ಚೀನಾದಿಂದ ಇನ್ನಷ್ಟು ಸಾಲ ಪಡೆಯದಂತೆ ಪಾಕ್‌ಗೆ ಸೂಚಿಸಲು ಐಎಂಎಫ್ ನಿರ್ಧಾರ
ಇಸ್ಲಮಾಬಾದ್, ಜು.6: ಪಾಕಿಸ್ತಾನವು ಚೀನಾದಿಂದ ಇನ್ನಷ್ಟು ಸಾಲ ಪಡೆಯುವುದನ್ನು ನಿಷೇಧಿಸಲು ಅಂತರಾಷ್ಟ್ರೀಯ ಹಣಕಾಸು ಸಂಸ್ಥೆ ಉದ್ದೇಶಿಸಿದೆ ಎಂದು ವರದಿಯಾಗಿದೆ.
ಚೀನಾ ಪಾಕಿಸ್ತಾನ ಆರ್ಥಿಕ ಕಾರಿಡಾರ್(ಸಿಪಿಇಸಿ)ಗೆ 7.9 ಬಿಲಿಯನ್ ರೂಪಾಯಿ ಮೊತ್ತದ ಸಾಲವನ್ನು ಚೀನಾದಿಂದ ಪಡೆಯಲು ಪಾಕಿಸ್ತಾನ ನಿರ್ಧರಿಸಿದ್ದು ಈಗ ಇದಕ್ಕೆ ಅಂತರಾಷ್ಟ್ರೀಯ ಹಣಕಾಸು ಸಂಸ್ಥೆಯ (ಐಎಂಎಫ್) ಶಿಫಾರಸಿನ ಅಗತ್ಯ ಬೀಳಲಿದೆ.
ತೀವ್ರ ಆರ್ಥಿಕ ಬಿಕ್ಕಟ್ಟು ಎದುರಿಸುತ್ತಿರುವ ಪಾಕಿಸ್ತಾನ ಐಎಂಎಫ್‌ನ ಆರ್ಥಿಕ ನೆರವನ್ನು ಎದುರು ನೋಡುತ್ತಿದೆ. ಆದರೆ ಚೀನಾದಿಂದ ಮಿತಿಮೀರಿ ಸಾಲ ಪಡೆಯುತ್ತಿರುವುದನ್ನು ಆಕ್ಷೇಪಿಸಿರುವ ಐಎಂಎಫ್ , ಚೀನಾದ ಇಂಡಿಪೆಂಡೆಂಟ್ ಪವರ್ ಪ್ರೊಡ್ಯೂಸರ್ಸ್ ಸಂಸ್ಥೆಗೆ ಅಧಿಕ ಬಡ್ಡಿ ಪಾವತಿಸಿರುವುದನ್ನೂ ಆಕ್ಷೇಪಿಸಿದೆ. ವಿದ್ಯುತ್ ಯೋಜನೆಗೆ ಸಂಬಂಧಿಸಿ ಚೀನಾದೊಂದಿಗೆ ಮಾಡಿಕೊಂಡಿರುವ ಒಪ್ಪಂದಗಳನ್ನು ಮರು ರೂಪಿಸಿಕೊಳ್ಳುವಂತೆ ಪಾಕಿಸ್ತಾನಕ್ಕೆ ಸೂಚಿಸಿದೆ ಎಂದು ‘ಫೈನಾನ್ಶಿಯಲ್ ಪೋಸ್ಟ್’ ವರದಿ ಮಾಡಿದೆ
ದೇಶದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಚೀನಾದ ವಿದ್ಯುತ್ ಉತ್ಪಾದನಾ ಸಂಸ್ಥೆಗಳಿಗೆ ಪಾಕಿಸ್ತಾನ 350 ಬಿಲಿಯನ್ ರೂಪಾಯಿಗೂ ಅಧಿಕ ಮೊತ್ತದ ಸಾಲ ಪಾವತಿಸಲು ಬಾಕಿಯಿದೆ. ಸಿಪಿಇಸಿ ಯೋಜನೆಯಡಿಯ ಒಪ್ಪಂದಗಳನ್ನು ಮರು ರೂಪಿಸುವ ಪಾಕ್‌ನ ಪ್ರಸ್ತಾವನೆಯನ್ನು ಚೀನಾ ತಿರಸ್ಕರಿಸಿದೆ. ಪಾಕಿಸ್ತಾನದ ಬಜೆಟ್‌ನಲ್ಲಿ ವೆಚ್ಚಕ್ಕೆ ಮೀಸಲಿರಿಸಿದ ಅನುದಾನ 9,502 ಬಿಲಿಯನ್ ರೂಪಾಯಿ, ಇದರಲ್ಲಿ 40%ಕ್ಕೂ ಅಧಿಕ ಅಂದರೆ 3,950 ಬಿಲಿಯನ್ ರೂಪಾಯಿ ಮೊತ್ತವು ಸಾಲ ಮರುಪಾವತಿಗೆ ಮೀಸಲಾಗಿದೆ. ಇದು ಕಳೆದ ವರ್ಷಕ್ಕಿಂತ 29.1% ಹೆಚ್ಚಳವಾಗಿದೆ ಎಂದು ಮಾಧ್ಯಮಗಳು ವರದಿ ಮಾಡಿವೆ. ಪಾಕಿಸ್ತಾನದ 2022-23ನೇ ಸಾಲಿನ ಬಜೆಟ್‌ನಲ್ಲಿ ದೇಶದ ಪುನರುಜ್ಜೀವನಕ್ಕೆ ಅಡ್ಡಿಯಾಗಿರುವ ಪ್ರಮುಖ ರಚನಾತ್ಮಕ ಸಮಸ್ಯೆಗಳನ್ನು ಪರಿಹರಿಸಲು ವಿಫಲವಾಗಿರುವುದರಿಂದ ದೇಶದ ಅರ್ಥವ್ಯವಸ್ಥೆಗೆ ತೀವ್ರ ಸವಾಲು ಎದುರಾಗಿದೆ. ಆರ್ಥಿಕ ಬಿಕ್ಕಟ್ಟು, ಏರುತ್ತಿರುವ ಹಣದುಬ್ಬರ ನಿಯಂತ್ರಣ ಮೀರಿದ್ದು ದೇಶವು ಅಂತರಾಷ್ಟ್ರೀಯ ಸಾಲ ಪಾವತಿಸದೆ ಡಿಫಾಲ್ಟ್ ಪಟ್ಟಿಯಲ್ಲಿ ಕಾಣಿಸಿಕೊಳ್ಳುವ ಆತಂಕಕ್ಕೆ ಕಾರಣವಾಗಿದೆ
