ಉಡುಪಿ: 337 ಮಂದಿಗೆ ಕೊರೋನ ಪಾಸಿಟಿವ್; ಕೋವಿಡ್ ಗೆ ಇಬ್ಬರು ಬಲಿ

ಉಡುಪಿ, ಜ.31: ಸೋಮವಾರ ಜಿಲ್ಲೆಯಲ್ಲಿ ಕೋವಿಡ್‌ಗೆ ಪಾಸಿಟಿವ್ ಬಂದವರ ಸಂಖ್ಯೆ 337ಕ್ಕಿಳಿದರೂ, ಉಡುಪಿಯ ಇಬ್ಬರು ವೃದ್ಧರು ಸೋಂಕಿಗೆ ಬಲಿಯಾದರು. ದಿನದಲ್ಲಿ 831 ಮಂದಿ ಕೋವಿಡ್-19 ಸೋಂಕಿನಿಂದ ಗುಣಮುಖರಾದರೆ, ಸೋಂಕಿಗೆ ಸಕ್ರಿಯರಾಗಿರುವವರ ಸಂಖ್ಯೆ 4479ಕ್ಕೆ ಇಳಿದಿದೆ ಎಂದು ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣಾಧಿಕಾರಿ ಡಾ. ನಾಗಭೂಷಣ ಉಡುಪ ತಿಳಿಸಿದ್ದಾರೆ.

ಉಡುಪಿಯ 86 ವರ್ಷ ಹಾಗೂ 66 ವರ್ಷ ಪ್ರಾಯದ ಪುರುಷರಿಬ್ಬರು ಕೋವಿಡ್ ಸೋಂಕಿನೊಂದಿಗೆ ಖಾಸಗಿ ಆಸ್ಪತ್ರೆಯಲ್ಲಿ ಮೃತಪಟ್ಟಿದ್ದಾರೆ. ಕೋವಿಡ್ ಗುಣಲಕ್ಷಣ, ಉಸಿರಾಟ ತೊಂದರೆ, ನ್ಯುಮೋನಿಯಾದಿಂದ ಬಳಲುತಿದ್ದ 86ರ ವೃದ್ಧರು ಮರೆವು ಕಾಯಿಲೆಯಿಂದಲೂ ನರಳುತಿದ್ದರು. 27ರಂದು ಆಸ್ಪತ್ರೆಗೆ ದಾಖಲಾದ ಇವರು 29ರಂದು ಮೃತಪಟ್ಟರು. 66ರ ವೃದ್ಧರು ಸಹ ಕೋವಿಡ್ ಗುಣಲಕ್ಷಣದೊಂದಿಗೆ ಕಿಡ್ನಿ ಸಮಸ್ಯೆಯಿಂದ ಬಳಲಿದ್ದು, 21ರಂದು ಚಿಕಿತ್ಸೆಗೆ ದಾಖಲಾದ ಇವರು ಇಂದು ಮೃತಪಟ್ಟರು. ಈ ಮೂಲಲಕ ಜಿಲ್ಲೆಯಲ್ಲಿ ಕೋವಿಡ್ ಗೆ ಬಲಿಯಾದವರ ಸಂಖ್ಯೆ 496ಕ್ಕೇರಿದೆ.

ಇಂದು ಪಾಸಿಟಿವ್ ಬಂದ 337 ಮಂದಿಯಲ್ಲಿ 175 ಮಂದಿ ಪುರುಷರು ಹಾಗೂ 162 ಮಂದಿ ಮಹಿಳೆಯರು. ಪಾಸಿಟಿವ್ ಬಂದವರಲ್ಲಿ 176 ಮಂದಿ ಉಡುಪಿ ತಾಲೂಕಿಗೆ, 93 ಮಂದಿ ಕುಂದಾಪುರ ಹಾಗೂ 62 ಮಂದಿ ಕಾರ್ಕಳ ತಾಲೂಕಿಗೆ ಸೇರಿದವರು. ಉಳಿದ ಆರು ಮಂದಿ ಹೊರಜಿಲ್ಲೆಯವರು.

ಪಾಸಿಟಿವ್ ಬಂದವರಲ್ಲಿ 26 ಮಂದಿಯನ್ನು ಕೋವಿಡ್ ಕೇರ್ ಸೆಂಟರ್‌ಗೆ ಸೇರಿಸಲಾಗಿದೆ. 12 ಮಂದಿಯನ್ನು ಕೋವಿಡ್ ಆಸ್ಪತ್ರೆಗೂ, 9 ಮಂದಿಯನ್ನು ಕೋವಿಡ್ ಹೆಲ್ತ್ ಆಸ್ಪತ್ರೆಗೆ ಸೇರಿಸಿದ್ದು, ಉಳಿದ 290 ಮಂದಿಗೆ ಅವರವರ ಮನೆಗಳಲ್ಲೇ ಚಿಕಿತ್ಸೆ ನೀಡಲಾಗುತ್ತಿದೆ. ಜಿಲ್ಲೆಯಲ್ಲೀಗ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುವವರ ಸಂಖ್ಯೆ 155 ಆಗಿದ್ದು, ಇವರಲ್ಲಿ 9 ಮಂದಿ ವೆಂಟಿಲೇಟರ್, 22 ಮಂದಿ ಐಸಿಯು ಹಾಗೂ 33 ಮಂದಿ ಎಚ್‌ಡಿಯು ಚಿಕಿತ್ಸೆಯಲ್ಲಿದ್ದಾರೆ.

ರವಿವಾರ 831 ಮಂದಿ ಸೋಂಕಿನಿಂದ ಗುಣಮುಖರಾಗಿದ್ದು, ಕೊರೋನ ದಿಂದ ಜ.1ರ ನಂತರ ಚೇತರಿಸಿಕೊಂಡವರ ಸಂಖ್ಯೆ 11508ಕ್ಕೇರಿದೆ. ನಿನ್ನೆ ಜಿಲ್ಲೆಯ ಒಟ್ಟು 1995 ಮಂದಿಗೆ ಕೋವಿಡ್ ಪರೀಕ್ಷೆ ನಡೆಸಲಾಗಿದೆ. ಜಿಲ್ಲೆಯಲ್ಲಿ ಜ.1ರ ಬಳಿಕ ಸೋಂಕಿಗೆ ಪಾಸಿಟಿವ್ ಬಂದವರ ಸಂಖ್ಯೆ 15856ಕ್ಕೇರಿದೆ.

ಜಿಲ್ಲೆಯಲ್ಲಿ ಇಂದು 1600 ಮಂದಿ ಹಿರಿಯರು ಮುನ್ನೆಚ್ಚರಿಕೆಯ ಒಂದು ಡೋಸ್ ಲಸಿಕೆಯನ್ನು ಪಡೆದಿದ್ದಾರೆ. ಇವರಲ್ಲಿ 60 ವರ್ಷ ಮೇಲಿನ 1058 ಮಂದಿ ಇದ್ದಾರೆ. ಅದೇ ರೀತಿ 15-18ವರ್ಷದೊಳಗಿನ 54 ಮಂದಿ ಮೊದಲ ಡೋಸ್ ಲಸಿಕೆ ಪಡೆದಿದ್ದಾರೆ. ಉಳಿದಂತೆ ಒಟ್ಟು 289 ಮಂದಿ ಮೊದಲ ಡೋಸ್ ಹಾಗೂ 1053 ಮಂದಿ ಎರಡನೇ ಡೋಸ್ ಲಸಿಕೆ ಪಡೆದಿದ್ದಾರೆ.