ಪ್ಲಾಸ್ಟಿಕ್ ನ ಜೈವಿಕ ವಿಘಟನೆಯ ಪರಿಣಾಮಕಾರಿ ವಿಧಾನ ಅನ್ವೇಷಣೆ: ಬ್ರಿಟನ್ ನ ಸಂಶೋಧನಾ ವರದಿ

ಲಂಡನ್, ಜು.5: ಅಲ್ಟ್ರಾವಯಲೆಟ್ (ನೇರಳಾತೀತ) ಬೆಳಕನ್ನು ಬಳಸಿ ಪ್ಲಾಸ್ಟಿಕ್ನ ಜೈವಿಕ ವಿಘಟನೆಯ ಅತ್ಯಂತ ಪರಿಣಾಮಕಾರಿ ವಿಧಾನವನ್ನು ಬ್ರಿಟನ್ನ ಸಂಶೋಧಕರು ಕಂಡುಹಿಡಿದಿರುವುದಾಗಿ ವರದಿಯಾಗಿದೆ.

 ‌
ಪಾಲಿಮರ್ಗೆ ಸಕ್ಕರೆಯ ಘಟಕಗಳನ್ನು ಸೇರಿಸುವುದರಿಂದ ಅದನ್ನು ಅಲ್ಟ್ರಾವಯಲೆಟ್ ಬೆಳಕಿಗೆ ಒಡ್ಡಿದಾಗ ವಿಘಟನೀಯತೆ ಹೆಚ್ಚುತ್ತದೆ ಎಂದು ಬ್ರಿಟನ್ನ ಬಾತ್ ವಿವಿಯ ಸಂಶೋಧಕರು ನಡೆಸಿದ ಅಧ್ಯಯನದಲ್ಲಿ ತಿಳಿದುಬಂದಿದೆ.
 
ಅಲ್ಟ್ರಾವಯಲೆಟ್ ವಿಕಿರಣವು 10 ನ್ಯಾನೊಮೀಟರ್ಗಳಿಂದ 400 ನ್ನಾನೊಮೀಟರ್ವರೆಗಿನ ತರಂಗಾಂತರವನ್ನು ಹೊಂದಿದ್ದು ಗೋಚರ ಬೆಳಕಿಗಿಂತ ಚಿಕ್ಕದಾಗಿದೆ. ಆದರೆ ಎಕ್ಸ್ರೇ(ಎಕ್ಸ್ ಕಿರಣ)ಗಿಂತ ದೊಡ್ಡದಾಗಿದೆ. ಜೈವಿಕ ವಿಘಟನೀಯ ಅಂಶ ಹೊಂದಿರುವ ಪ್ಲಾಸ್ಟಿಕ್ಗಳನ್ನು ಮಾತ್ರ ಮರುಬಳಕೆ ಮಾಡಬಹುದಾಗಿದೆ. ಪ್ಲಾಸ್ಟಿಕ್ ತ್ಯಾಜ್ಯಗಳ ವಿಸಯದಲ್ಲಿ ಜನರಿಗಿರುವ ಆತಂಕದ ಕಾರಣ ಪಾಲಿಲ್ಯಾಕ್ಟಿನ್ ಆ್ಯಸಿಡ್ ಬಳಕೆ ಹೆಚ್ಚಿದೆ ಎಂದು ಸಂಶೋಧಕರು ಹೇಳಿದ್ದಾರೆ. ‘ಕೆಮಿಕಲ್ ಕಮ್ಯುನಿಕೇಷನ್ಸ್’ ಎಂಬ ಪತ್ರಿಕೆಯಲ್ಲಿ ಪ್ರಕಟವಾದ ಸಂಶೋಧನಾ ವರದಿಯು ಪರಿಸರದಲ್ಲಿ ಈ ಪಾಲಿಮರ್ ಅಂಶಗಳು ವಿಘಟನೆಗೊಳ್ಳುವ ಪ್ರಮಾಣವನ್ನು ವಿವರಿಸಿದೆ. 

ಪಾಲಿಮರ್ಗೆ ವಿವಿಧ ಪ್ರಮಾಣದಲ್ಲಿ ಸಕ್ಕರೆ ಅಣುಗಳನ್ನು ಸೇರಿಸುವ ಮೂಲಕ, ಪ್ಲಾಸ್ಟಿಕ್ ಕ್ಷೀಣಿಸುವ ವೇಗವನ್ನು ಹೆಚ್ಚಿಸಬಹುದು ಎಂದು ಮಾಹಿತಿ ನೀಡಲಾಗಿದೆ. ಪಾಲಿಮರ್ಗೆ ಕೇವಲ 3%ದಷ್ಟು ಸಕ್ಕರೆ ಘಟಕಗಳನ್ನು ಸೇರಿಸಿ ಅದನ್ನು ಅಲ್ಟ್ರಾವಯಲೆಟ್ ವಿಕಿರಣಕ್ಕೆ ಒಡ್ಡಿದಾಗ ಅದು ಕ್ಷೀಣಿಸುವ ಪ್ರಮಾಣ 40%ದಷ್ಟು ಹೆಚ್ಚುತ್ತದೆ ಎಂದು ಸಂಶೋಧಕರು ಹೇಳಿದ್ದಾರೆ.