ಖ್ಯಾತ ಇಸ್ಲಾಮೀ ವಿದ್ವಾಂಸ, ಲೇಖಕ ಮೌಲಾನಾ ಮುಹಮ್ಮದ್ ಯೂಸುಫ್ ಇಸ್ಲಾಹಿ ನಿಧನ

ಹೊಸದಿಲ್ಲಿ, ಡಿ.21: ಖ್ಯಾತ ಇಸ್ಲಾಮೀ ವಿದ್ವಾಂಸ, ಲೇಖಕ ಹಾಗೂ ಜಮಾಅತೆ ಇಸ್ಲಾಮಿ ಹಿಂದ್ ಸಂಘಟನೆಯ ಹಿರಿಯ ನಾಯಕ ಮೌಲಾನಾ ಮುಹಮ್ಮದ್ ಯೂಸುಫ್ ಇಸ್ಲಾಹಿ ಅವರು ಮಂಗಳವಾರ ನಿಧನರಾಗಿದ್ದಾರೆ. ಅವರಿಗೆ 89 ವರ್ಷ ವಯಸ್ಸಾಗಿತ್ತು.

ಉತ್ತರ ಪ್ರದೇಶದವರಾದ ಮೌಲಾನಾ ಯೂಸುಫ್ ಇಸ್ಲಾಹಿಯವರು ಧಾರ್ಮಿಕ ಶಿಕ್ಷಣ ಸಂಸ್ಥೆಗಳ ಮುಖ್ಯಸ್ಥರಾಗಿ, ಉಪನ್ಯಾಸಕರಾಗಿ, ಹಲವಾರು ಮಹತ್ವದ ಇಸ್ಲಾಮಿ ಪುಸ್ತಕಗಳ ಲೇಖಕರಾಗಿ, ಧಾರ್ಮಿಕ ಆಂದೋಲನದ ನಾಯಕರಾಗಿ ಅಂತರ್ ರಾಷ್ಟ್ರೀಯ ಖ್ಯಾತಿ ಗಳಿಸಿದ್ದರು. ಅವರ ಅದಾಬೆ ಝಿಂದಗಿ (ಇಸ್ಲಾಮಿ ಶಿಷ್ಟಾಚಾರಗಳು) ಹಾಗೂ ಕುರ್ ಆನಿ ತಾಲೀಮಾತ್ (ಕುರ್ ಆನ್ ನ ಆಯ್ದ ಸೂಕ್ತಗಳು) ಕೃತಿಗಳು ಲಕ್ಷಾಂತರ ಪ್ರತಿಗಳ ಮುದ್ರಣ ಕಂಡು ದೇಶ ವಿದೇಶಗಳಲ್ಲಿ  ಜನರನ್ನು ತಲುಪಿವೆ.

ಮೌಲಾನಾ ಅವರು ಪ್ರತಿಷ್ಠಿತ ಜಮೀಯ್ಯತು ಸಾಲಿಹಾತ್ ಮಹಿಳೆಯರ ಶಿಕ್ಷಣ ಸಂಸ್ಥೆಯ ಮುಖ್ಯಸ್ಥರಾಗಿ, ಉರ್ದು ನಿಯತಕಾಲಿಕ ಝಿಕ್ರದ ಸಂಪಾದಕರಾಗಿ ಸೇವೆ ಸಲ್ಲಿಸಿದ್ದರು.