ಮಂಗಳೂರು | ಜನಸಾಮಾನ್ಯರನ್ನು ಕಂಗೆಡಿಸಿದ ಕೃತಕ ನೆರೆ
► ಕಣ್ಣೂರು, ಕೊಟ್ಟಾರ ಚೌಕಿ ಬಳಿ ಮನೆಗಳಿಗೆ ನುಗ್ಗಿದ ನೆರೆ ನೀರು. ►ಸ್ಮಾರ್ಟ್ ಸಿಟಿ, ಅವೈಜ್ಞಾನಿಕ ಕಾಮಗಾರಿಗಳ ಬಗ್ಗೆ ಆಕ್ರೋಶ
ಮಂಗಳೂರು, ಜೂ.30: ಕಳೆದ ರಾತ್ರಿಯಿಂದ ಬಿರುಸುಗೊಂಡಿರುವ ಮುಂಗಾರು ಮಳೆಯಿಂದ ನಗರದ ಕಣ್ಣೂರು, ಕೊಟ್ಟಾರ ಸೇರಿದಂತೆ ತಗ್ಗು ಪ್ರದೇಶಗಳು ಜಲಾವೃತಗೊಂಡಿವೆ. ಕೆಲವೆಡೆ ಮನೆಗಳಿಗೆ, ಕಚೇರಿಗಳಿಗೆ ನೀರು ನುಗ್ಗಿದ್ದು, ಜನರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.
ಮುಂದಾಲೋಚನೆ ಇಲ್ಲದೆ ನಡೆಯುತ್ತಿರುವ ಸ್ಮಾರ್ಟ್ ಸಿಟಿ ಕಾಮಗಾರಿ, ರಸ್ತೆ ಅಗಲೀಕರಣ ಕಾಮಗಾರಿ, ಅಸಮರ್ಪಕ ಹೂಳೆತ್ತುವಿಕೆಯಿಂದ ಕೊಟ್ಟಾರ ಚೌಕಿ, ಕಣ್ಣೂರು ಸುತ್ತಮುತ್ತಲಿನ ನಾಗರಿಕರು ಸಂಕಷ್ಟ ಅನುಭವಿಸುತ್ತಿದ್ದು, ಜನಸಾಮಾನ್ಯರಿಂದ ಅಸಮಾಧಾನ ವ್ಯಕ್ತವಾಗುತ್ತಿದೆ.
ಕೊಟ್ಟಾರ ಚೌಕಿ ಸಮೀಪದ ಮಾಲೆಮಾರ್ ಪ್ರದೇಶ ಸುಮಾರು 3,000 ಮನೆಗಳಿಂದ ಕೂಡಿದ್ದು, ಇಲ್ಲಿ ಕಳೆದ ಸುಮಾರು ನಾಲ್ಕು ವರ್ಷಗಳಿಂದ ಕೃತಕ ನೆರೆ ಸಾಮಾನ್ಯವಾಗಿದೆ. ಇಲ್ಲಿನ ಜನರ ಧ್ವನಿಯಾಗಿ ಕೆಲವರು ಕಳೆದ ಕೆಲ ವರ್ಷಗಳಿಂದ ಸಂಬಂಧಪಟ್ಟ ಅಧಿಕಾರಿಗಳು, ಜನಪ್ರತಿನಿಧಿಗಳಿಗೆ ಮನವಿ, ಅಹವಾಲು ಸಲ್ಲಿಸುತ್ತಿದ್ದರೂ ಯಾವುದೇ ಕ್ರಮವಾಗುತ್ತಿಲ್ಲ. ಆದ್ದರಿಂದ ಇಂದು ಮತ್ತೆ ಮನೆಗಳಿಗೆ ನೀರು ನುಗ್ಗಿ ಜನರು ಅತಂತ್ರ ಸ್ಥಿತಿಯನ್ನು ಅನುಭವಿಸುವಂತಾಗಿದೆ ಎಂದು ಸ್ಥಳೀಯರು ದೂರುತ್ತಿದ್ದಾರೆ.
‘‘ಕಳೆದ ನಾಲ್ಕು ವರ್ಷಗಳಿಂದ ಇಲ್ಲಿನ ಕೃತಕ ನೆರೆಯ ಬಗ್ಗೆ ಜಿಲ್ಲಾಧಿಕಾರಿ ಸೇರಿದಂತೆ, ಎಲ್ಲಾ ಜನಪ್ರತಿನಿಧಿಗಳ ಗಮನಕ್ಕೂ ತರಲಾಗಿದೆ. ಮನವಿ ಸಲ್ಲಿಸಲಾಗಿದೆ. ಬಹು ಮುಖ್ಯವಾಗಿ ಇಲ್ಲಿನ ರಾಜಕಾಲುವೆ ಸೇರಿದಂತೆ ಮಳೆ ನೀರು ಹರಿದುಹೋಗುವ ತೋಡುಗಳಲ್ಲಿ ಅಸಮರ್ಪಕ ಹೂಳೆತ್ತುವಿಕೆಯೇ ಈ ರೀತಿ ಮಳೆ ನೀರು ಮನೆಗಳಿಗೆ ನುಗ್ಗಲು ಕಾರಣ’’ ಎಂದು ಮಾಲೆಮಾರ್ ನಿವಾಸಿ, ಆರ್ಟಿಐ ಕಾರ್ಯಕರ್ತನಾಗಿ ಕಾರ್ಯ ನಿರ್ವಹಿಸುತ್ತಿರುವ ಸುರೇಶ್ ಉಡುಪ ಪ್ರತಿಕ್ರಿಯಿಸಿದ್ದಾರೆ.
‘‘ಈ ಪ್ರದೇಶದಲ್ಲಿ ಸುಮಾರು 40 ಅಡಿ ಅಗಲ, 300 ಅಡಿ ಎತ್ತರದ ಕಾಲುವೆ ಇದೆ. ಆದರೆ ಇಲ್ಲಿ ಹೂಳೆತ್ತುವ ಕಾರ್ಯ ನಡೆಯುವುದು ಕೇವಲ ಒಂದು ಮೀಟರ್ ಗೆ ಮಾತ್ರ. ಆದರೆ ಬಿಲ್ ಮಾತ್ರ ಪೂರ್ಣ ಪ್ರಮಾಣಕ್ಕೆ ಮಾಡಲಾಗುತ್ತದೆ. ಮಂಗಳೂರನ್ನು ನೆರೆ ಪೀಡಿತ ಪ್ರದೇಶ ಎನ್ನುತ್ತಾರೆ ಕೆಲ ಅಧಿಕಾರಿಗಳು. ಆದರೆ ವಾಸ್ತವದಲ್ಲಿ ಇಲ್ಲಿ ಮಳೆ ನೀರು ಸೇರಲು ಸಮೀಪದಲ್ಲೇ ಸಮುದ್ರ ಇದೆ. ಹಾಗಾಗಿ ವ್ಯವಸ್ಥೆಗಳು ಸೂಕ್ತವಾಗಿದ್ದರೆ ಇಲ್ಲಿ ಕೃತಕ ನೆರೆ ಸಂಭವಿಸುವ ಸಾಧ್ಯತೆ ಕಡಿಮೆ. ಈ ಬಗ್ಗೆ ಜನಪ್ರತಿನಿಧಿಗಳು ಹಾಗೂ ಅಧಿಕಾರಿಗಳ ನಿರ್ಲಕ್ಷ್ಯದಿಂದ ನಾವು ಇಲ್ಲಿ ಸಮಸ್ಯೆಗಳನ್ನು ಎದುರಿಸಬೇಕಾಗುತ್ತದೆ. ಬೇಸಿಗೆ ಅವಧಿಯಲ್ಲೇ ಅಂದರೆ ಎಪ್ರಿಲ್ ತಿಂಗಳಲ್ಲೇ ನಡೆಯಬೇಕಾದ ಹೂಳೆತ್ತುವ ಕಾರ್ಯ ಇಲ್ಲಿ ನಡೆಯುವುದೇ ಮಳೆಗಾಲ ಆರಂಭವಾದ ಬಳಿಕ, ಅದೂ ಅರ್ಧಂಬರ್ಧ. ನಾವು ಪ್ರತಿ ಬಾರಿ ಮನವಿ ಮಾಡಿದಾಗಲೂ ಆಶ್ವಾಸನೆ ಮಾತ್ರ ನೀಡಲಾಗುತ್ತದೆ. ನಮಗೆ ಆಶ್ವಾಸನೆ ಬೇಡ, ನಮಗೆ ಕೆಲಸ ಆಗಬೇಕು’’ ಎಂದು ಸುರೇಶ್ ಉಡುಪ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
‘‘ಬೇಸಿಗೆಯಲ್ಲಿ ಎಲ್ಲಾ ಅಧಿಕಾರಿಗಳು, ಜನಪ್ರತಿನಿಧಿಗಳು ಈ ಸಮಸ್ಯೆಯನ್ನು ಮರೆತು ಬಿಡುತ್ತಾರೆ. ಅವೈಜ್ಞಾನಿಕವಾಗಿ ಕೆಲಸ ಮಾಡುತ್ತಾರೆ. ಸರಕಾರದ ಹಣವನ್ನು ಜನರ ಸಮಸ್ಯೆಗಳನ್ನು ನಿವಾರಿಸಲು ಸರಿಯಾದ ಕಾಮಗಾರಿಗಳಿಗೆ ಉಪಯೋಗಿಸಬೇಕು. ನಾನು ಇಂದು ಬೆಳಗ್ಗೆ ಸುಮಾರು ಎರಡು ಗಂಟೆಗಳ ಕಾಲ ಎಲ್ಲಾ ಜನಪ್ರತಿನಿಧಿಗಳು, ಅಧಿಕಾರಿಗಳಿಗೆ ಕರೆ ಮಾಡಿದ್ದೇನೆ. ಕೆಲವರು ಮಾತ್ರವೇ ಕರೆ ಸ್ವೀಕರಿಸಿದ್ದಾರೆ. ತುರ್ತು ಸಂದರ್ಭದಲ್ಲಿ ಜನರ ಸಮಸ್ಯೆಗಳಿಗೆ ಸ್ಪಂದಿಸಲು ಕೂಡಾ ಇವರಿಗೆ ಸಮಯ ಇರುವುದಿಲ್ಲ’’ ಎಂದು ಸ್ಥಳೀಯ ನಾಗರಿಕರೊಬ್ಬರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಇಲ್ಲಿ ಸಮಸ್ಯೆ ಬಗೆಹರಿಸುವ ನಿಟ್ಟಿನಲ್ಲಿ ಹಣ ಪ್ರತಿವರ್ಷ ಮಂಜೂರು ಮಾಡಲಾಗುತ್ತದೆ. ಆದರೆ ವಿನಿಯೋಗ ಸರಿಯಾಗಿ ಆಗುತ್ತಿಲ್ಲ. ನಾವೆಷ್ಟೇ ಪ್ರಯತ್ನ ಪಟ್ಟರು, ಹೋರಾಟ ಮಾಡಿದರೂ ನಮ್ಮ ಸಮಸ್ಯೆಯನ್ನು ಬಗಹರಿಸಲಾಗುತ್ತಿಲ್ಲ ಎಂದು ಇನ್ನೋರ್ವ ಸ್ಥಳೀಯರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಪಡೀಲ್ ಕಣ್ಣೂರು ಬಳಿಯೂ ಕೃತಕ ನೆರೆಯಿಂದ ಹಲವು ಕಚೇರಿ, ಅಂಗಡಿ ಮುಂಗಟ್ಟುಗಳಿಗೆ ನೀರು ನುಗ್ಗಿದೆ.
ತೆರಿಗೆ ಹಣದಲ್ಲಿ ಕಾಮಗಾರಿ ಮಾಡಿ ಫ್ಲೆಕ್ಸ್ ಹಾಕಿಸಿಕೊಳ್ಳುವವರೇ ಇತ್ತ ನೋಡಿ!
‘‘ಜನರ ತೆರಿಗೆ ಹಣದಲ್ಲಿ ಕಾಮಗಾರಿ ಮಾಡಿ ಫ್ಲೆಕ್ಸ್ ಹಾಕಿಸಿಕೊಳ್ಳುವ ಜನಪ್ರತಿನಿಧಿಗಳೇ ಜನರ ಸಮಸ್ಯೆಯನ್ನು ಗಮನಿಸಿ. ನಿಯಮದ ಪ್ರಕಾರ ಫ್ಲೆಕ್ಸ್ ಹಾಕಲು ಅನುಮತಿಯೇ ಇಲ್ಲ. ಆದರೂ ಹಾಕುತ್ತಿರುವುದು ಅದು ನಿಮ್ಮ ಹಣೆಬರಹ. ಆದರೆ ಜನರ ಸಮಸ್ಯೆಗಳ ಬಗ್ಗೆ ಗಮನ ಹರಿಸಿ. ಜನರ ತೆರಿಗೆ ಹಣದ ದುಡ್ಡನ್ನು ಸರಿಯಾಗಿ ವಿನಿಯೋಗಿಸಿ’’
-ಶಶಿಧರ ಶೆಟ್ಟಿ, ಸಾಮಾಜಿಕ ಕಾರ್ಯಕರ್ತ, ಪರಿಸರ ಹೋರಾಟಗಾರರು.
