ನಟಿ ಮೇಲೆ ದೌರ್ಜನ್ಯ ಪ್ರಕರಣ: ದಿಲೀಪ್ ನಿವಾಸದ ಮೇಲೆ ಕೇರಳ ಪೊಲೀಸರಿಂದ ದಿಢೀರ್ ದಾಳಿ
ಎರ್ನಾಕುಲಂ: ಕೇರಳ ಪೊಲೀಸರ ಒಂದು ತಂಡ ಗುರುವಾರ ಮಳೆಯಾಲಂ ಸೂಪರ್ ಸ್ಟಾರ್ ದಿಲೀಪ್ ಅವರ ಮನೆ ಮೇಲೆ ದಿಢೀರ್ ದಾಳಿ ನಡೆಸಿದೆ. 2017 ರಲ್ಲಿ ನಟಿ ಮೇಲೆ ನಡೆಸಿದ ದೌರ್ಜನ್ಯ ಪ್ರಕರಣಕ್ಕೆ ಸಂಬಂಧಿಸಿ ದಾಳಿ ನಡೆದಿದ್ದು, ನಟಿಯ ಮೇಲಿನ ದೌರ್ಜನ್ಯ ಸಂಧರ್ಭದ ವಿಡಿಯೋಗಳನ್ನು ವಶಪಡಿಸಿಕೊಳ್ಳಲು ದಾಳಿ ನಡೆಸಲಾಗಿದೆ ಎಂದು malayalammanorama ವರದಿ ಮಾಡಿದೆ.
ಎರ್ನಾಕುಲಂ ನಲ್ಲಿರುವ ದಿಲೀಪ್ ಮನೆ ಮೇಲೆ ಮಾತ್ರವಲ್ಲದೆ, ದಿಲೀಪ್ ಸಹೋದರ ಅನೂಪ್ ನಿವಾಸದ ಮೇಲೆ ಹಾಗೂ ಅವರಿಬ್ಬರಿಗೆ ಸೇರಿದ ಗ್ರಾಂಡ್ ಪ್ರೊಡಕ್ಷನ್ ಸಂಸ್ಥೆ ಕಛೇರಿ ಮೇಲೂ ಪೊಲೀಸರ ತಂಡ ದಾಳಿಯನ್ನು ನಡೆಸಿದೆ.
ಎಸ್ಪಿ ಮೋಹನ್ಚಂದ್ರನ್ ನೇತೃತ್ವದಲ್ಲಿ ದಿಲೀಪ್ ಮನೆ ಮೇಲೆ ದಾಳಿ ನಡೆದಿದ್ದು, ನಾಲ್ಕು ವಾಹನಗಳಲ್ಲಿ ಬಂದಿದ್ದ ಪೊಲೀಸರ ತಂಡ ಸರ್ಚ್ ವಾರೆಂಟ್ ಜೊತೆ ಬಂದು ಹುಡುಕಾಟ ಆರಂಭಿಸಿದೆ.
ಚಲಿಸುತ್ತಿದ್ದ ಕಾರಿನಲ್ಲಿ ನಟಿಯ ಮೇಲೆ ದೌರ್ಜನ್ಯ ನಡೆಸಿದ ಪ್ರಕರಣದಲ್ಲಿ ದಿಲೀಪ್ ಪ್ರಮುಖ ಆರೋಪಿಯಾಗಿದ್ದು, ಇದೇ ಪ್ರಕರಣ ಸಂಬಂಧಿಸಿ ಕೆಲವು ಕಾಲ ಜೈಲಿಗೂ ಹೋಗಿದ್ದರು.
ದಿಲೀಪ್ ಆಪ್ತ, ನಿರ್ದೇಶಕ ಬಾಲಚಂದ್ರಕುಮಾರ್ ಪ್ರಕರಣದ ಕುರಿತು ನೀಡಿದ ಮಹತ್ವದ ಸುಳಿವಿನ ಆಧಾರದ ಮೇಲೆ ಪ್ರಕರಣ ಇನ್ನಷ್ಟು ಕಾವು ಪಡೆದಿದೆ.
ಪ್ರಕರಣದ ತನಿಖೆ ನಡೆಸುತ್ತಿದ್ದ ಅಧಿಕಾರಿಗಳ ಮೇಲೆ ದಾಳಿ ನಡೆಸಲು ಹಲವು ಬಾರಿ ಸಂಚು ನಡೆಸಲಾಗಿದೆ ಎಂದು ಬಾಲಚಂದ್ರಕುಮಾರ್ ಕೆಲವು ದಿನಗಳ ಹಿಂದೆ ಹೇಳಿದ್ದರು.
