯ ರಾದ ರಘುವೀರ್ ಕೆ., ರಾಜ್ಯ ಹೆದ್ದಾರಿ ಅಗಲೀಕರಣಕ್ಕೆ ಅಡ್ಡಿಯಾಗಿರುವ ಖಾಸಗಿಯವರ ಅನಧಿಕೃತ ಕಟ್ಟಡಗಳು ಮತ್ತು ಮರಗಳನ್ನು ತೆರವುಗೊಳಿಸಲು ಸರಕಾರದ ಆದೇಶವಿದೆ. ಅದರಂತೆ ಒಂದು ಕಟ್ಟಡವನ್ನು ಸಂಪೂರ್ಣವಾಗಿ ತೆರವು ಗೊಳಿಸಲಾಗಿದೆ. ಆದರೆ ಪ್ರಭಾವಿಗಳಾದ ಇನ್ನೊಬ್ಬರ ಅನಧಿಕೃತ ಕಟ್ಟಡ ವನ್ನು ಪೂರ್ಣವಾಗಿ ತೆರವುಗೊಳಿಸದೇ ಅರ್ಧಭಾಗವನ್ನು ಹಾಗೆ ಉಳಿಸಲಾಗಿದೆ ಎಂದರು.

 ಇದರಿಂದಾಗಿ ರಸ್ತೆಯ ತಿರುವು ಬೇಕಾದಷ್ಟು ನೇರವಾಗಿಲ್ಲ. ಅಲ್ಲದೆ ಮುಂದಿ ನಿಂದ ಬರುವ ವಾಹನಗಳು ಕಾಣಿಸುವುದಿಲ್ಲ. ಇದು ಅಪಘಾತಕ್ಕೆ ಕಾರಣವಾ ಗಲಿದೆ. ಅಲ್ಲದೆ ಮುಖ್ಯರಸ್ತೆಯಿಂದ ವಕ್ವಾಡಿ ಅಡ್ಡರಸ್ತೆಗೆ ಸಂಪರ್ಕವೂ ಸಮರ್ಪಕ ವಾಗಿಲ್ಲ. ಇದರಿಂದ ರಸ್ತೆಯ ಅಂದಕ್ಕೆ ಕುಂದುಂಟಾಗಿದೆ. ಆದ್ದರಿಂದ ಅನಧಿಕೃತ ಕಟ್ಟಡವನ್ನು ಕೊಡಲೇ ತೆರವುಗೊಳಿಸಬೇಕು. ಒಂದು ವೇಳೆ ತೆರವುಗೊಳಿಸದಿದ್ದಲ್ಲಿ ಮುಂದಿನ ದಿನಗಳಲ್ಲಿ ಕಾನೂನಾತ್ಮಕವಾಗಿ ಹೋರಾಟ ಮಾಡಲಾಗುವುದು ಎಂದು ರಘುವೀರ್ ಕೆ.ಎಚ್ಚರಿಸಿದರು.

ಆದಿದ್ರಾವಿಡ ಅಭಿವೃದ್ಧಿ ಸಮಿತಿ ಅಧ್ಯಕ್ಷ ಮೋಹನ್‌ಚಂದ್ರ ಕಾಳಾವಕರ್ರ್ ಪ್ರಾಸ್ತಾವಿಕವಾಗಿ ಮಾತನಾಡಿ, ಸುಂದರ ಕಾಳಾವರ ಮಾಡಬೇಕೆಂದು ಹತ್ತು ವರ್ಷಗಳಿಂದ ಕನಸು ಕಂಡವರು ನಾವು. ಈ ಭಾಗದ ಎಲ್ಲಾ ಕಟ್ಟಡಗಳು ತೆರವುಗೊಂಡರೆ ಅಪಘಾತ ವಲಯವನ್ನು ತಪ್ಪಿಸಬಹುದು ಎಂಬ ನಿರೀಕ್ಷೆಯಲ್ಲಿ 10 ವರ್ಷಗಳ ಹಿಂದೆಯೇ ಕಾಳಾವರ ಗ್ರಾಮ ಪಂಚಾಯತ್ ಗೆ ಮನವಿಯನ್ನು ನೀಡಿದ್ದೇವೆ. ಅದಕ್ಕೆ ಗ್ರಾಪಂ ಸೂಕ್ತ ಸ್ಪಂದನೆ ಕೂಡ ನೀಡಿದೆ. ಆದರೆ 10 ವರ್ಷದ ನಂತರ ರಸ್ತೆ ಅಗಲೀಕರಣ ಸಂದರ್ಭ ಬಂದಾಗ ಇಲ್ಲಿ ಇರುವ ಕಟ್ಟಡವನ್ನು ತೆರವುಗೊಳಿಸುವ ಸಂದರ್ಭದಲ್ಲಿ ಕೆಲವೊಂದು ಪ್ರಭಾವಿಗಳಿಂದ ತೊಡಕುಗಳು ಎದುರಾಗಿದ್ದು, ಇದರಿಂದ ರಸ್ತೆ ಅಗಲೀಕರಣ ಕಾರ್ಯ ಸ್ಥಗಿತಗೊಂಡಿದೆ ಎಂದು ವಿವರಿಸಿದರು.

ಆದ್ದರಿಂದ ಎಲ್ಲಾ ಅನಧಿಕೃತ ಕಟ್ಟಡಗಳನ್ನು ತೆರವುಗೊಳಿಸಿದರೆ ನಿಜವಾಗಿ ಅಪಘಾತ ವಲಯವನ್ನು ತಪ್ಪಿಸಬಹುದು. ಅಡ್ಡಿ ಬರುವ ತೊಡಕುಗಳನ್ನು ದೂರ ಮಾಡುವ ಉದ್ದೇಶದಿಂದ ಇಂದು ಪ್ರತಿಭಟನೆಯನ್ನು ಹಮ್ಮಿಕೊಂಡಿದ್ದೇವೆ. ಇದಕ್ಕೆ ಊರ ಕೆಲವೊಂದು ಸಂಘ ಸಂಸ್ಥೆಗಳು ಬೆಂಬಲ ವ್ಯಕ್ತಪಡಿಸಿವೆ. ನಮ್ಮ ಉದ್ದೇಶ ಕಾಳಾವರವನ್ನು ಸುಂದರಗೊಳಿಸಿ,ಸುಂದರವಾದ ಬಸ್ ನಿಲ್ದಾಣ ಮತ್ತು ಶೌಚಾಲಯವನ್ನು ನಿರ್ಮಿಸುವುದಾಗಿದೆ ಎಂದರು.

ಪ್ರತಿಭಟನಕಾರರು ಅನಧಿಕೃತ ಕಟ್ಟಡ ತೆರವುಗೊಳಿಸಿ, ಅಪಘಾತವನ್ನು ತಪ್ಪಿಸಿ, ಬಡವರಿಗೊಂದು ನ್ಯಾಯ ಬಲಿಷ್ಠರಿಗೊಂದು ನ್ಯಾಯ ಬೇಡ, ಮೂಲ ಯೋಜನೆಯಂತೆ ಕಾಮಗಾರಿ ನಡೆಯಲಿ, ಕಾನೂನುಬದ್ಧ ಹೋರಾಟಕ್ಕೆ ಸಹಕರಿಸಿಎಂದು ಘೋಷಣೆ ಕೂಗಿದರು. ಸ್ಥಳಕ್ಕಾಗಮಿಸಿದ ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಪಾಂಡುರಂಗ ಶೇಟ್ ಅವರಿಗೆ ಮನವಿಯನ್ನು ಸಲ್ಲಿಸಲಾಯಿತು. ಈ ಸಂದರ್ಭದಲ್ಲಿ ಕಾಳವರ ಗ್ರಾಪಂ ಅಧ್ಯಕ್ಷೆ ಆಶಾಲತಾ ಶೆಟ್ಟಿ, ಗ್ರಾಪಂ ಸದಸ್ಯರಾದ ವಕ್ವಾಡಿ ರಮೇಶ್ ಶೆಟ್ಟಿ, ಜಯಪ್ರಕಾಶ್ ಶೆಟ್ಟಿ, ಜ್ಯೋತಿ ಮೊಗವೀರ ಉಪಸ್ಥಿತರಿದ್ದರು.

ಪ್ರತಿಭಟನೆಯಲ್ಲಿ ಎಸ್ಸಿ-ಎಸ್ಟಿ ಮೋರ್ಚಾದ ಅಧ್ಯಕ್ಷ ಮಹೇಶ್, ರಿಕ್ಷಾ ಚಾಲಕ ಮಾಲಕ ಸಂಘದ ಅಧ್ಯಕ್ಷ ಮಹಾಬಲ, ನಿವೃತ್ತ ಅಧ್ಯಾಪಕ ಸಂಜು ಮಾಸ್ಟರ್, ಕಾರ್ಮಿಕ ಸಂಘದ ಅಧ್ಯಕ್ಷ ಮೋನಪ್ಪ, ನಮ್ಮ ಶಕ್ತಿ ಮಹಿಳಾ ಮಂಡಲದ ಅಧ್ಯಕ್ಷೆ ಶಶಿಕಲಾ ಹಾಗೂ ಸ್ಥಳೀಯರು ಭಾಗಿಯಾಗಿದ್ದರು.