ಶ್ರೀಲಂಕಾದಲ್ಲಿ ನ್ಯೂಸ್‌ ಪ್ರಿಂಟ್ ಕೊರತೆ: 2 ಪತ್ರಿಕೆಗಳ ಪ್ರಕಟಣೆ ಸ್ಥಗಿತ

ಕೊಲಂಬೊ, ಮಾ.25: ಶ್ರೀಲಂಕಾದಲ್ಲಿ ಪಾತಾಳಕ್ಕೆ ಕುಸಿದಿರುವ ಅರ್ಥ ವ್ಯವಸ್ಥೆಯಿಂದಾಗಿ ದೇಶದಲ್ಲಿ ನ್ಯೂಸ್‌ ಪ್ರಿಂಟ್ ಕೊರತೆ ಉಂಟಾಗಿದ್ದು ದೇಶದ 2 ಪ್ರಮುಖ ದಿನಪತ್ರಿಕೆಗಳು ಪ್ರಕಟಣೆಯನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಿದೆ ಎಂದು ವರದಿಯಾಗಿದೆ. 

ವಿದೇಶಿ ವಿನಿಮಯ ಸಂಗ್ರಹ ಕನಿಷ್ಟ ಮಟ್ಟಕ್ಕೆ ಕುಸಿದಿರುವ 22 ಮಿಲಿಯನ್ ಜನಸಂಖ್ಯೆ ಇರುವ ದ್ವೀಪರಾಷ್ಟ್ರದಲ್ಲಿ ಇಂಧನ, ವಿದ್ಯುತ್, ಔಷಧ, ಆಹಾರ ಸೇರಿದಂತೆ ಅಗತ್ಯದ ದಿನಬಳಕೆ ವಸ್ತುಗಳ ತೀವ್ರ ಕೊರತೆಯಿದೆ.  

ಇದೀಗ ನ್ಯೂಸ್‌ ಪ್ರಿಂಟ್ ಅಭಾವ ಇರುವುದರಿಂದ ತನ್ನ ಆಂಗ್ಲಮಾಧ್ಯಮ ದಿನಪತ್ರಿಕೆ ‘ದಿ ಐಲ್ಯಾಂಡ್’ ಮತ್ತು ಸಿಂಹಳೀಯ ಭಾಷೆಯ ದಿನಪತ್ರಿಕೆ ‘ಡಿವೈನಾ’ಗಳು ಆನ್ಲೈನ್ ಮಾಧ್ಯಮದಲ್ಲಿ ಮಾತ್ರ ಲಭ್ಯವಿರುತ್ತವೆ ಎಂದು ಖಾಸಗಿ ಸ್ವಾಮ್ಯದ ‘ಉಪಾಲಿ’   ದಿನಪತ್ರಿಕೆ ಪ್ರಕಟಿಸಿದೆ. 

ಇತರ ಹಲವು ಪ್ರಮುಖ ದಿನಪತ್ರಿಕೆಗಳೂ ಪತ್ರಿಕೆಯ ಪುಟಗಳನ್ನು ಕಡಿಮೆಗೊಳಿಸಿದೆ. ವಿದೇಶದಿಂದ ಆಮದು ಮಾಡಿಕೊಳ್ಳಲು ಕಷ್ಟವಾಗಿರುವ ಹಿನ್ನೆಲೆಯಲ್ಲಿ ದೇಶದಲ್ಲಿ ಕಳೆದ 5 ತಿಂಗಳಲ್ಲಿ ನ್ಯೂಸ್‌ ಪ್ರಿಂಟ್ ದರ ಸುಮಾರು ಮೂರು ಪಟ್ಟು ಹೆಚ್ಚಿದೆ. ಈ ಮಧ್ಯೆ ಸಾಕಷ್ಟು ನ್ಯೂಸ್‌ ಪ್ರಿಂಟ್ ಹಾಗೂ ಪ್ರಿಂಟಿಂಗ್ ಶಾಯಿ ಲಭ್ಯವಿಲ್ಲದ ಕಾರಣ ಶ್ರೀಲಂಕಾದಲ್ಲಿ ಶಾಲೆಗೆ ಅಗತ್ಯವಿರುವ 4.5 ಪಠ್ಯಪುಸ್ತಕಗಳಲ್ಲಿ ಸುಮಾರು 3 ಮಿಲಿಯನ್ ಪಠ್ಯಪುಸ್ತಕದ ಮುದ್ರಣವನ್ನು ತಡೆಹಿಡಿಯಲಾಗಿದೆ.

ಸತತ 5 ತಿಂಗಳು ಹಣದುಬ್ಬರ ಗರಿಷ್ಟ ಪ್ರಮಾಣಕ್ಕೆ ತಲುಪಿದ್ದು ಕಳೆದ ಫೆಬ್ರವರಿಯಲ್ಲಿ 17.5% ದಾಖಲೆ ಮಟ್ಟದಲ್ಲಿತ್ತು. ದೇಶದಲ್ಲಿ ತೈಲ ಮತ್ತು ಇಂಧನದ ಕೊರತೆಯೂ ಹೆಚ್ಚಿದೆ. ಈ ಮಧ್ಯೆ, ವಿದೇಶದಿಂದ ಆಮದಾಗಿರುವ ಡೀಸೆಲ್ ಮತ್ತು ವಿಮಾನ ಇಂಧನದ ಸರಕು 2 ವಾರದಿಂದ ಕೊಲಂಬೊ ಅಂತರಾಷ್ಟೀಯ ವಿಮಾನ ನಿಲ್ದಾಣದಲ್ಲಿಯೇ ಬಾಕಿಯಾಗಿದೆ. ಈ ವಾರಾಂತ್ಯದೊಳಗೆ ಸುಮಾರು 42 ಮಿಲಿಯನ್ ಡಾಲರ್ ಮೊತ್ತ ಪಾವತಿಸಿ ಇವನ್ನು ಬಿಡಿಸಿಕೊಳ್ಳಲಾಗುವುದು ಎಂದು ಶ್ರೀಲಂಕಾದ ಇಂಧನ ಸಚಿವಾಲಯ ಹೇಳಿದೆ.