ಭತ್ತದ ಬೆಂಬಲ ಬೆಲೆಗಾಗಿ ಶೀಘ್ರವೇ ಪ್ರಸ್ತಾಪ ಕಳುಹಿಸಲು ಸೂಚನೆ: ಉಡುಪಿ ತಾಪಂ ತ್ರೈಮಾಸಿಕ ಕೆಡಿಪಿ
ಉಡುಪಿ : ಈ ಮುಂಗಾರುವಿನಲ್ಲಿ ಜಿಲ್ಲೆಯ ರೈತರು ಬೆಳೆದ ಭತ್ತವನ್ನು ಸರಕಾರದ ಬೆಂಬಲ ಬೆಲೆಯಲ್ಲಿ ಖರೀದಿಸಲು ಅನುಕೂಲ ವಾಗುವಂತೆ, ಆಹಾರ ಸಚಿವ ಉಮೇಶ್ ಕತ್ತಿ ಅವರು ನೀಡಿದ ಸೂಚನೆಯಂತೆ ಶೀಘ್ರವೇ ಪ್ರಸ್ತಾಪವೊಂದನ್ನು ಸರಕಾರಕ್ಕೆ ಕಳುಹಿಸುವಂತೆ ಉಡುಪಿ ಶಾಸಕ ಕೆ.ರಘುಪತಿ ಭಟ್ ಇಂದು ಸಂಬಂಧಿತ ಇಲಾಖೆಗಳ ಅಧಿಕಾರಿಗಳಿಗೆ ಸೂಚನೆ ಗಳನ್ನು ನೀಡಿದ್ದಾರೆ.
ಉಡುಪಿಯ ತಾಲೂಕು ಪಂಚಾಯತ್ ಸಭಾಂಗಣದಲ್ಲಿ ಇಂದು ನಡೆದ ಉಡುಪಿ ತಾಲೂಕು ಮಟ್ಟದ ತ್ರೈಮಾಸಿಕ ಕರ್ನಾಟಕ ಅಭಿವೃದ್ಧಿ ಕಾರ್ಯಕ್ರಮಗಳ ಪ್ರಗತಿ ಪರಿಶೀಲನಾ ಸಭೆಯಲ್ಲಿ ಅವರು ಕೃಷಿ ಇಲಾಖೆಗೆ ಸಂಬಂಧಿಸಿದ ಚರ್ಚೆಯ ವೇಳೆ ಈ ಸೂಚನೆಗಳನ್ನು ನೀಡಿದರು.
ಕಾಪು ಶಾಸಕ ಲಾಲಾಜಿ ಆರ್ ಮೆಂಡನ್ ಅಧ್ಯಕ್ಷತೆಯಲ್ಲಿ ಸುಮಾರು ಎರಡು ವರ್ಷಗಳ ನಂತರ ಉಡುಪಿ ತಾಲೂಕು ಮಟ್ಟದ ತ್ರೈಮಾಸಿಕ ಕೆಡಿಪಿ ಸಭೆ ಮಂಗಳವಾರ ನಡೆಯಿತು.
ಸರಕಾರದ ಬೆಂಬಲ ಬೆಲೆಯ ಘೋಷಣೆ ಸಾಧಾರಣವಾಗಿ ಡಿಸೆಂಬರ್- ಜನವರಿ ತಿಂಗಳಲ್ಲಿ ಆಗುತಿದ್ದು, ಇದರಿಂದ ಜಿಲ್ಲೆಯ ರೈತರಿಗೆ ಯಾವುದೇ ಪ್ರಯೋಜನವಾಗುವುದಿಲ್ಲ. ಜನವರಿ ತಿಂಗಳಲ್ಲಿ ಜಿಲ್ಲೆಯ ರೈತರ ಒಂದು ಕೆ.ಜಿ. ಭತ್ತ ಬೆಂಬಲ ಬೆಲೆಯಲ್ಲಿ ಖರೀದಿಗೆ ಸಿಗುವುದಿಲ್ಲ ಎಂದು ರಘುಪತಿ ಭಟ್ ತಿಳಿಸಿದರು.
ಜಿಲ್ಲೆಯ ರೈತರಿಗೆ ಅನುಕೂಲವಾಗಬೇಕಿದ್ದರೆ ಸೆಪ್ಟೆಂಬರ್-ಅಕ್ಟೋಬರ್ ತಿಂಗಳಲ್ಲೇ ಬೆಂಬಲ ಬೆಲೆ ಘೋಷಣೆ ಯಾಗಿ ಖರೀದಿಗೆ ಸರಕಾರ ಮುಂದಾಗಬೇಕು. ಇತ್ತೀಚೆಗೆ ಸಚಿವ ಕತ್ತಿ ಜಿಲ್ಲೆಗೆ ಭೇಟಿ ನೀಡಿದಾಗ ಈ ಬಗ್ಗೆ ಚರ್ಚಿಸಲಾಗಿದೆ. ಕೂಡಲೇ ಪ್ರಸ್ತಾಪವೊಂದನ್ನು ಕಳುಹಿಸುವಂತೆ ಅವರು ಸೂಚಿಸಿದ್ದರು. ಇದರಂತೆ ಕೂಡಲೇ ಪ್ರಸ್ತಾಪವೊಂದನ್ನು ಸಿದ್ಧಪಡಿಸಿ ಕಳುಹಿಸಿ ಕೊಡುವಂತೆ ಭಟ್ ಕೃಷಿ ಮತ್ತು ಆಹಾರ ಮತ್ತು ನಾಗರಿಕ ಸರಬರಾಜು ಇಲಾಖೆ ಅಧಿಕಾರಿಗಳಿಗೆ ಸೂಚಿಸಿದರು.
ಈ ಬಾರಿ ಬಿತ್ತನೆ ಬೀಜಕ್ಕೆ ಯಾವುದೇ ಕೊರತೆ ಇಲ್ಲ. ೮೨೦ ಕ್ವಿಂಟಾಲ್ ಬಿತ್ತನೆ ಬೀಜದ ಸರಬರಾಜು ಆಗಿದ್ದು, ೧೪೦ ಕ್ವಿಂಟಾಲ್ ಇನ್ನೂ ದಾಸ್ತಾನು ಇದೆ ಎಂದು ಇಲಾಖೆಯ ಸಹಾಯಕ ನಿರ್ದೇಶಕ ಮೋಹನರಾಜ್ ಸಭೆಗೆ ತಿಳಿಸಿದರು. ತಾಲೂಕಿನಲ್ಲಿ ಇದುವರೆಗೆ ೨೬೪ಮಿ.ಮೀ. ಮಳೆಯಾಗಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ ೩೯೬ಮಿ.ಮೀ. ಮಳೆಯಾಗಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ಬಾರಿ ೧೩೨ಮಿ.ಮೀ. ಕಡಿಮೆ ಮಳೆಯಾಗಿದ್ದರೆ, ವಾಡಿಕೆ ಮಳೆಗಿಂತ ೧೫೨ಮಿ.ಮೀ. ಹೆಚ್ಚು ಮಳೆಯಾಗಿದೆ ಎಂದವರು ವಿವರಿಸಿದರು.
ರೈತರ ಅಕಸ್ಮಿಕ ಮರಣದ ಎಂಟು ಪ್ರಕರಣಗಳು ವರದಿಯಾಗಿದ್ದು, ಇವುಗಳಿಗೆಲ್ಲಾ ನಿಗದಿತ ಪರಿಹಾರವನ್ನು ವಿತರಿಸಲಾಗಿದೆ. ಕಾಪು ತಾಲೂಕಿನಲ್ಲಿ ಮೂರು ಪ್ರಕರಣಗಳು ವರದಿಯಾಗಿವೆ ಎಂದು ಮೋಹನರಾಜ್ ತಿಳಿಸಿದರು.
ಲಸಿಕೆ ನೀಡಿಕೆಯಲ್ಲಿ ಉತ್ತಮ ಸಾಧನೆ: ತಾಲೂಕಿನಲ್ಲಿ ಕೊರೋನ ಲಸಿಕೆಗೆ ಯಾವುದೇ ಕೊರತೆ ಇರುವುದಿಲ್ಲ. ೧೨ರಿಂದ ೧೪ ವರ್ಷ ಹಾಗೂ ೧೫ರಿಂದ ೧೮ ವರ್ಷದೊಳಗಿನ ಮಕ್ಕಳಿಗೆ ಕೋವಿಡ್ ಲಸಿಕೆ ನೀಡಿಕೆಯಲ್ಲಿ ಉತ್ತಮ ಸಾಧನೆ ಮಾಡಲಾಗಿದೆ ಎಂದು ತಾಲೂಕು ಆರೋಗ್ಯಾಧಿಕಾರಿ ಡಾ.ವಾಸುದೇವ್ ತಿಳಿಸಿದರು.
ಉಡುಪಿಯಲ್ಲೀಗ ಡೆಂಗಿ ಮತ್ತು ಮಲೇರಿಯಾ ರೋಗದ ಕುರಿತಂತೆ ಮುನ್ನೆಚ್ಚರಿಕೆಯನ್ನು ವಹಿಸಲಾಗಿದೆ. ಮಲೇರಿಯಾ ನಿಯಂತ್ರಣದಲ್ಲಿದ್ದರೆ, ಡೆಂಗಿಯ ಒಟ್ಟು ೨೧ ಪ್ರಕರಣಗಳು ಉಡುಪಿ (೧೫), ಬ್ರಹ್ಮಾವರ (೧), ಕಾಪು (೫)ವಿನಿಂದ ವರದಿಯಾಗಿದೆ.ಈ ಬಗ್ಗೆ ರಕ್ತಪರೀಕ್ಷೆ ಸೇರಿದಂತೆ ಎಲ್ಲಾ ಮುಂಜಾಗ್ರತಾ ಕ್ರಮಗಳನ್ನು ವಹಿಸಲಾಗಿದೆ ಎಂದು ಡಾ.ವಾಸುದೇತ್ ಹೇಳಿದರು.
ಸ್ಥಳೀಯರಿಗೆ ಉದ್ಯೋಗ: ನಂದಿಕೂರು ಕೈಗಾರಿಕಾ ಪ್ರದೇಶದಲ್ಲಿ ೫೦ಕ್ಕಿಂತ ಹೆಚ್ಚು ಉದ್ಯೋಗಿಗಳನ್ನು ಹೊಂದಿರುವ ಮೂರು ಕಂಪೆನಿಗಳು ಡಾ.ಸರೋಜಿನಿ ಮಹಿಷಿ ವರದಿ ಜಾರಿಗೊಳಿಸುವ ಅರ್ಹತೆ ಹೊಂದಿದ್ದು, ನಿಗದಿತ ಪ್ರಮಾಣದಲ್ಲಿ ಸ್ಥಳೀಯರಿಗೆ ಉದ್ಯೋಗ ನೀಡದ ಕಂಪೆನಿಗಳಿಗೆ ನೋಟೀಸನ್ನು ಜಾರಿಗೊಳಿಸ ಲಾಗಿದೆ ಎಂದು ಇಲಾಖೆಯ ಅಧಿಕಾರಿಗಳು ತಿಳಿಸಿದರು.
ನಂದಿಕೂರು ಮತ್ತು ಬೆಳಪು ಕೈಗಾರಿಕಾ ಪ್ರದೇಶಗಳಿಗೆ ಸಂಬಂಧಿಸಿದಂತೆ ಈಗಾಗಲೇ ಶಾಸಕರ ನೇತೃತ್ವದಲ್ಲಿ ಮೂರು ಸಭೆ ನಡೆದಿದೆ. ಎಸ್ಇಝಡ್ ಹಾಗೂ ಸುಜ್ಲಾನ್ ಕಂಪೆನಿಗಳ ಜೊತೆಗೂ ಸಭೆಯನ್ನು ನಡೆಸಲಾಗಿದೆ. ನಂದಿಕೂರು ಕೈಗಾರಿಕಾ ಪ್ರದೇಶದಲ್ಲಿ ಯಾವುದೇ ನಿವೇಶನ ಹಂಚಿಕೆಗೆ ಬಾಕಿ ಇಲ್ಲ ಎಂದು ಕೆಐಎಡಿಬಿ ತಿಳಿಸಿದೆ ಎಂದು ಅಧಿಕಾರಿ ಸಭೆಗೆ ತಿಳಿಸಿದರು.
ಸಣ್ಣ ನೀರಾವರಿ ಇಲಾಖೆಯಿಂದ ತಾಲೂಕಿನಲ್ಲಿ ೪೪ ಕಿಂಡಿ ಅಣೆಕಟ್ಟುಗಳಿದ್ದು, ಇವುಗಳ ಬಗ್ಗೆ ಸಂಪೂರ್ಣ ಮಾಹಿತಿಗಳನ್ನು ಸಂಬಂಧಪಟ್ಟ ಗ್ರಾಪಂಗಳಿಗೆ ನೀಡಲಾಗಿದೆ ಎಂದು ಇಲಾಖೆಯ ಇಂಜಿನಿಯರ್ ಸಭೆಗೆ ತಿಳಿಸಿದರು. ಕೆಲವು ಅಣೆಕಟ್ಟು ದುರಸ್ಥಿಗೊಳ್ಳಬೇಕಿದ್ದು, ನೀರು ಕಡಿಮೆಯಾದಾಗ ರಿಪೇರಿ ಮಾಡಿಸುವುದಾಗಿ ಅಧಿಕಾರಿ ಲಾಲಾಜಿ ಮೆಂಡನ್ಗೆ ಉತ್ತರಿಸಿದರು.
ಈ ವಾರ ಉಡುಪಿಯಲ್ಲಿ ಮೊದಲ ಬಾರಿ ಮಾವು ಮೇಳವನ್ನು ಆಯೋಜಿಸಿದ್ದು, ಇದಕ್ಕೆ ಜನರಿಂದ ಅತ್ಯುತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ರಾಮನಗರದ ರೈತರು ತಮ್ಮ ಎಫ್ಪಿಓ ಮೂಲಕ ಒಟ್ಟು ೩೦ರಿಂದ ೩೫ ಟನ್ ಮಾವಿನ ಹಣ್ಣುಗಳನ್ನು ಇಲ್ಲಿ ಮಾರಾಟ ಮಾಡಿದ್ದಾರೆ. ಇದೇ ವಾರ ಹಲಸು ಮೇಳವನ್ನು ಆಯೋಜಿಸಲಾಗುತ್ತಿದೆ ಎಂದು ತೋಟಗಾರಿಕಾ ಇಲಾಖೆ ಅಧಿಕಾರಿ ತಿಳಿಸಿದರು.
ವಾರಾಹಿ ನೀರು ಯೋಜನೆ: ವಾರಾಹಿಯಿಂದ ಪೈಪ್ ಮೂಲಕ ನೀರು ತರಿಸುವ ಯೋಜನೆಯ ಕಾಮಗಾರಿ ಹಾವಂಜೆ ಮತ್ತು ಆರೂರು ಗ್ರಾಪಂ ವ್ಯಾಪ್ತಿಯಲ್ಲಿ ಮಾತ್ರ ನಡೆಯುತ್ತಿದೆ. ಉಳಿದ ೧೭ ಗ್ರಾಪಂಗಳಲ್ಲಿ ತಾಂತ್ರಿಕ ಕಾರಣದಿಂದ ಪ್ರಾರಂಭಗೊಂಡಿಲ್ಲ. ಶೀಘ್ರವೇ ನಡೆಸಿ ಮಾರ್ಚ್ ವೇಳೆಗೆ ಪೂರ್ಣಗೊಳಿಸುವುದಾಗಿ ಗ್ರಾಮೀಣ ನೀರು ಸರಬರಾಜು ಇಲಾಖೆಯ ಇಂಜಿನಿಯರ್ ತಿಳಿಸಿದರು. ಹೀಗಾದರೆ ಇನ್ನು ಎರಡು ವರ್ಷ ಕಳೆದರೂ ಓವರ್ಹೆಡ್ ಟ್ಯಾಂಕ್ ಹಾಗೂ ಪೈಪ್ಲೈನ್ ಕಾಮಗಾರಿ ಮುಗಿಯಲಿಕ್ಕಿಲ್ಲ ಎಂದು ಶಾಸಕ ರಘುಪತಿ ಭಟ್ ನಿರಾಶೆ ವ್ಯಕ್ತಪಡಿಸಿದರು.
ಇದೇ ವೇಳೆ ವಾರಾಹಿ ನೀರನ್ನು ಹೆಬ್ರಿ, ಕಾರ್ಕಳ ಹಾಗೂ ಕಾಪು ತಾಲೂಕುಗಳಿಗೂ ವಾರಾಹಿಯ ಭರತ್ಕಲ್ನಿಂದ ನೀರು ತರುವ ೧೨೧೫ ಕೋಟಿ ರೂ. ಯೋಜನೆ ಅನುಷ್ಠಾನಗೊಳ್ಳುತ್ತಿದೆ ಎಂದು ಇಂಜಿನಿಯರ್ ತಿಳಿಸಿದರು.
ಸಭೆಯಲ್ಲಿ ಉಡುಪಿಯ ತಹಶೀಲ್ದಾರ್ ಅರ್ಚನಾ ಭಟ್, ಉಡುಪಿ ತಾಪಂನ ಪ್ರಭಾರ ಕಾರ್ಯನಿರ್ವಹಣಾಧಿಕಾರಿ ವಿವೇಕಾನಂದ ಗಾಂವ್ಕರ್ ಹಾಗೂ ತಾಲೂಕು ಮಟ್ಟದ ಅಧಿಕಾರಿಗಳು ಉಪಸ್ಥಿತರಿದ್ದರು.
ಶೀಘ್ರ ಸಂತೆಕಟ್ಟೆ ಓವರ್ಬ್ರಿಜ್ ಕಾಮಗಾರಿ
ಸಂತೆಕಟ್ಟೆಯ ೩೧ಕೋಟಿ ರೂ.ವೆಚ್ಚದ ಓವರ್ಬ್ರಿಜ್ ಕಾಮಗಾರಿ ಶೀಘ್ರವೇ ಪ್ರಾರಂಭಗೊಳ್ಳಲಿದೆ. ಅದೇ ರೀತಿ ೨೪ ಕೋಟಿ ರೂ.ವೆಚ್ಚದ ಕಟಪಾಡಿ ಬೈಪಾಸ್ ಹಾಗೂ ೧೯.೨೦ ಕೋಟಿ ರೂ.ವೆಚ್ಚದ ಅಂಬಲಪಾಡಿ ಬೈಪಾಸ್ ಕಾಮಗಾರಿಯೂ ವಿವಿಧ ಹಂತಗಳಲ್ಲಿದ್ದು ಸದ್ಯವೇ ಪ್ರಾರಂಭಗೊಳ್ಳಲಿದೆ ಎಂದು ರಾಷ್ಟ್ರೀಯ ಹೆದ್ದಾರಿ ವಿಭಾಗದ ಸೈಟ್ ಇಂಜಿನಿಯರ್ ಸಭೆಗೆ ತಿಳಿಸಿದರು.
ಸಂತೆಕಟ್ಟೆಯಲ್ಲಿ ಅಂಬಾಗಿಲು ಬೈಪಾಸ್ನಿಂದ ಸರ್ವಿಸ್ ರಸ್ತೆ ನಿರ್ಮಿಸುವ ಕುರಿತು ಶಾಸಕ ರಘುಪತಿ ಭಟ್ ಕೇಳಿದ ಪ್ರಶ್ನೆಗೆ ಅವರು ಸ್ಪಷ್ಟ ಉತ್ತರ ನೀಡಲಿಲ್ಲ. ಉಚ್ಚಿಲದಲ್ಲಿ ಸರ್ವಿಸ್ ರಸ್ತೆ ನಿರ್ಮಾಣಕ್ಕೆ ವಿದ್ಯುತ್ ಕಂಬವೊಂದು ತಡೆಯಾಗಿದ್ದು, ಅದನ್ನೀಗ ನಿವಾರಿಸಿದ್ದು ಶೀಘ್ರವೇ ಕಾಮಗಾರಿ ಪೂರ್ಣಗೊಳ್ಳಲಿದೆ ಎಂದರು.
