ಮಂಡ್ಯ: ಹಿಜಾಬ್ ಧರಿಸಿದ ಇಂಜಿನಿಯರಿಂಗ್ ಕಾಲೇಜಿನ ವಿದ್ಯಾರ್ಥಿನಿಯರನ್ನು ಗೇಟ್‍ನಲ್ಲೇ ತಡೆದ ಪೊಲೀಸರು!

ಮಂಡ್ಯ, ಫೆ.16: ತರಗತಿಗೆ ಹಾಜರಾಗಲು ಹಿಜಾಬ್ ಧರಿಸಿ ನಗರದ ಪಿಇಎಸ್ ಇಂಜನಿಯರಿಂಗ್ ಕಾಲೇಜಿಗೆ ಆಗಮಿಸಿದ ವಿದ್ಯಾರ್ಥಿನಿಯರನ್ನು ಪೊಲೀಸರು ಗೇಟ್‍ನಲೇ ತಡೆದು ಹೊರದೂಡಿದ ಘಟನೆ ಬುಧವಾರ ನಡೆದಿದೆ.

ಪದವಿ ಕಾಲೇಜುಗಳಿಗೆ ಯಾವುದೇ ಸಮವಸ್ತ್ರ ಧರಿಸಿಕೊಂಡು ಬರಬಹುದು ಎಂದು ಉನ್ನತ ಶಿಕ್ಷಣ ಸಚಿವರೇ ಹೇಳಿದ್ದಾರೆಂದು ವಿದ್ಯಾರ್ಥಿನಿಯರು ಮನವಿ ಮಾಡಿದರೂ, ಪೊಲೀಸರು ಅವಕಾಶ ನೀಡದೆ ಬೆದರಿಸುತ್ತಿದ್ದ ವೀಡಿಯೋ ಒಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.

ಪ್ರಾಂಶುಪಾಲರಿಂದ ಸ್ಪಷ್ಟನೆ ಪಡೆಯಲು ಅವಕಾಶ ನೀಡುವಂತೆ ವಿದ್ಯಾರ್ಥಿನಿಯರು ಮನವಿ ಮಾಡಿದರೂ ಕೇಳದೆ ಬಲವಂತವಾಗಿ ವಾಪಸ್ ಕಳುಹಿಸಲು ಪೊಲೀಸ್ ಮುಂದಾದಾಗ, ವಿದ್ಯಾರ್ಥಿನಿಯರು ಪೊಲೀಸರ ನಡವಳಿಕೆಗೆ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

“ಪದವಿ ತರಗತಿಗಳಿಗೆ ಅನುಮತಿ ಇದೆ ಎಂದು ಶಿಕ್ಷಣ ಸಚಿವರೇ ಹೇಳಿದ್ದಾರೆ. ಈ ರೀತಿ ಮೆಂಟಲ್ ಟಾರ್ಚರ್ ನೀಡಿದರೆ ನಾವು ಏನು ಮಾಡಬೇಕು? ಸಾಯಬೇಕಾ?” ಎಂದು ವಿದ್ಯಾರ್ಥಿನಿಯೊಬ್ಬರು ಪೊಲೀಸರ  ವರ್ತನೆಯನ್ನು ಪ್ರಶ್ನಿಸಿದ್ದಾರೆ.