ಅಮೆರಿಕ ಸಂಸತ್ ನ ಸ್ಪೀಕರ್ ನ್ಯಾನ್ಸಿ ಪೆಲೋಸಿ ಉಕ್ರೇನ್ ಗೆ ಭೇಟಿ

ಕೀವ್, ಮೇ 1: ಅಮೆರಿಕ ಸಂಸತ್ನ ಸ್ಪೀಕರ್ ನ್ಯಾನ್ಸಿ ಪೆಲೋಸಿ ನೇತೃತ್ವದ ಸಂಸದೀಯ ನಿಯೋಗ ರವಿವಾರ ಅನಿರೀಕ್ಷಿತ ಭೇಟಿ ನೀಡಿ ಅಧ್ಯಕ್ಷ ವೊಲೊದಿಮಿರ್ ಝೆಲೆನ್ಸ್ಕಿ ಜತೆ ಮಾತುಕತೆ ನಡೆಸಿದ್ದು ರಶ್ಯ ವಿರುದ್ಧದ ಹೋರಾಟದಲ್ಲಿ ಉಕ್ರೇನ್ಗೆ ನೆರವು ಮುಂದುವರಿಸುವ ಅಮೆರಿಕದ ಬದ್ಧತೆಯನ್ನು ಪುನರುಚ್ಚರಿಸಿದೆ. 

ಅಮೆರಿಕದ ರಾಜಕೀಯ ವ್ಯವಸ್ಥೆಯಲ್ಲಿ ಸಂಸತ್ತಿನ ಸ್ಪೀಕರ್ ಪದವಿ ಅಧ್ಯಕ್ಷ, ಉಪಾಧ್ಯಕ್ಷರ ಬಳಿಕದ ಅತ್ಯುನ್ನತ ಹುದ್ದೆಯಾಗಿದೆ. ಸ್ವಾತಂತ್ರ್ಯಕ್ಕಾಗಿ ನೀವು ನಡೆಸುವ ಹೋರಾಟಕ್ಕೆ ವಂದನೆ ಸಲ್ಲಿಸಲು ನಾವಿಲ್ಲಿಗೆ ಬಂದಿದ್ದೇವೆ. ಹೋರಾಟ ಅಂತ್ಯಗೊಳ್ಳುವವರೆಗೂ ನಿಮಗೆ ನೆರವು ನೀಡಲು ನಾವು ಬದ್ಧವಾಗಿದ್ದೇವೆ ಎಂದು ಪೆಲೋಸ್ಕಿ ಹೇಳಿರುವುದಾಗಿ ಉಕ್ರೇನ್ ಅಧ್ಯಕ್ಷರ ಕಚೇರಿ ತಿಳಿಸಿದೆ. ಇಡೀ ಜಗತ್ತಿಗೆ ಸ್ಪಷ್ಟ ಮತ್ತು ಪ್ರತಿಧ್ವನಿಸುವ ಸಂದೇಶ ರವಾನಿಸಲು ನಮ್ಮ ನಿಯೋಗ ಕೀವ್ಗೆ ತೆರಳಿದೆ. 

ಅಮೆರಿಕವು ಉಕ್ರೇನ್ನೊಂದಿಗೆ ದೃಢವಾಗಿ ನಿಲ್ಲಲಿದೆ ಮತ್ತು ಉಕ್ರೇನ್ ಗೆಲ್ಲುವವರೆಗೂ ನಾವಿಲ್ಲಿಂದ ತೆರಳುವುದಿಲ್ಲ . ಉಕ್ರೇನ್ ಮೇಲಿನ ರಶ್ಯ ಅಧ್ಯಕ್ಷ ಪುಟಿನ್ ಅವರು ಎಸಗಿರುವ ಪೈಶಾಚಿಕ ಆಕ್ರಮಣ ಅತ್ಯಂತ ಖಂಡನೀಯ ಎಂದು ಅಮೆರಿಕದ ನಿಯೋಗ ಹೇಳಿಕೆ ಬಿಡುಗಡೆಗೊಳಿಸಿದೆ. ರಶ್ಯ ಆಕ್ರಮಣದ ವಿರುದ್ಧ ಉಕ್ರೇನ್ಗೆ ಬಲವಾದ ಬೆಂಬಲ ನೀಡಿರುವುದಕ್ಕೆ ಅಮೆರಿಕಕ್ಕೆ ಧನ್ಯವಾದ ಎಂದು ಉಕ್ರೇನ್ ಅಧ್ಯಕ್ಷ ಝೆಲೆನ್ಸ್ಕಿ ಟ್ವೀಟ್ ಮಾಡಿದ್ದಾರೆ. ಪೂರ್ವನಿಗದಿಯಾಗದ ಭೇಟಿ ಸಂದರ್ಭ ಆ್ಯಡಂ ಶಿಫ್, ಜಿಮ್ ಮೆಕ್ಗವರ್ನ್, ಬಾರ್ಬರಾ ಲೀ ಹಾಗೂ ಸಂಸದೀಯ ನಿಯೋಗದಲ್ಲಿದ್ದರು. 

ಸಭೆಯ ಬಳಿಕ ಸುದ್ಧಿಗೋಷ್ಟಿಯಲ್ಲಿ ಮಾತನಾಡಿದ ಶಿಫ್, ಉಕ್ರೇನ್ ಅಧ್ಯಕ್ಷರ ಜತೆಗಿನ 3 ಗಂಟೆಗೂ ಹೆಚ್ಚಿನ ಮಾತುಕತೆಯಲ್ಲಿ ನಿರ್ಬಂಧ, ಶಸ್ತ್ರಾಸ್ತ್ರ ಮತ್ತು ಇತರ ನೆರವು ಕುರಿತು ಚರ್ಚಿಸಲಾಗಿದೆ. ಉಕ್ರೇನ್ಗೆ ಗುಪ್ತಚರ ಮಾಹಿತಿ ಹಂಚಿಕೆ ಮುಂದುವರಿಯಲಿದೆ . ನಿರಂಕುಶಾಧಿಕಾರದ ವಿರುದ್ಧ ನಡೆಯುತ್ತಿರುವ ಸ್ವಾತಂತ್ರ್ಯ ಹೋರಾಟ ಇದಾಗಿದ್ದು ಈ ಯುದ್ಧದಲ್ಲಿ ಉಕ್ರೇನ್ ಮುಂಚೂಣಿಯಲ್ಲಿದೆ ಎಂದರು. ರಶ್ಯದ ಯುದ್ಧದ ಪರಿಣಾಮ ಉಕ್ರೇನ್ ದೇಶವನ್ನೂ ಮೀರಿದೆ. 

ಇದರಿಂದ ಉಂಟಾಗಿರುವ ಆಹಾರದ ಬಿಕ್ಕಟ್ಟು ವಿಶ್ವದೆಲ್ಲೆಡೆಯ ಬಡಜನವರಿಗೆ ವಿನಾಶಕಾರಿಯಾಗಿ ಪರಿಣಮಿಸಲಿದೆ. ಪುಟಿನ್ ಅವರ ಕ್ರೂರ ಯುದ್ಧ ಉಕ್ರೇನ್ ಜನರ ವಿರುದ್ಧದ ಯುದ್ಧ ಮಾತ್ರವಲ್ಲ, ಇದು ವಿಶ್ವದ ಅತ್ಯಂತ ದುರ್ಬಲ, ಬಡ ಜನರ ವಿರುದ್ಧದ ಯುದ್ಧವೂ ಆಗಿದೆ. ತನ್ನಿಂದಾಗಿ ವಿಶ್ವದ ಜನತೆ ಉಪವಾಸ ಬಿದ್ದರೂ ಪುಟಿನ್ಗೆ ಯಾವುದೇ ಪಶ್ಚಾತ್ತಾಪ ಆಗದು ಎಂದು ಜಿಮ್ ಮೆಕ್ಗವರ್ನ್ ಹೇಳಿದ್ದಾರೆ. ಬಳಿಕ ಈ ನಿಯೋಗ ಪೋಲ್ಯಾಂಡ್ಗೆ ತೆರಳಿ ಅಧ್ಯಕ್ಷ ಆ್ಯಂಡ್ರೆರ್ ಡ್ಯುಡಾ ಹಾಗೂ ಇತರ ಪ್ರಮುಖ ರಾಜಕೀಯ ಮುಖಂಡರನ್ನು ಭೇಟಿಯಾಗುವ ಕಾರ್ಯಕ್ರಮವಿದೆ. ಉಕ್ರೇನ್ ಮೇಲಿನ ರಶ್ಯ ಆಕ್ರಮಣದ ಬಳಿಕ ಉಕ್ರೇನ್ನಿಂದ 3 ಮಿಲಿಯಕ್ಕೂ ಅಧಿಕ ನಿರಾಶ್ರಿತರು ನೆರೆದೇಶ ಪೋಲ್ಯಾಂಡ್ಗೆ ಪಲಾಯನ ಮಾಡಿದ್ದಾರೆ. 

ಸ್ವಾತಂತ್ರ್ಯದ ಹೋರಾಟಕ್ಕೆ ಬೆಂಬಲ: ಪೆಲೋಸಿ

ಉಕ್ರೇನ್ ನಡೆಸುತ್ತಿರುವ ಸ್ವಾತಂತ್ರ್ಯದ ಹೋರಾಟಕ್ಕೆ ಅಮೆರಿಕದ ಬೆಂಬಲವಿದೆ ಎಂದು ಅಮೆರಿಕ ಸಂಸತ್ನ ಸ್ಪೀಕರ್ ನ್ಯಾನ್ಸಿ ಪೆಲೋಸಿ ಹೇಳಿದ್ದಾರೆ. ರವಿವಾರ ಉಕ್ರೇನ್ಗೆ ಭೇಟಿ ನೀಡಿ ಅಧ್ಯಕ್ಷ ವೊಲೊದಿಮಿರ್ ಝೆಲೆನ್ಸ್ಕಿಯನ್ನು ಭೇಟಿಯಾಗಿ ಮಾತುಕತೆ ನಡೆಸಿದ ಸಂದರ್ಭ ಪೆಲೋಸಿ ಈ ಭರವಸೆ ನೀಡಿದ್ದಾರೆ ಎಂದು ಅಮೆರಿಕ ಮತ್ತು ಉಕ್ರೇನ್ ಅಧಿಕಾರಿಗಳು ಹೇಳಿದ್ದಾರೆ. 

ಸ್ವಾತಂತ್ರ್ಯಕ್ಕಾಗಿ ನೀವು ನಡೆಸುತ್ತಿರುವ ಹೋರಾಟಕ್ಕಾಗಿ ನಿಮ್ಮನ್ನು ಅಭಿನಂದಿಸಲು ನಾವಿಲ್ಲಿಗೆ ಆಗಮಿಸಿದ್ದೇವೆ. ಹೋರಾಟ ಯಶಸ್ವಿಯಾಗುವವರೆಗೂ ನಿಮ್ಮೊಂದಿಗೆ ನಾವಿರುತ್ತೇವೆ ಎಂದು ಪೆಲೋಸಿ ಹೇಳಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿರುವ ಝೆಲೆನ್ಸ್ಕಿ ‘ ನಮ್ಮ ದೇಶದ ಸಾರ್ವಭೌಮತೆ ಮತ್ತು ಸಮಗ್ರತೆಯ ರಕ್ಷಣೆಗಾಗಿ ನಡೆಸುತ್ತಿರುವ ಹೋರಾಟಕ್ಕೆ ಬೆಂಬಲ ನೀಡಿರುವುದಕ್ಕೆ ಅಮೆರಿಕಕ್ಕೆ ಧನ್ಯವಾದಗಳು. 

ರಶ್ಯದ ಆಕ್ರಮಣವನ್ನು ವಿರೋಧಿಸುವ ಅಭಿಯಾನಕ್ಕೆ ಅಮೆರಿಕ ಸಶಕ್ತ ನೇತೃತ್ವ ವಹಿಸಿದೆ ಎಂದು ಟ್ವೀಟ್ ಮಾಡಿದ್ದಾರೆ. ಅಮೆರಿಕ ಸಂಸತ್ತಿನ ನಿಯೋಗದ ಈ ಭೇಟಿ ಪೂರ್ವ ನಿಗದಿತವಾಗಿರಲಿಲ್ಲ. ಉಕ್ರೇನ್ಗೆ ಹೆಚ್ಚುವರಿ ನೆರವು ಒದಗಿಸುವ ಅಧ್ಯಕ್ಷ ಬೈಡನ್ ಅವರ ಕೋರಿಕೆಗೆ ಅಮೆರಿಕದ ಸಂಸತ್ತು ಅನುಮೋದನೆ ನೀಡಲಿದೆ ಎಂಬ ಭರವಸೆಯನ್ನು ಉಕ್ರೇನ್ಗೆ ರವಾನಿಸಿದ್ದೇವೆ ಎಂದು ಪೆಲೋಸಿ ಅವರ ಕಚೇರಿಯ ಹೇಳಿಕೆ ತಿಳಿಸಿದೆ.