ಎಲ್ಲಾ ಕೊರೋನ ಪ್ರಬೇಧಗಳ ವಿರುದ್ಧ ಪರಿಣಾಮಕಾರಿಯಾಗುವ ಲಸಿಕೆ ಸಿದ್ಧ: ಅಮೆರಿಕದ ಸೇನಾ ಪ್ರಯೋಗಾಲಯದಲ್ಲಿ ಅಭಿವೃದ್ಧಿ
ಸಾಂದರ್ಭಿಕ ಚಿತ್ರ
ವಾಷಿಂಗ್ಟನ್, ಡಿ.22: ಕೊರೋನ ಸೋಂಕಿನ ನೂತನ ರೂಪಾಂತರಿ ಸೋಂಕು ಒಮೈಕ್ರಾನ್ ವಿರುದ್ಧದ ಹೋರಾಟದಲ್ಲಿ ಇಡೀ ವಿಶ್ವವೇ ನಿರತರಾಗಿರುವಂತೆಯೇ, ಕೊರೋನ ಸೋಂಕಿನ ಎಲ್ಲಾ ಪ್ರಬೇಧಗಳ ವಿರುದ್ಧವೂ ಪರಿಣಾಮಕಾರಿಯಾಗಿರುವ ಲಸಿಕೆಯನ್ನು ಅಭಿವೃದ್ಧಿಪಡಿಸಿರುವುದಾಗಿ ಅಮೆರಿಕದ ವಾಲ್ಟರ್ ರೀಡ್ ಆರ್ಮಿ ಇನ್ಸ್ಟಿಟ್ಯೂಟ್ ಆಫ್ ರಿಸರ್ಚ್ ಹೇಳಿದೆ.
ಈ ಕುರಿತು ಅಮೆರಿಕ ಸೇನೆ ಶೀಘ್ರವೇ ಅಧಿಕೃತವಾಗಿ ಘೋಷಣೆ ಮಾಡುವ ನಿರೀಕ್ಷೆಯಿದೆ. 2 ವರ್ಷದ ನಿರಂತರ ಸಂಶೋಧನೆಯ ಬಳಿಕ ಲಸಿಕೆಯನ್ನು ಅಭಿವೃದ್ಧಿಗೊಳಿಸಿದ್ದು ಈಗಿನ ಪರಿಸ್ಥಿತಿಯ ಹಿನ್ನೆಲೆಯಲ್ಲಿ ಲಸಿಕೆ ವಾರದೊಳಗೇ ಮಾರುಕಟ್ಟೆಗೆ ಬಿಡುಗಡೆಯಾಗಲಿದೆ ಎಂದು ವರದಿ ಹೇಳಿದೆ.
ಅಮೆರಿಕದ ಸೇನಾ ಪ್ರಯೋಗಾಲಯವು 2020ರ ಆರಂಭದಲ್ಲಿ ಕೋವಿಡ್-19 ಸೋಂಕಿನ ಪ್ರಥಮ ಡಿಎನ್ಎ ಸೀಕ್ವೆನ್ಸಿಂಗ್ ವರದಿ ಸಂಗ್ರಹಿಸಿದೆ. ಬಳಿಕ ವಾಲ್ಟರ್ ರೀಡ್ ಸಂಶೋಧನಾಲಯದ ಸಾಂಕ್ರಾಮಿಕ ರೋಗ ವಿಭಾಗವು ಕೊರೋನ ಸೋಂಕಿನ ಹಾಲಿ ಪ್ರಬೇಧ ಮಾತ್ರವಲ್ಲ, ಎಲ್ಲಾ ರೂಪಾಂತರಿಯ ವಿರುದ್ಧವೂ ಪರಿಣಾಮಕಾರಿಯಾಗುವ ಲಸಿಕೆ ಅಭಿವೃದ್ಧಿಪಡಿಸಲು ನಿರ್ಧರಿಸಿತು. ಹೀಗೆ ಅಭಿವೃದ್ಧಿ ಪಡಿಸಿದ ‘ ಸ್ಪೈಕ್ ಫೆರಿಟಿನ್ ನ್ಯಾನೊಪಾರ್ಟಿಸಿಲ್’ ಅಥವಾ ಎಸ್ಪಿಎಫ್ಎನ್ ಲಸಿಕೆಯನ್ನು ಈ ವರ್ಷ ಪ್ರಾಣಿಗಳ ಮೇಲೆ ಯಶಸ್ವಿಯಾಗಿ ಪ್ರಯೋಗಿಸಲಾಗಿದೆ.
ಮಾನವರ ಮೇಲಿನ ಪ್ರಯೋಗದ ಪ್ರಥಮ ಹಂತ ಈ ತಿಂಗಳು ನಡೆದಿದ್ದು ಒಮೈಕ್ರಾನ್ ಹಾಗೂ ಇತರ ಸೋಂಕಿನ ವಿರುದ್ಧ ಯಶಸ್ವಿ ಪರಿಣಾಮ ಬೀರಿದೆ. ಇದೀಗ ಲಸಿಕೆಯ ಪರೀಕ್ಷಾ ವರದಿಯ ಅಂತಿಮ ಪರಿಶೀಲನೆ ನಡೆಯುತ್ತಿದೆ ಎಂದು ವಾಲ್ಟರ್ ರೀಡ್ ಸಂಶೋಧನಾ ಕೇಂದ್ರದ ಸಾಂಕ್ರಾಮಿಕ ರೋಗ ವಿಭಾಗದ ನಿರ್ದೇಶಕ ಡಾ. ಕೆವಾನ್ ಮೊದ್ಜರಾಡ್ ಹೇಳಿದ್ದಾರೆ.
ಹಲವು ಕೊರೋನ ರೂಪಾಂತರಿ ವಿರುದ್ಧ ಖಾತರಿಯಾದ, ಪರಿಣಾಮಕಾರಿ ಮತ್ತು ದೀರ್ಘಕಾಲದ ರಕ್ಷಣೆ ನೀಡುವ ಸರ್ವ ಕೊರೋನ ವೈರಸ್ ಲಸಿಕೆ ತಂತ್ರಜ್ಞಾನ ಅಭಿವೃದ್ಧಿಗೊಳಿಸುವುದು ನಮ್ಮ ಕಾರ್ಯತಂತ್ರವಾಗಿತ್ತು. ಇದೀಗ ಈ ಯೋಜನೆ ಫಲ ನೀಡಿದ್ದು ಇದು ನಮ್ಮ ತಂಡದ ಎಲ್ಲಾ ಸದಸ್ಯರು ಮಾತ್ರವಲ್ಲ ಸಂಪೂರ್ಣ ಸೇನೆಯ ಶ್ರಮಕ್ಕೆ ದೊರೆತ ಯಶಸ್ಸಾಗಿದೆ.
ಪ್ರಯೋಗಕ್ಕೆ ಒಳಪಡುವವರು ಲಸಿಕೆ ಪಡೆದಿರಬಾರದು ಅಥವಾ ಈ ಹಿಂದೆ ಕೊರೋನ ಸೋಂಕಿಗೆ ಒಳಗಾಗಿರಬಾರದು ಎಂಬ ಕಾರಣದಿಂದ ಮನುಷ್ಯರ ಮೇಲಿನ ಪ್ರಯೋಗ ಹೆಚ್ಚಿನ ಸಮಯ ತೆಗೆದುಕೊಂಡಿತು. ಇದರ ಜತೆಗೆ ಡೆಲ್ಟಾ, ಒಮೈಕ್ರಾನ್ ಸೋಂಕು ಪ್ರಕರಣ ಹೆಚ್ಚಿದ್ದು ಮತ್ತಷ್ಟು ವಿಳಂಬಕ್ಕೆ ಕಾರಣವಾಯಿತು. ಒಮೈಕ್ರಾನ್ನಿಂದ ತಪ್ಪಿಸಿಕೊಳ್ಳುವ ಮಾರ್ಗವೇ ಇಲ್ಲ ಎನ್ನಬಹುದು. ಆದ್ದರಿಂದ ಬಹುಬೇಗ ಇಡೀ ವಿಶ್ವದ ಜನತೆ ಲಸಿಕೆ ಹಾಕಿಸಿಕೊಳ್ಳಬಹುದು ಅಥವಾ ಸೋಂಕಿಗೆ ಒಳಗಾಗಬಹುದು ಎಂದು ಡಾ. ಕೆವಾನ್ ಮೊದ್ಜರಾಡ್ ಅಭಿಪ್ರಾಯ ಪಟ್ಟಿದ್ದಾರೆ.
ವಾಲ್ಟರ್ ರೀಡ್ ಸಂಸ್ಥೆ ಅಮೆರಿಕದ ರಕ್ಷಣಾ ಇಲಾಖೆಯಿಂದ ನಿರ್ವಹಿಸಲ್ಪಡುವ ಅತೀ ದೊಡ್ಡ ಜೈವಿಕ ವೈದ್ಯಕೀಯ ಸಂಶೋಧನಾ ಸಂಸ್ಥೆಯಾಗಿದೆ.
ಪ್ರತಿಕಾಯ ಶಕ್ತಿ ವೃದ್ಧಿ ಪ್ರಾಣಿಗಳ ಮೇಲಿನ ಪ್ರಯೋಗದ ಅಧ್ಯಯನ ವರದಿ ‘ಸೈಯನ್ಸ್ ಟ್ರಾನ್ಸೇಷನಲ್ ಮೆಡಿಸಿನ್’ ನಲ್ಲಿ ಪ್ರಕಟವಾಗಿದ್ದು , ಎಸ್ಪಿಎಫ್ಎನ್ ಲಸಿಕೆಯು ಪ್ರಾಣಿಗಳನ್ನು ಸಾರ್ಸ್ ಸಿಒವಿ-2 ಮೂಲ ಸಾಂಕ್ರಾಮಿಕದಿಂದ ಉಂಟಾಗುವ ರೋಗದಿಂದ ರಕ್ಷಿಸುತ್ತದೆ ಮತ್ತು ಅತ್ಯಧಿಕ ಶಕ್ತಿಶಾಲಿ ಮತ್ತು ವ್ಯಾಪಕ ತಟಸ್ಥಗೊಳಿಸುವ ಪ್ರತಿಕಾಯ(ರೋಗನಿರೋಧಕ ಶಕ್ತಿ) ಪ್ರಕ್ರಿಯೆಯನ್ನು ಪ್ರಚೋದಿಸುತ್ತದೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
