ಕೋಡಿ: ಒಂದೂವರೆ ತಿಂಗಳಲ್ಲಿ 3ನೆ ಬಾರಿ ಕಡಲಾಮೆ ಮೊಟ್ಟೆಗಳು ಪತ್ತೆ

ಕುಂದಾಪುರ, ಜ.31: ಎರಡು ದಿನಗಳ ಹಿಂದೆ ಕೋಡಿ ಸೀತಾರಾಮ ಭಜನಾ ಮಂದಿರ ಬಳಿ ಮೂರನೇ ಬಾರಿಗೆ ಪತ್ತೆಯಾದ ಕಡಲಾಮೆ ಮೊಟ್ಟೆಗಳನ್ನು ಹ್ಯಾಚರ್ ಮೂಲಕ ರಕ್ಷಣೆ ಮಾಡಲಾಗಿದೆ.
ಒಂದೂವರೆ ತಿಂಗಳ ಅಂತರದಲ್ಲಿ ಸೀತಾರಾಮ ಭಜನಾ ಮಂದಿರದ ಬಳಿ ಕಡಲಾಮೆ ಮೊಟ್ಟೆ ಸಿಕ್ಕಿರುವುದು ಮೂರನೆ ಬಾರಿಯಾಗಿದೆ. ಮೀನುಗಾರ ಬಾಬು ಮೊಗವೀರ ಈ ಮೊಟ್ಟೆಗಳನ್ನು ಪತ್ತೆ ಮಾಡಿದ್ದಾರೆ. ಈ ಹಿಂದೆ ಎರಡು ಬಾರಿಯೂ ಇವರೇ ಮೊಟ್ಟೆಗಳನ್ನು ಗುರುತಿಸಿದ್ದರು.
ಈ ಬಗ್ಗೆ ಬಾಬು ಮೊಗವೀರ ಅರಣ್ಯ ಇಲಾಖೆ ಅಧಿಕಾರಿಗಳಿಗೆ, ಆಮೆ ಮೊಟ್ಟೆ ಸಂರಕ್ಷಣೆಯಲ್ಲಿ ತೊಡಗಿಸಿ ಕೊಂಡಿರುವ ಎಸ್ಎಫ್ಎಲ್ ಸದಸ್ಯರು ಹಾಗೂ ಕ್ಲೀನ್ ಕುಂದಾಪುರ ಪ್ರಾಜೆಕ್ಟ್ ಕಾರ್ಯಕರ್ತರಿಗೆ ಮಾಹಿತಿ ನೀಡಿದ್ದರು. ಕೋಡಿ ಅರಣ್ಯ ಇಲಾಖೆ ಫಾರೆಸ್ಟ್ ಗಾರ್ಡ್ ರಂಜಿತ್, ಎಸ್ಎಫ್ಎಲ್ ಸಂಸ್ಥೆ ಹಾಗೂ ಕ್ಲೀನ್ ಕುಂದಾಪುರ ಪ್ರಾಜೆಕ್ಟ್ನ ವೆಂಕಟೇಶ್, ದಿನೇಶ್ ಸಾರಂಗ, ರಾಘು ಮೊಗವೀರ, ಭರತ್ ಬಂಗೇರ, ಸಂತೋಷ ಕೋಡಿ ಹಾಜರಿದ್ದರು.
ಎಚ್ಚರಿಕೆ ಬ್ಯಾನರ್ ಅಳವಡಿಕೆ: ಕಡಲಾಮೆ ಮೊಟ್ಟೆ ದೊರತ ಸ್ಥಳದ ಸುತ್ತಲೂ ಬಲೆ ಕಟ್ಟಿ ಹ್ಯಾಚರ್ ನಿರ್ಮಿಸಿ ನೈಸರ್ಗಿಕ ರೀತಿಯಲ್ಲಿಯೇ ರಕ್ಷಣೆ ಮಾಡ ಲಾಗಿದೆ. ಕರ್ನಾಟಕ ಅರಣ್ಯ ಇಲಾಖೆ ಕುಂದಾಪುರ ವಿಭಾಗದ ವತಿಯಿಂದ ಕಡಲಾಮೆ ಮೊಟ್ಟೆ ರಕ್ಷಣಾ ಕೇಂದ್ರ ಎಂದು ಸಾರ್ವಜನಿಕರಿಗೆ ಎಚ್ಚರಿಕೆ ಹಾಗೂ ಮಾಹಿತಿ ನೀಡುವ ಬ್ಯಾನರನ್ನು ಇಲ್ಲಿ ಅಳವಡಿಸಲಾಗಿದೆ.
‘ವನ್ಯಜೀವಿ ಸಂರಕ್ಷಣಾ ಕಾಯ್ದೆಯಡಿಯಂತೆ ಪ್ರವರ್ಗ ಶೆಡ್ಯೂಲ್-2 1ರ ಅಡಿಯಲ್ಲಿ ಕಾಲಂ 51ರ ಪ್ರಕಾರ ಕಡಲಾಮೆ ಅಥವಾ ಅದರ ಮೊಟ್ಟೆಗಳಿಗೆ ಯಾವುದೇ ರೀತಿಯ ಹಾನಿ ಮಾಡಿದಲ್ಲಿ 3ರಿಂದ 7ವರ್ಷಗಳ ಜೈಲುವಾಸ ಮತ್ತು 10ಸಾವಿರ ರೂ. ದಂಡ ವಿಧಿಸಲಾಗುವುದು’ ಎಂದು ಕುಂದಾಪುರ ಅರಣ್ಯ ಇಲಾಖೆ ಬ್ಯಾನರ್ನಲ್ಲಿ ಎಚ್ಚರಿಕೆ ನೀಡಿದೆ.
ದಾಖಲೆ ಪ್ರಮಾಣದಲ್ಲಿ ಪತ್ತೆ: ಕಳೆದ ವರ್ಷ ಜನವರಿ ಹಾಗೂ ಫೆಬ್ರವರಿ ತಿಂಗಳಿನಲ್ಲಿ ಕೋಡಿ ಲೈಟ್ ಹೌಸ್ ಬಳಿ ಪ್ರತ್ಯೇಕವಾಗಿ ಹತ್ತಕ್ಕೂ ಅಧಿಕ ಬಾರಿ ಕಡಲಾಮೆ ಮೊಟ್ಟೆಗಳು ಪತ್ತೆಯಾಗಿದ್ದವು.
ಆ ಮೊಟ್ಟೆಗಳನ್ನು ಹ್ಯಾಚರಿ ಮೂಲಕ ಸಂರಕ್ಷಿಸಲಾಗಿದ್ದಲ್ಲದೆ ಕಾದು ಕುಳಿತು ವೀಕ್ಷಣೆ ಜೊತೆ ರಕ್ಷಣೆ ಮಾಡಲು ಕ್ರಮವಹಿಸಲಾಗಿತ್ತು. ಮಾರ್ಚ್ ಹಾಗೂ ಎಪ್ರಿಲ್ ತಿಂಗಳಿನಲ್ಲಿ ಈ ಹ್ಯಾಚರಿಯಿಂದ ಕಡಲಾಮೆ ಮರಿಗಳು ಹೊರಬಂದು ಸುರಕ್ಷಿತವಾಗಿ ಮತ್ತೆ ಕಡಲು ಸೇರುವ ತನಕ ಇಲಾಖೆ ಹಾಗೂ ಕಡಲಾಮೆ ಸಂರಕ್ಷಣಾ ಪ್ರಾಜೆಕ್ಟ್ ಸದಸ್ಯರು ಹಗಲು ರಾತ್ರಿಯೆನ್ನದೆ ಕಾರ್ಯನಿರ್ವಹಿಸಿದ್ದರು.
2021 ಡಿಸೆಂಬರ್ ತಿಂಗಳಿನಲ್ಲಿ ಕೋಡಿ ಲೈಟ್ ಹೌಸ್ ಸಮೀಪ, 2022 ಜನವರಿ ಮೊದಲ ವಾರದಲ್ಲಿ ಕೋಡಿ ಸರಕಾರಿ ಆಸ್ಪತ್ರೆ ಎದುರು ಸಮುದ್ರ ತಟದಲ್ಲಿ ಹಾಗೂ ಜ.29ರಂದು ರಾಮಮಂದಿರ ಬಳಿ ಕಡಲಾಮೆ ಮೊಟ್ಟೆಗಳು ಪತ್ತೆಯಾಗಿವೆ ಎಂದು ಮೂಲಗಳು ತಿಳಿಸಿವೆ.