ಗಾಳಿಯಲ್ಲಿ ನೆಲೆಸಿದ 20 ನಿಮಿಷಗಳೊಳಗೆ ಕೊರೋನ ವೈರಸ್ನ ಸೋಂಕು ಸಾಮರ್ಥ್ಯ ನಷ್ಟ
ಸಾಂದರ್ಭಿಕ ಚಿತ್ರ
ನ್ಯೂಯಾರ್ಕ್,ಜ.12: ಕೊರೋನ ವೈರಸ್ ಗಾಳಿಯಲ್ಲಿ ನೆಲೆಸಿದ 20 ನಿಮಿಷಗಳೊಳಗೆ ಜನರಿಗೆ ಸೋಂಕು ತಗಲಿಸುವ ತನ್ನ ಶೇ.90ರಷ್ಟು ಸಾಮರ್ಥ್ಯವನ್ನು ಕಳೆದುಕೊಳ್ಳುತ್ತದೆ, ಈ ಪೈಕಿ ಮೊದಲ ಐದು ನಿಮಿಷಗಳೊಳಗೆ ಅದರ ಬಹುತೇಕ ಸಾಮರ್ಥ್ಯವು ನಷ್ಟವಾಗುತ್ತದೆ ಎಂದು ಸಂಶೋಧನಾ ವರದಿಯೊಂದು ಬಹಿರಂಗಪಡಿಸಿದೆ.
ದೈಹಿಕ ಆಂತರ ಕಾಯ್ದುಕೊಳ್ಳುವಿಕೆ ಹಾಗೂ ಮಾಸ್ಕ್ ಧಾರಣೆಯ ಮೂಲಕ ಸೋಂಕನ್ನು ತಡೆಯಲು ಅತ್ಯುತ್ತಮ ಪರಿಣಾಮಕಾರಿ ವಿಧಾನವಾಗಿದೆಯೆಂದು ಬ್ರಿಸ್ಟಲ್ನ ಏರೊಸೋಲ್ ಸಂಶೋಧನಾ ಕೇಂದ್ರ (ಬ್ರಿಸ್ಟಲ್ ವಿವಿ)ದ ವರದಿ ತಿಳಿಸಿದೆ.
ಗಾಳಿಯಲ್ಲಿ ವೈರಸ್ನ ಉಪಸ್ಥಿತಿಯ ಅವಧಿ ಹೆಚ್ಚಿದಂತೆಯೇ ಅದರ ಪರಿಣಾಮಕಾರಿತ್ವ ಕಡಿಮೆಯಾಗುತ್ತಲೇ ಹೋಗುತ್ತದೆ ಎಂದು ಕೇಂದ್ರವು ಬಹಿರಂಗಪಡಿಸಿರುವ ಹೇಳಿಕೆ ತಿಳಿಸಿದೆ.
‘ಜನರು ಪರಸ್ಪರ ಸನಿಹದಲ್ಲಿದ್ದಾಗ ಸೋಂಕಿಗೆ ತುತ್ತಾಗು ಅಪಾಯವು ಅತ್ಯಧಿಕವಾಗಿರುತ್ತದೆ’’ ಎಂದು ಈ ಅಧ್ಯಯನ ವರದಿ ರಚನಾ ತಂಡದ ಮುಖ್ಯಸ್ಥರಾದ ಏರೋಸೊಲ್ನ ವಿವಿಯ ನಿರ್ದೇಶಕ ಪ್ರೊ. ಜೊನಾಥನ್ ರೀಡ್ ತಿಳಿಸಿದ್ದಾರೆ.
ಬೆಚ್ಚಗಿರುವ ಹಾಗೂ ಕಾರ್ಬನ್ ಡೈಆಕ್ಸೈಡ್ನಿಂದ ಸಮೃದ್ಧವಾಗಿರುವ ಶ್ವಾಸಕೋಶಗಳನ್ನು ಕೋವಿಡ್ ವೈರಸ್ನ ಕಣಗಳು ತೊರೆದುಹೋಗುತ್ತವೆ. ಒಮ್ಮೆ ಕಾರ್ಬನ್ ಡೈಆಕ್ಸೈಡ್ಗಿಂತ ಆಮ್ಲಜನಕ ಅಧಿಕವಾಗಿರುವ ಗಾಳಿಯೊಂದಿಗೆ ಸಂಪರ್ಕಕ್ಕೆ ಬಂದಲ್ಲಿ ಅವು ತ್ವರಿತವಾಗಿ ನಿರ್ಜಲೀಕರಣಗೊಳ್ಳುತ್ತದೆ ಮತ್ತು ತೇವಾಂಶದ ನಷ್ಟದಿಂದಾಗಿ ವೈರಸ್ಗೆ ಮಾನವನ ಜೀವಕೋಶಗಳಿಗೆ ಸೋಂಕು ತಗಲಿಸುವ ಸಾಮರ್ಥ್ಯವನ್ನು ಕಳೆದುಕೊಳ್ಳುತ್ತದೆ ಎಂದು ವರದಿ ಹೇಳಿದೆ.
