ಮಹಾರಾಷ್ಟ್ರದ 12 ಶಾಸಕರ ಅಮಾನತು ಹಿಂಪಡೆದ ಸುಪ್ರೀಂ ನಿರ್ಧಾರ ಅಸಂವಿಧಾನಿಕ: ಪ್ರಕಾಶ್ ಅಂಬೇಡ್ಕರ್

ಹೊಸದಿಲ್ಲಿ: ಮಹಾರಾಷ್ಟ್ರ ವಿಧಾನಸಭೆಯಿಂದ 12 ಬಿಜೆಪಿ ಶಾಸಕರ ವರ್ಷಾವಧಿಯ ಅಮಾನತು ರದ್ದುಗೊಳಿಸಿದ ಸುಪ್ರೀಂ ಕೋರ್ಟ್‌ನ ತೀರ್ಪು ಅಸಂವಿಧಾನಿಕವಾಗಿದೆ ಎಂದು ವಂಚಿತ್ ಬಹುಜನ ಅಘಾಡಿ (ವಿಬಿಎ) ಅಧ್ಯಕ್ಷ ಪ್ರಕಾಶ್ ಅಂಬೇಡ್ಕರ್ ಅವರು ಹೇಳಿಕೆ ನೀಡಿದ್ದಾಗಿ indianexpress.com ವರದಿ ಮಾಡಿದೆ.

ಶಾಸಕಾಂಗ ವಿಷಯಗಳ ಕಾರ್ಯಗಳಲ್ಲಿ ನ್ಯಾಯಾಲಯಗಳು ಮಧ್ಯಪ್ರವೇಶಿಸುವಂತಿಲ್ಲ ಮತ್ತು ಸುಪ್ರೀಂ ಕೋರ್ಟ್‌ನ ತೀರ್ಪು ರಾಜ್ಯದ ವಿಧಾನಸಭೆಯಲ್ಲಿ ತೆಗೆದುಕೊಂಡ ನಿರ್ಧಾರವನ್ನು ಪರೋಕ್ಷವಾಗಿ ಪ್ರಶ್ನಿಸಿದೆ ಎಂದು ಅವರು ಹೇಳಿದರು.

"ನ್ಯಾಯಾಂಗ ಮತ್ತು ಶಾಸಕಾಂಗದ ಪಾತ್ರಗಳು ಬಹಳ ಸ್ಪಷ್ಟವಾಗಿ ಮತ್ತು ಉತ್ತಮವಾಗಿ ವ್ಯಾಖ್ಯಾನಿಸಲಾಗಿದೆ ಎಂದು ನಾನು ದೃಢವಾಗಿ ನಂಬುತ್ತೇನೆ. ನ್ಯಾಯಾಂಗವು ಶಾಸಕಾಂಗಕ್ಕೆ ಸಂಬಂಧಿಸಿದ ವಿಷಯಗಳಲ್ಲಿ ಮಧ್ಯಪ್ರವೇಶಿಸಲು ಸಾಧ್ಯವಿಲ್ಲ ಮತ್ತು ಮಧ್ಯಪ್ರವೇಶಿಸಬಾರದು, ಅದು ಕೇಂದ್ರದಲ್ಲಿ ಭಾರತದ ಸಂಸತ್ತಿನ ಕಾರ್ಯಚಟುವಟಿಕೆಯಾಗಿರಲಿ ಅಥವಾ ಮಹಾರಾಷ್ಟ್ರದ ರಾಜ್ಯ ವಿಧಾನಸಭೆಯಾಗಿರಲಿ, ”ಎಂದು ಡಾ ಬಿ.ಆರ್ ಅಂಬೇಡ್ಕರ್ ಅವರ ಮೊಮ್ಮಗ ಪ್ರಕಾಶ್‌ ಅಂಬೇಡ್ಕರ್ ಹೇಳಿದರು.

ಸದನದಲ್ಲಿ ಅನುಚಿತ ವರ್ತನೆಯ ಆರೋಪದ ಮೇಲೆ 12 ಬಿಜೆಪಿ ಶಾಸಕರನ್ನು ಒಂದು ವರ್ಷದವರೆಗೆ ಅಮಾನತುಗೊಳಿಸಿದ ಮಹಾರಾಷ್ಟ್ರ ವಿಧಾನಸಭೆಯ ಜುಲೈ 5, 2021 ರ ನಿರ್ಣಯವು "ಅಸಂವಿಧಾನಿಕ" ಮತ್ತು "ಕಾನೂನುಬಾಹಿರ" ಎಂದು ಸುಪ್ರೀಂ ಕೋರ್ಟ್ ಶುಕ್ರವಾರ ತೀರ್ಪು ನೀಡಿತ್ತು. ಆ ಅಧಿವೇಶನದ ಅವಧಿ ಮೀರಿ ಶಾಸಕರನ್ನು ಅಮಾನತು ಮಾಡುವಂತಿಲ್ಲ ಎಂದು ಅದು ಹೇಳಿದೆ.‌

"ಶಾಸಕರು ಶಾಸಕಾಂಗ ವಿಷಯಗಳ ತೀರ್ಪು ನೀಡಲು ನ್ಯಾಯಾಲಯದ ಮೊರೆ ಹೋದರೆ ಅದು ಅಂತ್ಯವಿಲ್ಲದ ವಿಚಾರವಾಗುತ್ತದೆ ಎಂದು ಅವರು ಎಚ್ಚರಿಸಿದರು, ಏಕೆಂದರೆ ವಿಧಾನಸಭೆ ಅಥವಾ ಲೋಕಸಭೆಯಲ್ಲಿ ತೆಗೆದುಕೊಳ್ಳುವ ನಿರ್ಧಾರದಿಂದ ಅಸಮಾಧಾನಗೊಂಡ ಯಾವುದೇ ರಾಜಕೀಯ ಪಕ್ಷವು ತನ್ನ ರಾಜಕೀಯ ಪ್ರತಿಸ್ಪರ್ಧಿ ವಿರುದ್ಧ ಯುದ್ಧಕ್ಕೆ ಆಮಿಷ ಒಡ್ಡುತ್ತದೆ. ಶಾಸಕಾಂಗದ ವಿಷಯಗಳು ನ್ಯಾಯಾಲಯಕ್ಕೆ ಬಂದರೆ, ಇದು ಅಪಾಯಕಾರಿ ಪೂರ್ವನಿದರ್ಶನವಾಗಿದೆ. ಇದು ನ್ಯಾಯಾಲಯಗಳು ಮತ್ತು ಶಾಸಕಾಂಗ ಎರಡರ ಕಾರ್ಯನಿರ್ವಹಣೆಗೆ ಹಾನಿಕಾರಕವಾಗಿದೆ" ಎಂದು ಅವರು ಹೇಳಿದರು.