ಬಲವಂತವಿಲ್ಲದ ಧಾರ್ಮಿಕ ಮತಾಂತರವನ್ನು ನಿಷೇಧಿಸಲಾಗಿಲ್ಲ: ದಿಲ್ಲಿ ಉಚ್ಚ ನ್ಯಾಯಾಲಯ

ಹೊಸದಿಲ್ಲಿ: ಪ್ರತಿಯೊಬ್ಬ ವ್ಯಕ್ತಿಯೂ ಸಂವಿಧಾನದಡಿ ಖಾತರಿ ಪಡಿಸಲಾಗಿರುವ ಯಾವುದೇ ಧರ್ಮವನ್ನು ಆಯ್ಕೆ ಮಾಡಿಕೊಳ್ಳುವ ಅಥವಾ ಆಚರಿಸುವ ಹಕ್ಕನ್ನು ಹೊಂದಿರುವುದರಿಂದ ಬಲವಂತವಿಲ್ಲದ ಧಾರ್ಮಿಕ ಮತಾಂತರವನ್ನು ನಿಷೇಧಿಸಲಾಗಿಲ್ಲ ಎಂದು ದಿಲ್ಲಿ ಉಚ್ಚ ನ್ಯಾಯಾಲಯವು ಅಭಿಪ್ರಾಯಿಸಿದೆ ಎಂದು thehindu.com ವರದಿ ಮಾಡಿದೆ.

ಶುಕ್ರವಾರ ವಕೀಲ ಅಶ್ವಿನಿ ಉಪಾಧ್ಯಾಯ ಅವರು ಸಲ್ಲಿಸಿರುವ ಅರ್ಜಿಯ ವಿಚಾರಣೆಯನ್ನು ನಡೆಸುತ್ತಿದ್ದ ನ್ಯಾಯಮೂರ್ತಿಗಳಾದ ಸಂಜೀವ ಸಚದೇವ ಮತ್ತು ತುಷಾರರಾವ್ ಗೆದೆಲ ಅವರ ಪೀಠವು ಈ ಅಭಿಪ್ರಾಯವನ್ನು ವ್ಯಕ್ತಪಡಿಸಿತು. ಉಪಾಧ್ಯಾಯ ತನ್ನ ಅರ್ಜಿಯಲ್ಲಿ ಬೆದರಿಕೆಯೊಡ್ಡುವ ಅಥವಾ ಉಡುಗೊರೆಗಳು ಮತ್ತು ಹಣಕಾಸು ಲಾಭಗಳ ಆಮಿಷವನ್ನೊಡ್ಡಿ ವಂಚಿಸುವ ಅಥವಾ ವಾಮಾಚಾರ ಮತ್ತು ಮೂಢನಂಬಿಕೆಯನ್ನು ಬಳಸುವ ಮೂಲಕ ಧಾರ್ಮಿಕ ಮತಾಂತರಗಳನ್ನು ನಿಷೇಧಿಸಲು ಕಾನೂನುಗಳನ್ನು ರೂಪಿಸಲು ನಿರ್ದೇಶಗಳನ್ನು ಕೋರಿದ್ದಾರೆ. ಸಾಮಾಜಿಕ ಮತ್ತು ಆರ್ಥಿಕವಾಗಿ ಹಿಂದುಳಿದಿರುವ, ವಿಶೇಷವಾಗಿ ಪರಿಶಿಷ್ಟ ಜಾತಿಗಳು ಮತ್ತು ಪರಿಶಿಷ್ಟ ಪಂಗಡಗಳಿಗೆ ಸೇರಿದವರ ಸಾಮೂಹಿಕ ಮತಾಂತರಗಳು ನಡೆಯುತ್ತಿವೆ ಎಂದು ಅವರು ಅರ್ಜಿಯಲ್ಲಿ ತಿಳಿಸಿದ್ದಾರೆ.

‘ಮೊದಲನೆಯದಾಗಿ ಮತಾಂತರವನ್ನು ನಿಷೇಧಿಸಲಾಗಿಲ್ಲ. ವ್ಯಕ್ತಿಯು ಯಾವುದೇ ಧರ್ಮವನ್ನು ಆಚರಿಸಲು,ತಾನು ಹುಟ್ಟಿದ ಧರ್ಮ ಅಥವಾ ತಾನು ಆಯ್ಕೆ ಮಾಡುವ ಧರ್ಮವನ್ನು ಆಚರಿಸುವುದು ಆತನ/ಆಕೆಯ ಹಕ್ಕು ಆಗಿದೆ. ಅದು ನಮ್ಮ ಸಂವಿಧಾನವು ನೀಡಿರುವ ಸ್ವಾತಂತ್ರವಾಗಿದೆ ’ ಎಂದು ನ್ಯಾಯಾಲಯವು ಹೇಳಿತು.

ಬಲವಂತದಿಂದ ಅಥವಾ ಬೆದರಿಕೆಯನ್ನೊಡ್ಡಿ ಅಥವಾ ಹೇಗಾದರೂ ಮಾಡಿ ವ್ಯಕ್ತಿಯನ್ನು ಮತಾಂತರಿಸುವುದು ಸಂವಿಧಾನದ 14,15,21 ಮತ್ತು 25ನೇ ವಿಧಿಗಳನ್ನು ಉಲ್ಲಂಘಿಸುವುದು ಮಾತ್ರವಲ್ಲ, ಜಾತ್ಯತೀತತೆಯ ತತ್ತ್ವಗಳಿಗೂ ವಿರುದ್ಧವಾಗಿದೆ ಎಂದು ಉಪಾಧ್ಯಾಯ ಅರ್ಜಿಯಲ್ಲಿ ಹೇಳಿದ್ದಾರೆ.

ಯಾವ ಆಧಾರದಲ್ಲಿ ಇಂತಹ ಹೇಳಿಕೆಯನ್ನು ನೀಡಿದ್ದೀರಿ ಎಂದು ಅರ್ಜಿದಾರರನ್ನು ಪ್ರಶ್ನಿಸಿದ ಉಚ್ಚ ನ್ಯಾಯಾಲಯವು, ಯಾವುದೇ ದಾಖಲೆಗಳಿಲ್ಲ, ಒಂದೇ ಒಂದು ನಿದರ್ಶನವನ್ನು ನೀವು ನೀಡಿಲ್ಲ. ಈ ವಿಷಯವನ್ನು ವಿವರವಾಗಿ ಪರಿಶೀಲಿಸುವ ಅಗತ್ಯವಿದೆ ಎಂದು ಹೇಳಿತು.

ಅಂಕಿ ಅಂಶಗಳು ಎಲ್ಲಿವೆ? ಎಷ್ಟು ಮತಾಂತರಗಳು ನಡೆದಿವೆ? ಯಾರನ್ನು ಮತಾಂತರಿಸಲಾಗಿದೆ? ಸಾಮೂಹಿಕ ಮತಾಂತರಗಳು ನಡೆಯುತ್ತಿವೆ ಎಂದು ನೀವು ಹೇಳುತ್ತಿದ್ದೀರಿ. ಅಂಕಿಸಂಖ್ಯೆಗಳು ಎಲ್ಲಿವೆ ಎಂದು ನ್ಯಾಯಾಲಯವು ಅರ್ಜಿದಾರರನ್ನು ಪ್ರಶ್ನಿಸಿತು.

ಬಲವಂತದ ಮತಾಂತರಗಳ ಕುರಿತು ಸಾಮಾಜಿಕ ಮಾಧ್ಯಮಗಳ ದತ್ತಾಂಶಗಳು ತನ್ನ ಬಳಿಯಿವೆ ಎಂದು ಉಪಾಧ್ಯಾಯ ಹೇಳಿದಾಗ, ಅದನ್ನು ತಿರಸ್ಕರಿಸಿದ ನ್ಯಾಯಾಲಯವು, ಸಾಮಾಜಿಕ ಮಾಧ್ಯಮಗಳು ದತ್ತಾಂಶಗಳಲ್ಲ ಎಂದು ಹೇಳಿತು.

ತನ್ನ ಹೇಳಿಕೆಯನ್ನು ಸಮರ್ಥಿಸಿಕೊಳ್ಳಲು ವೃತ್ತಪತ್ರಿಕೆಗಳ ಪ್ರತಿಗಳನ್ನು ಒದಗಿಸುವುದಾಗಿ ಉಪಾಧ್ಯಾಯ ಹೇಳಿದಾಗ ನ್ಯಾಯಾಲಯವು, ಪತ್ರಿಕೆಗಳು, ಸಾಮಾಜಿಕ ಮಾಧ್ಯಮಗಳು ಮತ್ತು ವಾಟ್ಸ್‌ಆ್ಯಪ್ ಅನ್ನು ಸತ್ಯವೆಂದು ನೆಚ್ಚಿಕೊಳ್ಳುವಂತಿಲ್ಲ ಎನ್ನುವುದು ಕಾನೂನಿನಲ್ಲಿ ಇತ್ಯರ್ಥಗೊಂಡಿರುವ ನಿಲುವಾಗಿದೆ. ಅವು ಸತ್ಯವನ್ನು ಒಳಗೊಂಡಿರಬಹುದು ಅಥವಾ ಇಲ್ಲದಿರಬಹುದು, ಆದರೆ ಅವು ಅರ್ಜಿಯ ಆಧಾರವಾಗಿರುವಂತಿಲ್ಲ. ನೀವು ಸಚಿವಾಲಯಗಳಿಂದ ಅಥವಾ ಕೇಂದ್ರ ಸರಕಾರದಿಂದ ಮಾಹಿತಿಗಳನ್ನು ಕ್ರೋಢೀಕರಿಸಬಹುದು ಎಂದು ತಿಳಿಸಿತು.

ಎಲ್ಲ ಧರ್ಮಗಳು ನಂಬಿಕೆಗಳನ್ನು ಹೊಂದಿವೆ. ನಂಬಿಕೆಗಳು ಕೆಲವು ವೈಜ್ಞಾನಿಕ ಆಧಾರಗಳನ್ನು ಹೊಂದಿರಬಹುದು ಅಥವಾ ಇಲ್ಲದಿರಬಹುದು, ಆದರೆ ನಂಬಿಕೆಯು ವಂಚನೆ ಎಂದು ಅದರ ಅರ್ಥವಲ್ಲ. ಅದು ವ್ಯಕ್ತಿಯು ಹೊಂದಿರುವ ನಂಬಿಕೆಯಾಗಿರುತ್ತದೆ. ಆ ನಂಬಿಕೆಯಲ್ಲಿ ಯಾರನ್ನಾದರೂ ಮತಾಂತರಕ್ಕೆ ಬಲವಂತಗೊಳಿಸಿದರೆ ಅದು ಬೇರೆ ವಿಷಯವಾಗುತ್ತದೆ. ಮತಾಂತರಕ್ಕೆ ಯಾರನ್ನಾದರೂ ಬಲವಂತಗೊಳಿಸಿದ್ದರೆ ಅದು ವ್ಯಕ್ತಿಯ ವಿಶಿಷ್ಟಾಧಿಕಾರವಾಗಿದೆ ಎಂದು ನ್ಯಾಯಾಲಯವು ಹೇಳಿತು.

ಮುಂದಿನ ವಿಚಾರಣೆಯನ್ನು ಜು.25ಕ್ಕೆ ನಿಗದಿಗೊಳಿಸಿದ ಉಚ್ಚ ನ್ಯಾಯಾಲಯವು ಸರಕಾರಕ್ಕೆ ನೋಟಿಸ್ ಹೊರಡಿಸಲು ನಿರಾಕರಿಸಿತು. ನೋಟಿಸ್ ಹೊರಡಿಲಿಕ್ಕಾದರೂ ಏನಾದರೂ ಆಧಾರವಿದೆಯೇ ಎನ್ನುವುದನ್ನು ಮೊದಲು ಸ್ಪಷ್ಟಪಡಿಸಿಕೊಳ್ಳಬೇಕಿದೆ ಎಂದು ಅದು ಹೇಳಿತು.