ಶಿವಪುರ ಹಾಲು ಉತ್ಪಾದಕರ ಸಹಕಾರಿ ಸಂಘಕ್ಕೆ ಪ್ರಶಸ್ತಿ

ಕಾರ್ಕಳ: ಉಡುಪಿ ಜಿಲ್ಲೆ ಹೆಬ್ರಿ ತಾಲ್ಲೂಕಿನ ಶಿವಪುರ ಹಾಲು ಉತ್ಪಾದಕರ ಸಂಘಕ್ಕೆ ದಕ್ಷಿಣ ಕನ್ನಡ ಜಿಲ್ಲಾ ಸಹಕಾರಿ ಹಾಲು ಉತ್ಪಾದಕರ ಒಕ್ಕೂಟ ನಿಯಮಿತ ನೀಡುವ 2020-21ನೇ ಸಾಲಿನ ಅತ್ಯುತ್ತಮ ಸಂಘ ಪ್ರಶಸ್ತಿ ದೊರೆತಿದ್ದು, ದಕ್ಷಿಣ ಕನ್ನಡ ಜಿಲ್ಲಾ ಸಹಕಾರಿ ಹಾಲು ಉತ್ಪಾದಕರ ಒಕ್ಕೂಟದ ಅಧ್ಯಕ್ಷ ಕೆ. ರವಿರಾಜ ಹೆಗ್ಡೆ ಶಿವಪುರ ಡೇರಿಯ ಅಧ್ಯಕ್ಷ ಸುಂದರ ಹೆಗ್ಡೆ ಅವರಿಗೆ ಪ್ರಶಸ್ತಿ ಪ್ರದಾನ ಮಾಡಿದರು.

ಶಿವಪುರ ಡೇರಿಯು ಹೈನುಗಾರಿಕೆಯಲ್ಲಿ ಹಾಲು ಉತ್ಪಾದಕರಿಗೆ ಅತ್ಯುತ್ತಮ ಸೇವೆ ನೀಡುವ ಜೊತೆಗೆ ಹಾಲು ಒಕ್ಕೂಟದ ನಿಯಮಾವಳಿಯಂತೆ ರೈತರ ಸೇವೆ ಮಾಡಿ ಹಾಲು ಉತ್ಪಾದಕರ ಒಕ್ಕೂಟದ ಒಟ್ಟು 730 ಡೇರಿಗಳ ಪೈಕಿ ಶಿವಪುರ ಡೇರಿಯು ಅತ್ಯುತ್ತಮ ಸಂಘ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ನಾಲ್ಕೂವರೇ ದಶಕಗಳ ಇತಿಹಾಸವನ್ನು ಹೊಂದಿರುವ ಸಂಘವು ಅಭಿವೃದ್ಧಿಯ ಪಥದಲ್ಲಿ ಮುಂದುವರಿಯುತ್ತ ಹಲವಾರು ಮಂದಿ ಹೈನುಗಾರಿಕೆಯಲ್ಲಿ ತೊಡಗಿಕೊಳ್ಳುವಂತೆ ಮಾಡಿ. ಕೃಷಿಯ ಜೊತೆಗೆ ಎಲ್ಲರೂ ಜಾನುವಾರು ಸಾಕಿ ಉಪಕಸಬು ಮಾಡಿ ಜೀವನ ಸಾಗಿಸುವಂತಾಗಿದೆ.

1976 ರಲ್ಲಿ ಸಹಕಾರಿ ತತ್ವ ಹಾಗೂ ಹಾಲು ಉತ್ಪಾದನೆಯ ಮಹತ್ವ ಅರಿತು ಶಿವಪುರ ಹಾಲು ಉತ್ಪಾದಕರ ಸಹಕಾರಿ ಸಂಘವನ್ನು ಸ್ಥಾಪಿಸಲಾಯಿತು. ಸಂಘದಲ್ಲಿ 300 ಮಂದಿ ಸದಸ್ಯರಿದ್ದು 225 ಮಂದಿ ಶುದ್ಧ ಹಾಲು ಪೂರೈಕೆ ಮಾಡುತ್ತಿದ್ದಾರೆ. ಪ್ರತಿದಿನವೂ 1600 ಲೀಟರ್‌ ಹಾಲು ಸಂಗ್ರಹವಾಗುತ್ತಿದೆ.

ಶಿವಪುರ ಡೇರಿಯಲ್ಲಿ ಬಿಎಂಸಿ ಘಟಕ : ಶಿವಪುರ ಡೇರಿಯು ಸಕಲ ವ್ಯವಸ್ಥೆಯ ಸುಸಜ್ಜಿತ ಕಟ್ಟಡದಲ್ಲಿ ಡೇರಿಯು ಇದ್ದು 5 ಸಾವಿರ ಲೀಟರ್‌ ಹಾಲು ಸಂಗ್ರಹಿಸುವ ಸಾಮರ್ಥ್ಯದ ಹಾಲಿನ ಸಾಂದ್ರಶೀತಲಿಕರಣ ಘಟಕ (ಬಿಎಂಸಿ) ಹೊಂದಿದೆ. ಪರಿಸರದ 7 ಡೇರಿಯ ಹಾಲನ್ನು ಇಲ್ಲಿ ಸಂಗ್ರಹಿಸಲಾಗುತ್ತಿದೆ.

ಹಲವು ಪ್ರಶಸ್ತಿಗಳು : ಶಿವಪುರ ಡೇರಿಯ ಉತ್ತಮ ಸೇವೆಗೆ ರಾಜ್ಯ ಮಟ್ಟದ ಹಲವು ಪ್ರಶಸ್ತಿಯ ಸಂದಿದೆ. 2019-2020 ರಲ್ಲಿ ಉಡುಪಿ ಜಿಲ್ಲೆಯ ಅತ್ಯುತ್ತಮ ಸಂಘ ಪ್ರಶಸ್ತಿ ದೊರೆತಿದೆ. 2019-2020ನೇ ಸಾಲಿನಲ್ಲಿ ಅಖಿಲಭಾರತ ಸಹಕಾರಿ ಸಪ್ತಾಹದಲ್ಲಿ ರಾಜ್ಯ ಮಟ್ಟದ ಅತ್ಯುತ್ತಮ ಸಹಕಾರಿ ಸಂಘ ಪ್ರಶಸ್ತಿ, 2017-2018ನೇ ಸಾಲಿನ ಡಿಸಿಸಿ ಬ್ಯಾಂಕಿನ ಸಾಧನ ಪ್ರಶಸ್ತಿ ಲಭಿಸಿದೆ. ಜಿಲ್ಲೆ ಮತ್ತು ತಾಲ್ಲೂಕು ಮಟ್ಟದ ಪ್ರಶಸ್ತಿಯೂ ದೊರೆತಿದೆ.

ಹೈನುಗಾರರಿಗೆ ಉಚಿತ ಹಸಿರು ಹುಲ್ಲು ವಿತರಣೆ, ರೈತರ ಆರೋಗ್ಯ ತಪಾಸಣೆ, ಹೈನುಗಾರಿಕೆ ಮಾಹಿತಿ ಸಹಿತ ಸೇವಾ ಚಟುವಟಿಕೆಯಲ್ಲಿ ಸಂಘವು ಸಕ್ರಿಯವಾಗಿದೆ. ಅಡಿಕೆ ಹಾಳೆಯನ್ನು ಪುಡಿ ಮಾಡುವ ಯಂತ್ರವನ್ನು ಸಂಘವು ಹೊಂದಿದೆ. ನಂದಿನಿ ಹಾಲಿನ ಉತ್ಪನ್ನಗಳ ಮಾರಾಟ ಕೇಂದ್ರ ಮತ್ತು ಜನಸೇವಾ ಕೇಂದ್ರವೂ ಕೂಡ ಸಂಘವು ಹೊಂದಿದೆ.

ಸಂಘದ ಅಧ್ಯಕ್ಷರಾಗಿದ್ದ ಬಿಲ್ಲುಬೈಲ್‌ ಸುರೇಶ ಶೆಟ್ಟಿ ನೇತ್ರತ್ವದಲ್ಲಿ ಸಂಘಕ್ಕೆ ಸುಸಜ್ಜಿತ ಕಟ್ಟಡ ನಿರ್ಮಾಣ ಮಾಡಲಾಗಿದೆ. ಸುಂದರ ಹೆಗ್ಡೆ ಅಧ್ಯಕ್ಷರಾಗಿ, ನಾಗೇಶ ಶೇರಿಗಾರ್‌ ಉಪಾಧ್ಯಕ್ಷರಾಗಿ ಹಾಗೂ ನಿರ್ದೇಶಕರು ಸಂಘದ ಅಭಿವೃದ್ಧಿಗೆ ಕಳೆದ 23 ವರ್ಷಗಳಿಂದ ಕಾರ್ಯನಿರ್ವಾಹಣಾಧಿಕಾರಿ ಇಂದಿರಾ ಅವರೊಂದಿಗೆ ಸಿಬ್ಬಂದಿ ವರ್ಗವು ಇಡೀ ತಂಡವಾಗಿ ಸೇವೆ ಮಾಡುತ್ತ ಸಂಘವು ಯಶಸ್ಸಿನ ಪಥದಲ್ಲಿ ಮುನ್ನಡೆದಿದೆ.

''ಸಂಘದ ಸರ್ವ ಸದಸ್ಯರು, ಆಡಳಿತ ಮಂಡಳಿ, ಹಾಲು ಒಕ್ಕೂಟದ ಅಧ್ಯಕ್ಷರು, ನಿರ್ದೇಶಕರು, ಅಧಿಕಾರಿ ವರ್ಗದವರ ವಿಶೇಷ ಸಹಕಾರ ಮಾರ್ಗದರ್ಶನದಿಂದ ನಮಗೆ ಸಾಧನೆ ಮಾಡಲು ಸಾಧ್ಯವಾಗಿದೆ. ಸದಸ್ಯರು ಶುದ್ಧ ಗುಣಮಟ್ಟದ ಹಾಲು ಪೂರೈಕೆ ಮಾಡುತ್ತಿರುವುದು ಸಾಧನೆಯ ಮುಖ್ಯಾಂಶ. ಮಹಿಳೆ ಸಾಧನೆ ಮತ್ತು ಸೇವಾ ಮನೋಭಾವದಿಂದ ಕೆಲಸ ಮಾಡಿದರೆ ಹೇಗೆ ಎಂಬುದಕ್ಕೆ ನಮ್ಮ ಸಂಘದ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಇಂದಿರಾ ಅವರ ಶ್ರಮ ಸಾಕ್ಷಿಯಾಗಿದೆ. ಎಲ್ಲರನ್ನೂ ಜತೆಗೂಡಿ ಕೊಂಡು ಡೇರಿಯನ್ನು ಯಶಸ್ಸಿಯಾಗಿ ಮುನ್ನಡೆಸಿದ್ದರ ಫಲವಾಗಿ ನಮಗೆ ಸಾಧನೆ ಮಾಡಲು ಸಾಧ್ಯವಾಗಿದೆ. ಇಡೀ ತಂಡಕ್ಕೆ ಋಣಿ''

-ಸುಂದರ ಹೆಗ್ಡೆ. ಶಿವಪುರ ಡೇರಿ ಅಧ್ಯಕ್ಷರು

''ಕಳೆದ 23 ವರ್ಷಗಳಿಂದ ಕಾರ್ಯನಿರ್ವಾಹಣಾಧಿಕಾರಿಯಾಗಿ ಕರ್ತವ್ಯ ಮಾಡುತ್ತಿದ್ದೇನೆ. ಸಂಘದ ಸದಸ್ಯರು, ಅಧ್ಯಕ್ಷರು, ಆಡಳಿತ ಮಂಡಳಿ, ಹಾಲು ಒಕ್ಕೂಟ ಸೇರಿ, ಸಿಬ್ಬಂದಿ ವರ್ಗ ಎಲ್ಲರೂ ನನಗೆ ಸಹಕಾರ ಮಾರ್ಗದರ್ಶನ ನೀಡಿದ್ದರಿಂದ ಮಹಿಳೆಯಾಗಿ ಯಶಸ್ವಿಯಾಗಿ ಕೆಲಸ ಮಾಡಲು ಸಾಧ್ಯವಾಗಿದೆ. ಸಾಧನೆಯ ಹಿಂದೆ ಎಲ್ಲರ ಶ್ರಮವೂ ಇದೆ. ಮಹಿಳೆಯಾಗಿ ಸಂಘವನ್ನು ಮುನ್ನಡೆಸಲು ಎಲ್ಲರೂ ಸಹಕಾರ ನೀಡುತ್ತಿರುವುದಕ್ಕೆ ಖುಷಿಯಾಗುತ್ತಿದೆ.

-ಇಂದಿರಾ, ಕಾರ್ಯನಿರ್ವಾಹಣಾಧಿಕಾರಿ, ಶಿವಪುರ ಡೇರಿ.