​‌119 ವರ್ಷ ಪ್ರಾಯದ ವಿಶ್ವದ ಅತ್ಯಂತ ಹಿರಿಯ ವ್ಯಕ್ತಿ ನಿಧನ

ಟೋಕ್ಯೊ, ಎ.25: ವಿಶ್ವದ ಅತ್ಯಂತ ಹಿರಿಯ ವ್ಯಕ್ತಿ ಎಂದು ಗಿನ್ನೆಸ್ ವಿಶ್ವದಾಖಲೆಗೆ ಸೇರ್ಪಡೆಗೊಂಡಿದ್ದ ಜಪಾನ್ನ 119 ವರ್ಷದ ಮಹಿಳೆ ಮೃತಪಟ್ಟಿರುವುದಾಗಿ ಜಪಾನ್ನ ಅಧಿಕಾರಿಗಳು ಹೇಳಿದ್ದಾರೆ.ಜಪಾನ್ನ ನೈಋತ್ಯ ಪ್ರಾಂತ ಫುಕುವೊಕಾದಲ್ಲಿ 1903ರ ಜನವರಿ 2ರಂದು ಜನಿಸಿದ್ದ ಕೇನ್ ತನಾಕ ಇತ್ತೀಚಿನ ದಿನಗಳಲ್ಲಿ ಅನಾರೋಗ್ಯದಿಂದ ಬಳಲುತ್ತಿದ್ದರು. ಆದರೂ ತಮ್ಮ ದೈನಂದಿನ ಕಾರ್ಯವನ್ನು ನಿರ್ವಹಿಸುತ್ತಾ ಅತ್ಯಂತ ಲವಲವಿಕೆಯಿಂದ ಇದ್ದರು ಎಂದು ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ.

ಬೋರ್ಡ್ ಗೇಮ್ (ಬೋರ್ಡ್ನಲ್ಲಿ ಆಡುವ ಚೆಸ್, ಲುಡೊ ಇತ್ಯಾದಿ ಆಟಗಳಲ್ಲಿ) ಆಸಕ್ತಿ ಹೊಂದಿದ್ದ ತನಾಕರಿಗೆ ಗಣಿತದ ಸಮಸ್ಯೆ ಬಿಡಿಸುವುದು ಅತ್ಯಂತ ಇಷ್ಟದ ಹವ್ಯಾಸವಾಗಿತ್ತು. 1922ರಲ್ಲಿ ಹಿಡಿಯೊ ತನಾಕ ಎಂಬವರನ್ನು ವಿವಾಹವಾಗಿದ್ದು 4 ಮಕ್ಕಳಿವೆ. ಜತೆಗೆ ಮತ್ತೊಂದು ಮಗುವನ್ನು ದತ್ತು ಪಡೆದಿದ್ದರು. 2021ರ ಟೋಕಿಯೊ ಒಲಿಂಪಿಕ್ಸ್ ಕೂಟದ ಜ್ಯೋತಿ ಓಟದಲ್ಲಿ ಗಾಲಿಕುರ್ಚಿಯಲ್ಲಿ ಕುಳಿತು ಭಾಗವಹಿಸಲು ಅವರು ಸಿದ್ಧತೆ ನಡೆಸಿದ್ದರು. ಆದರೆ ಕೊರೋನ ಸೋಂಕಿನ ಕಾರಣ ಅವರಿಗೆ ಅವಕಾಶ ದೊರಕಲಿಲ್ಲ.
2019ರಲ್ಲಿ , ಈಗ ವಿಶ್ವದಲ್ಲಿ ಬದುಕಿರುವವರಲ್ಲಿ ಅತ್ಯಂತ ಹಿರಿಯ ವ್ಯಕ್ತಿ ಎಂದು ಗಿನ್ನೆಸ್ ದಾಖಲೆಗೆ ಪಾತ್ರವಾಗಿದ್ದರು. ಇದುವರೆಗೆ ಪ್ರಪಂಚದಲ್ಲಿ ಅತೀ ಹೆಚ್ಚು ವರ್ಷ ಜೀವಿಸಿದ ದಾಖಲೆ ಫ್ರಾನ್ಸ್ನ ಜೀನ್ ಲೂಯಿಸ್ ಕಾಲ್ಮೆಂಟ್ ಹೆಸರಲ್ಲಿದೆ. 1997ರಲ್ಲಿ ಮೃತಪಟ್ಟಾಗ ಅವರಿಗೆ 122 ವರ್ಷ, 164 ದಿನ ಆಗಿತ್ತು ಎಂದು ಗಿನ್ನೆಸ್ ದಾಖಲೆ ಉಲ್ಲೇಖಿಸಿದೆ.