ಆಪ್ ಕಾರ್ಯಕರ್ತರು ನೀಡಿದ ಮಾಸ್ಕ್ ಎಸೆದ ಬಿಜೆಪಿ ನಾಯಕಿ ಇಮಾರತಿ ದೇವಿ: ವಿಡಿಯೋ ವೈರಲ್

ಭೋಪಾಲ್, ಜ.22: ಮಧ್ಯಪ್ರದೇಶದ ಬಿಜೆಪಿ ನಾಯಕಿ ಇಮಾರತಿ ದೇವಿ ಅವರು ಆಮ್ ಆದ್ಮಿ ಪಕ್ಷದ ಕಾರ್ಯಕರ್ತರು ತನಗೆ ನೀಡಿದ ಮಾಸ್ಕ್ ಅನ್ನು ಎಸೆದ ದೃಶ್ಯವು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ದಾಟಿಯಾ ಜಿಲ್ಲೆಯಲ್ಲಿ ಮಾಸ್ಕ್ಗಳನ್ನು ಧರಿಸದೆ ಇರುವುದು ಕಂಡುಬಂದ ವ್ಯಕ್ತಿಗಳಿಗೆ ಆಪ್ ಕಾರ್ಯಕರ್ತರು ಮಾಸ್ಕ್ಗಳನ್ನು ವಿತರಿಸುತ್ತಿದ್ದರು.

ಕಾರಿನಲ್ಲಿ ಪ್ರಯಾಣಿಸುತ್ತಿದ್ದ ಮಧ್ಯಪ್ರದೇಶದ ಮಾಜಿ ಸಚಿವೆ ಇಮಾರತಿ ದೇವಿ ಮಾಸ್ಕ್ ಧರಿಸದೆ ಇರುವುದನ್ನು ಕಂಡ ಆಪ್ ಕಾರ್ಯರ್ತರು ತಡೆ ನಿಲ್ಲಿಸಿದರು. ಅವರಲ್ಲೊಬ್ಬ ತನಗೆ ಮಾಸ್ಕ್ ನೀಡಲು ಮುಂದೆ ಬಂದಾಗ ಆಕೆ ಅದನ್ನು ಎಸೆದ ದೃಶ್ಯವು ವಿಡಿಯೋದಲ್ಲಿ ಕಂಡುಬಂದಿದೆ.

ಜ್ಯೋತಿರಾದಿತ್ಯ ಸಿಂಧಿಯಾ ಅವರ ಬೆಂಬಲಿಗರಾದ ಇಮಾರತಿ ದೇವಿ ಅವರು ಇತೀತೆಚಗೆ ರಾಜ್ಯದ ಸಣ್ಣ ಕೈಗಾರಿಕೆ ನಿಗಮದ ಅಧ್ಯಕ್ಷೆಯಾಗಿ ನೇಮಕಗೊಂಡಿದ್ದರು.
 
ಕಮಲನಾಥ್ ನೇತೃತ್ವದ ಕಾಂಗ್ರೆಸ್ ಸರಕಾರದಲ್ಲಿ ಇಮಾರತಿ ದೇವಿ ಅವರು ಮಹಿಳಾ ಹಾಗೂ ಶಿಶು ಕಲ್ಯಾಣ ಸಚಿವೆಯಾಗಿದ್ದರು. 2020ರಲ್ಲಿ ಅವರು ಜ್ಯೋತಿರಾದಿತ್ಯ ಸಿಂಧಿಯಾ ಮತ್ತು ಇತರ 21 ಕಾಂಗ್ರೆಸ್ ಶಾಸಕರ ಜೊತೆ ಬಿಜೆಪಿಗೆ ಸೇರ್ಪಡೆಗೊಂಡಿದ್ದರು.
ಮಧ್ಯಪ್ರದೇಶದಲ್ಲಿ ಕೋವಿಡ್ ಪ್ರಕರಣಗಳು ಭಾರೀ ಸಂಖ್ಯೆಯಲ್ಲಿ ಏರುಗತಿಯನ್ನು ಕಂಡಿದೆ. ಮಧ್ಯಪ್ರದೇಶದಲ್ಲಿ ಶುಕ್ರವಾರ 9603 ಹೊಸ ಪ್ರಕರಣಗಳು ವರದಿಯಾಗಿದ್ದು, ಕೋವಿಡ್19 ಸೋಂಕಿತರ ಸಂಖ್ಯೆ 8,71,632ನ್ನು ತಲುಪಿದೆ. ಕಳೆದ 24 ತಾಸುಗಳಲ್ಲಿ 4 ಮಂದಿ ಸೋಂಕಿನಿಂದ ಸಾವನ್ನಪ್ಪಿದ್ದು, ಈವರೆಗೆ ಆ ರಾಜ್ಯದಲ್ಲಿ ಕೊರೋನಾಗೆ ಬಲಿಯಾದವರ ಸಂಖ್ಯೆ 10,557ಕ್ಕೇರಿದೆ ಎಂದು ಆರೋಗ್ಯ ಇಲಾಖೆಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

Recently appointed chairperson of MP Laghu Udyog Nigam, Jyotiraditya Scindia loyalist BJP leader Imarti Devi doesn't need mask amid surging COVID third wave. Look how she throws mask being distributed by AAP workers in Datia district. @NewIndianXpress @khogensingh1 @gsvasu_TNIE pic.twitter.com/eYH6qFFZ6M

— Anuraag Singh (@anuraag_niebpl) January 22, 2022