ಎಷ್ಟೇ ಧೈರ್ಯ ಮಾಡಿಕೊಂಡರೂ ಎಲ್ಲವೂ ಭಯಾನಕ: ಲಾಯ್ಡ ಆ್ಯಂಟನಿ ಪಿರೇರಾ

ಮಂಗಳೂರು, ಮಾ.8: ಎಲ್ಲವೂ ಭಯಾನಕ, ನಾವು ಎಷ್ಟೇ ಧ್ಯೆರ್ಯ ಮಾಡಿಕೊಂಡರೂ ಕೂಡ ಕ್ಷಣ ಕ್ಷಣವೂ ಧೈರ್ಯಗೆಡುವಂತಹ ಸ್ಥಿತಿ ನಮ್ಮ ಕಣ್ಣೆದುರು ಸೃಷ್ಟಿಯಾಗುತ್ತಿತ್ತು. ರೊಮೇನಿಯಾ ತಲುಪಿದ ಬಳಿಕ ನಾವು ಸ್ವಲ್ಪ ನಿಟ್ಟುಸಿರು ಬಿಟ್ಟೆವು...

ಇದು ಯುದ್ಧಪೀಡಿತ ಉಕ್ರೇನ್‌ನಲ್ಲಿ ಸಿಲುಕಿದ್ದ ಗುರುಪುರ ಗ್ರಾಪಂ ವ್ಯಾಪ್ತಿಯ ವಿಕಾಸನಗರದ ಲಾಯ್ಡಿ ಆ್ಯಂಟನಿ ಪಿರೇರಾ ಮಂಗಳವಾರ ತನ್ನ ಮನೆಯಲ್ಲಿ ಮಾಧ್ಯಮದವರೊಂದಿಗೆ ಬಿಚ್ಚಿಟ್ಟ ಮಾತು.

ಫೆಬ್ರವರಿ 24ರ ಬಳಿಕ ಉಕ್ರೇನ್ ಸ್ಥಿತಿ ಗಂಭೀರವಾಗಿದ್ದು, ಮಾರ್ಚ್ 1ರಂದು ಉಕ್ರೇನ್‌ನ ಮಿಕೋಲೈವ್ ಪೆಟ್ರೋಮೊಹಿಲಾ ಬ್ಲ್ಯಾಕ್ ಸೀ ನ್ಯಾಶನಲ್ ಯೂನಿವರ್ಸಿಟಿಯಿಂದ 4 ಬಸ್‌ಗಳಲ್ಲಿ ಮಲ್ಡೋವಾ ಪ್ರಯಾಣಿಸಿದೆವು. ನಾವು 300 (290 ಎಂಬಿಬಿಎಸ್ ಮತ್ತು 10 ಇಂಜಿನಿಯರ್) ವಿದ್ಯಾರ್ಥಿಗಳಿದ್ದೆವು. ದಾರಿಯುದ್ದಕ್ಕೂ ಭಯಾನಕ ಶೆಲ್‌ಗಳು ಉದುರುತ್ತಿದ್ದವು. ಅಲ್ಲಲ್ಲಿ ವೈಮಾನಿಕ ದಾಳಿ ಕಂಡು ಬರುತ್ತಿದ್ದವು. ಬೆಂಕಿಯುಂಡೆಗಳು ಕೂಡ ಕಾಣುತ್ತಿದ್ದವು. ಹಾಗಾಗಿ ನಾವು ಪ್ರಯಾಣಿಸುತ್ತಿದ್ದ ಬಸ್ 4 ಗಂಟೆಗಳ ಕಾಲ ಸ್ಥಗಿತಗೊಂಡರೂ ಸುಮಾರು 18 ಗಂಟೆಗಳ ಪ್ರಯಾಣದ ಬಳಿಕ ಮಾಲ್ಡೋವಾ ತಲುಪಿತು. ಅಲ್ಲಿಂದ ಮತ್ತೆ 16 ಗಂಟೆಗಳ ಕಾಲ ಪ್ರಯಾಣಿಸಿ ರೊಮೇನಿಯಾ ತಲುಪಿದೆವು ಎಂದು ಲಾಯ್ಡೆ ಆ್ಯಂಟನಿ ಪಿರೇರಾ ಹೇಳಿದರು.

ಮಾ.6ರಂದು ರೊಮೇನಿಯಾದ ರಾಜಧಾನಿ ಬುಕಾರಿಸ್ಟ್‌ನಿಂದ ದೆಹಲಿಗೆ, ಅಲ್ಲಿಂದ ಮಾ.7ರಂದು ಬೆಂಗಳೂರು ಮೂಲಕ ಮಂಗಳೂರಿಗೆ ಆಗಮಿಸಿದೆವು. ನನ್ನೊಂದಿಗೆ ಎಂಬಿಬಿಎಸ್ ಬ್ಯಾಚ್‌ ಮೇಟ್ ಮಂಗಳೂರು ಬಿಜೈಯ ಸಾಕ್ಷ್ಯಿ ಎಸ್. ಕೂಡ ಇದ್ದರು. ಉಕ್ರೇನ್‌ನಲ್ಲಿ ಉತ್ತಮ ಗುಣಮಟ್ಟದ ವೈದ್ಯಕೀಯ ಶಿಕ್ಷಣ ಸಿಗುತ್ತಿದೆ. ಐದೂವರೆ ವರ್ಷದ ಎಂಬಿಬಿಎಸ್ ಪದವಿ ಗಳಿಸಲು ಉಕ್ರೇನ್‌ನಲ್ಲಿ 40 ಲಕ್ಷ ರೂ. ಸಾಕಾಗುತ್ತಿತ್ತು. ಆದರೆ ಭಾರತದಲ್ಲಿ 75 ಲಕ್ಷದಿಂದ 1ಕೋ.ರೂ.ಗೂ ಅಧಿಕ ಬೇಕಾಗುತ್ತದೆ ಎಂದರು.