ಪುತ್ತೂರು ಜಾತ್ರೆ ನಿಮಿತ್ತ ನಗರಸಭೆಯಿಂದ ಸಮಾಲೋಚನಾ ಸಭೆ

ಪುತ್ತೂರು; ಶ್ರೀ ಮಹಾಲಿಂಗೇಶ್ವರ ದೇವಳದ ವಾರ್ಷಿಕ ಜಾತ್ರೋತ್ಸವದಲ್ಲಿ ಲಕ್ಷಾಂತರ ಮಂದಿ ಭಕ್ತರು ಭಾಗವಹಿಸುತ್ತಿದ್ದು, ಈ ಸಂದರ್ಭದಲ್ಲಿ ನಗರದ ಸ್ವಚ್ಚತೆಯನ್ನು ಕಾಪಾಡಿಕೊಳ್ಳುವ ನಿಟ್ಟಿನಲ್ಲಿ ವರ್ತಕರು ಸೇರಿದಂತೆ ಎಲ್ಲರ ಸಹಕಾರ ಅಗತ್ಯ ಎಂದು ನಗರ ಸಭಾ ಅಧ್ಯಕ್ಷ ಕೆ. ಜೀವಂಧರ್ ಜೈನ್ ಹೇಳಿದರು.

ಪುತ್ತೂರು ಜಾತ್ರೆಯ ಹಿನ್ನೆಲೆಯಲ್ಲಿ ಶುಕ್ರವಾರ ಪುತ್ತೂರು ವಾಣಿಜ್ಯ ಮತ್ತು ಕೈಗಾರಿಕಾ ಸಂಘದ ಸದಸ್ಯರ ಸಮಾಲೋಚನಾ ಸಭೆಯು ಶುಕ್ರವಾರ ನಗರಸಭಾ ಸಭಾಂಗಣದಲ್ಲಿ ಅಧ್ಯಕ್ಷ ಜೀವಂಧರ ಜೈನ್ ಅಧ್ಯಕ್ಷತೆಯಲ್ಲಿ ನಡೆಯಿತು.

ಜಾತ್ರೆಯ ಗದ್ದೆಯಲ್ಲಿ ನಗರಸಭೆ ವತಿಯಿಂದ ಸುಮಾರು 20ಕ್ಕೂ ಅಧಿಕ ಡಸ್ಟ್‍ಬಿನ್‍ಗಳನ್ನು ಇರಿಸಲಾಗುತ್ತದೆ. ಇದನ್ನು ಹೊರತು ಪಡಿಸಿಯೂ ನಗರದ ಪ್ರಮುಖ ರಸ್ತೆಗಳುದ್ದಕ್ಕೂ ಜನಸಂಚಾರ ವ್ಯಾಪಕವಿರುವ ಸಂದರ್ಭ ಅಲ್ಲಲ್ಲಿ ಕಸ ಬಿಸಾಡುವ ಸಾಧ್ಯತೆ ಇದೆ. ಇದನ್ನು ನಿಯಂತ್ರಿಸಲು ವಾಣಿಜ್ಯ ಸಂಘದ ವತಿಯಿಂದಲೇ ಅಲ್ಲಲ್ಲಿ ತಾತ್ಕಾಲಿಕ ಬಿನ್‍ಗಳನ್ನು ಇರಿಸಬೇಕು. ಜನರಿಗೆ ಕಸ ಹಾಕಲು ಇದರಿಂದ ಅವಕಾಶವಾಗುತ್ತದೆ. ಅಲ್ಲಿ ಸಂಗ್ರಹಗೊಂಡ ಕಸವನ್ನು ನಗರಸಭೆ ವತಿಯಿಂದ ತೆರವು ಮಾಡಲಾಗುವುದು ಎಂದು ತಿಳಿಸಿದರು.

ನಗರದಲ್ಲಿರುವ ಮೈದಾನಗಳು, ಶಾಲಾ, ಕಾಲೇಜುಗಳು ಮೈದಾನಗಳನ್ನು ಪಾರ್ಕಿಂಗ್‍ಗೆ ಬಳಸಿಕೊಳ್ಳಲಾಗುವುದು. ಅಲ್ಲದೆ ಖಾಸಗಿ ಸ್ಥಳಾವಕಾಶಗಳನ್ನು ಕೂಡ ಬಳಸಿಕೊಳ್ಳಲು ನಿರ್ಧರಿಸಲಾಗಿದೆ. ಜಾಗ ಗುರುತಿಸಲಾಗಿದೆ. ಪಾರ್ಕಿಂಗ್ ನಿರ್ವಹಣೆ, ಟ್ರಾಫಿಕ್ ನಿರ್ವಹಣೆಗೆ ಪೊಲೀಸರ ಸಹಕಾರ ಕೇಳಲಾಗಿದೆ. ಆಯಕಟ್ಟಿನ ಸ್ಥಳಗಳಲ್ಲಿ ಸಿ.ಸಿ. ಕ್ಯಾಮರಾ ಅಳವಡಿಸಲಾಗುವುದು. ದಾರಿ ದೀಪಗಳನ್ನು ಸಮರ್ಪಕಗೊಳಿಸಲು ಈಗಾಗಲೇ ಸೂಚಿಸಲಾಗಿದೆ. ಜಾತ್ರೆ ಅವಧಿಯಲ್ಲಿ ವಿದ್ಯುತ್ ಸಮಸ್ಯೆ, ನೀರಿನ ಸಮಸ್ಯೆ, ಪಾರ್ಕಿಂಗ್ ಸಮಸ್ಯೆ, ಸ್ವಚ್ಛತೆ ಸಮಸ್ಯೆಯಾಗದಂತೆ ಕ್ರಮ ಕೈಗೊಳ್ಳಲಾಗುತ್ತದೆ. ಎಲ್ಲದಕ್ಕೂ ವರ್ತಕರ ಸಹಕಾರ ಬೇಕು ಎಂದು ಹೇಳಿದರು.

ಜಾತ್ರಾ ಸ್ಥಳದಲ್ಲಿ ಸಂತೆ ಇರುತ್ತದೆ. ಆದರೆ ರಸ್ತೆಗಳ ಪಕ್ಕದಲ್ಲಿರುವ ಶಾಶ್ವತ ಅಂಗಡಿಗಳವರು ಜಾತ್ರೆ ವೇಳೆ ತಮ್ಮ ಅಂಗಡಿಗಳನ್ನು ವಿಸ್ತರಿಸಿ ಫುಟ್‍ಪಾತ್ ಅತಿಕ್ರಮಿಸಿ ವ್ಯಾಪಾರ ಮಾಡುವಂತಿಲ್ಲ. ಎಲ್ಲ ವರ್ತಕರಿಗೂ ಈ ಮಾಹಿತಿಯನ್ನು ಸಂಘದವರು ನೀಡಬೇಕು ಎಂದು ಪೌರಾಯುಕ್ತರಾದ ಮಧು ಎಸ್. ಮನೋಹರ್ ನುಡಿದರು. ನಗರ ಪ್ರದೇಶದಲ್ಲಿ ಸೀಮಿತ ಸಂಖ್ಯೆಯ ಸಾರ್ವಜನಿಕ ಶೌಚಾಲಯಗಳಿವೆ. ಹೀಗಾಗಿ ಜಾತ್ರೆಯ ಅವಧಿಯಲ್ಲಿ ನಗರದ ಕಾಂಪ್ಲೆಕ್ಸ್‍ಗಳ ಶೌಚಾಲಯವನ್ನು ಬಳಸಲು ಗ್ರಾಹಕರಿಗೆ ಅವಕಾಶ ನೀಡಿ. ಹೊಟೇಲ್‍ಗಳಲ್ಲಿ ಬಿಸಿ ನೀರನ್ನೇ ಕುಡಿಯಲು ಕೊಡಿ ಎಂದವರು ಮನವಿ ಮಾಡಿದರು. ರಥೋತ್ಸವದ ದಿನ 1 ಲಕ್ಷ ಜನ ಭಾಗವಹಿಸುವ ನಿರೀಕ್ಷೆ ಇದೆ. ಕಳೆದೆರಡು ವರ್ಷಗಳಲ್ಲಿ ಕೋವಿಡ್ ಕಾರಣದಿಂದ ಜಾತ್ರೆ ಸರಳವಾಗಿ ನಡೆದಿದೆ. ಈಬಾರಿ ಈ ಆತಂಕ ಇಲ್ಲದ ಕಾರಣ ಜನದಟ್ಟಣೆ ಇರುವ ಸಾಧ್ಯತೆ ಇದೆ. ನೈರ್ಮಲ್ಯೀಕರಣ, ಶುಚಿತ್ವ ಕಾಪಾಡಲು ನಗರಸಭೆ ಗರಿಷ್ಠ ಪ್ರಯತ್ನ ಮಾಡಲಿದೆ ಎಂದರು.

ಸ್ಥಾಯಿ ಸಮಿತಿ ಅಧ್ಯಕ್ಷ ಬಾಲಚಂದ್ರ, ನಗರ ಯೋಜನಾ ಪ್ರಾಧಿಕಾರದ ಅಧ್ಯಕ್ಷ ಭಾಮಿ ಅಶೋಕ್ ಶೆಣೈ ವೇದಿಕೆಯಲ್ಲಿ ಉಪಸ್ಥಿತರಿದ್ದರು.

ಪುತ್ತೂರು ವಾಣಿಜ್ಯ ಮತ್ತು ಕೈಗಾರಿಕಾ ಸಂಘದ ಅಧ್ಯಕ್ಷ ಜೋನ್ ಕುಟಿನ್ನೋ, ಸದಸ್ಯರಾದ ಉಲ್ಲಾಸ್ ಪೈ, ಗೋಪಾಲಕೃಷ್ಣ ಸಾಮೆತ್ತಡ್ಕ, ಮನೋಜ್, ರಾಜೇಶ್ ಕಾಮತ್, ಲೋಕೇಶ್ ಹೆಗ್ಡೆ, ಅರವಿಂದ ಭಗವಾನ್ ರೈ, ನಾಗೇಶ್ ಪಿ. ಮತ್ತಿತರರು ಉಪಸ್ಥಿತರಿದ್ದರು.