ಏಳು ಜಿಲ್ಲೆಗಳ ನಗರ ಸ್ಥಳೀಯ ಸಂಸ್ಥೆಗಳ ಕ್ರಿಯಾ ಯೋಜನೆಗೆ ಅನುಮೋದನೆ

ಬೆಂಗಳೂರು: ಮೈಸೂರು,   ಉಡುಪಿ,   ರಾಮನಗರ, ಕೊಡಗು,   ಬಳ್ಳಾರಿ,   ದಾವಣಗೆರೆ   ಮತ್ತು ಬೆಳಗಾವಿ ಜಿಲ್ಲೆಗಳ ನಗರ ಸ್ಥಳೀಯ ಸಂಸ್ಥೆಗಳ 2022-23ನೇ ಸಾಲಿನಿಂದ 2024-25ನೇ ಸಾಲಿನ ವರೆಗಿನ ಮುಖ್ಯಮಂತ್ರಿಗಳ ಅಮೃತ  ನಗರೋತ್ಥಾನ-4ನೇ ಹಂತದ ಯೋಜನೆಯ ಕ್ರಿಯಾ ಯೋಜನೆಗಳಿಗೆ ಪೌರಾಡಳಿತ, ಸಣ್ಣ ಕೈಗಾರಿಕೆ ಹಾಗೂ ಸಾರ್ವಜನಿಕ ಉದ್ದಿಮೆಗಳ ಸಚಿವ ಎಂ.ಟಿ.ಬಿ.ನಾಗರಾಜು ಅವರ  ಅಧ್ಯಕ್ಷತೆಯ ರಾಜ್ಯಮಟ್ಟದ ಸಮಿತಿ ಅನುಮೋದನೆ ನೀಡಿದೆ.

ಮುಖ್ಯಮಂತ್ರಿಗಳ ಅಮೃತ ನಗರೋತ್ಥಾನ ಯೋಜನೆ-4ನೇ ಹಂತದ 3 ನೇ ಸಮಿತಿ ಮತ್ತು ನಗರೋತ್ಥಾನ- 3ನೇ ಹಂತದ   ಯೋಜನೆಗಳ 18 ನೇ ರಾಜ್ಯಮಟ್ಟದ ಸಮಿತಿಯ ಸಭೆ ವಿಧಾನಸೌಧದಲ್ಲಿ ಇಂದು  ಸಚಿವ ಎಂ.ಟಿ.ಬಿ. ನಾಗರಾಜು ಅಧ್ಯಕ್ಷತೆಯಲ್ಲಿ ನಡೆಯಿತು.

ಇದರಿಂದಾಗಿ   2022-23ನೇ   ಸಾಲಿನಿಂದ   2024-25 ನೇ   ಸಾಲಿನವರೆಗಿನ   4ನೇ   ಹಂತದ ಯೋಜನೆಯ ಈ ಕ್ರಿಯಾ ಯೋಜನೆಗಳಿಂದ ಮೈಸೂರು   ಜಿಲ್ಲೆಯ   ನಗರ   ಸ್ಥಳೀಯ ಸಂಸ್ಥೆಗಳ ವ್ಯಾಪ್ತಿಯಲ್ಲಿ  75   ಕೋಟಿ   ರೂ., ಕೊಡಗು   ಜಿಲ್ಲೆಯ   ನಗರ   ಸ್ಥಳೀಯ ಸಂಸ್ಥೆಗಳಲ್ಲಿ 55 ಕೋಟಿ ರೂ., ಬಳ್ಳಾರಿ -80 ಕೋಟಿ   ರೂ.,   ರಾಮನಗರ-125 ಕೋಟಿ   ರೂ.,   ದಾವಣಗೆರೆ-70 ಕೋಟಿ ರೂ.,   ಬೆಳಗಾವಿ-260  ಕೋಟಿ   ರೂ. ಹಾಗು   ಉಡುಪಿ   ಜಿಲ್ಲೆಯ   ನಗರ   ಸ್ಥಳೀಯ ಸಂಸ್ಥೆಗಳ ವ್ಯಾಪ್ತಿಯಲ್ಲಿ   40 ಕೋಟಿ   ರೂಪಾಯಿಗಳ ಕಾಮಗಾರಿಗಳನ್ನು ಕೈಗೊಳ್ಳಬಹುದಾಗಿದೆ.

ರಾಜ್ಯದ  302   ನಗರ   ಸ್ಥಳೀಯ ಸಂಸ್ಥೆಗಳಲ್ಲಿ   ಮುಖ್ಯಮಂತ್ರಿಗಳ ಅಮೃತ   ನಗರೋತ್ಥಾನ-4ನೇ   ಹಂತದ ಯೋಜನೆಯಡಿ   3885 ಕೋಟಿ   ರೂಪಾಯಿ ಮೊತ್ತದ ಕ್ರಿಯಾ ಯೋಜನೆಗೆ ರಾಜ್ಯ ಸಚಿವ ಸಂಪುಟ   ಕಳೆದ   ಜನವರಿಯಲ್ಲಿ ಅನುಮೋದನೆ ನೀಡಿತ್ತು. ಅಲ್ಲದೆ,   3ನೇ   ಹಂತದ   ಯೋಜನೆಯಲ್ಲಿ ಉಳಿಕೆಯಾಗಿದ್ದ   ಹಣದಲ್ಲಿ   ಬೆಳಗಾವಿ, ರಾಮನಗರ,   ಬಳ್ಳಾರಿ,   ಚಿಕ್ಕಮಗಳೂರು, ಬಾಗಲಕೋಟೆ,   ಉತ್ತರ ಕನ್ನಡ ಮತ್ತು ವಿಜಯನಗರ   ಜಿಲ್ಲೆಗಳ   ಸ್ಥಳೀಯ ಸಂಸ್ಥೆಗಳಲ್ಲಿ   ಬದಲೀ   ಕಾಮಗಾರಿ ಕೈಗೊಳ್ಳಲು ಸಹ ಸಚಿವ ಎಂ.ಟಿ.ಬಿ. ನಾಗರಾಜು ಅವರ   ಅಧ್ಯಕ್ಷತೆಯ   ಸಭೆ ಅನುಮೋದನೆ ನೀಡಿತು.

ಸಭೆಯಲ್ಲಿ   ನಗರಾಭಿವೃದ್ಧಿ   ಇಲಾಖೆ ಕಾರ್ಯದರ್ಶಿ   ಡಾ.   ಅಜಯ್   ನಾಗಭೂಷಣ್, ಪೌರಾಡಳಿತ ಇಲಾಖೆ ನಿರ್ದೇಶಕರಾದ ಅರ್ಚನಾ,   ಮುಖ್ಯ   ಎಂಜಿನಿಯರ್ ಸತ್ಯನಾರಾಯಣ   ಸೇರಿದಂತೆ   ಹಿರಿಯ   ಅಧಿಕಾರಿಗಳು ಪಾಲ್ಗೊಂಡಿದ್ದರು.