ಉಕ್ರೇನ್: ರಶ್ಯ ದಾಳಿಯಲ್ಲಿ ಪ್ರಮುಖ ಸೇತುವೆ ಧ್ವಂಸ

ಕೀವ್, ಮೇ 2: ನೈಋತ್ಯ ಉಕ್ರೇನ್ ನ ಒಡೆಸಾ ಪ್ರಾಂತದಲ್ಲಿ ರಕ್ಷಣಾ ಕಾರ್ಯತಂತ್ರದಲ್ಲಿ ಅತ್ಯಂತ ಮಹತ್ವ ಪಡೆದಿರುವ ಸೇತುವೆಯೊಂದನ್ನು ರಶ್ಯ ಸೇನೆ ಕ್ಷಿಪಣಿ ಪ್ರಯೋಗಿಸಿ ಧ್ವಂಸಗೊಳಿಸಿುವುದಾಗಿ ಅಧಿಕಾರಿಗಳು ಹೇಳಿದ್ದಾರೆ.

ಡಿನಿಸ್ಟರ್ ನದಿಗೆ ನಿರ್ಮಿಸಿರುವ ಈ ಸೇತುವೆ ರಕ್ಷಣಾ ಕಾರ್ಯತಂತ್ರದಲ್ಲಿ ಅತ್ಯಂತ ಪ್ರಾಮುಖ್ಯತೆ ಪಡೆದಿದೆ. ಸೋಮವಾರ ಬೆಳಿಗ್ಗೆ ಸೇತುವೆಯನ್ನು ಗುರಿಯಾಗಿಸಿ ರಶ್ಯ ಸೇನೆ ನಡೆಸಿದ ಕ್ಷಿಪಣಿ ಮತ್ತು ಬಾಂಬ್ ದಾಳಿಯಲ್ಲಿ ಸೇತುವೆ ಧ್ವಂಸಗೊಂಡಿದ್ದು ಹಲವಾರು ನಾಗರಿಕರು ಮೃತಪಟ್ಟಿದ್ದಾರೆ ಎಂದು ಸ್ಥಳೀಯ ಅಧಿಕಾರಿಗಳನ್ನು ಉಲ್ಲೇಖಿಸಿ ರಾಯ್ಟರ್ಸ್ ವರದಿ ಮಾಡಿದೆ. 
ರಶ್ಯ-ಉಕ್ರೇನ್ ನಡುವಿನ ಯುದ್ಧವು ಸೋಮವಾರ 68ನೇ ದಿನಕ್ಕೆ ಮುಂದುವರಿದಿದ್ದು , ರಶ್ಯ ಸೇನೆಯ ಮುತ್ತಿಗೆಗೆ ಒಳಗಾಗಿರುವ ಆಯಕಟ್ಟಿನ ಬಂದರು ನಗರ ಮರಿಯುಪೋಲ್ ನ ಉಕ್ಕುಸ್ಥಾವರದೊಳಗೆ ಸಿಕ್ಕಿಬಿದ್ದಿರುವ ಸುಮಾರು 100 ನಾಗರಿಕರನ್ನು ಅಲ್ಲಿಂದ ಸುರಕ್ಷಿತವಾಗಿ ಸ್ಥಳಾಂತರಗೊಳಿಸಲಾಗಿದೆ ಎಂದು ಉಕ್ರೇನ್ ಅಧಿಕಾರಿಗಳು ಹೇಳಿದ್ದಾರೆ.