ರಯಾನ್ ಗೊಸ್ಲಿಂಗ್, ಧನುಷ್ ನಡುವಿನ ಫೈಟ್ ದೃಶ್ಯ ಹಂಚಿಕೊಂಡ ನೆಟ್‌ಫ್ಲಿಕ್ಸ್; ʼದಿ ಗ್ರೇ ಮ್ಯಾನ್ʼ ನಿರೀಕ್ಷೆ ಹೆಚ್ಚಳ
ಚೆನ್ನೈ: ತಮಿಳು ಖ್ಯಾತ ನಟ ಧನುಷ್ ಹಾಲಿವುಡ್‌ ಬಿಗ್‌ ಬಜೆಟ್‌ ಚಿತ್ರದಲ್ಲಿ ನಟಿಸುತ್ತಿದ್ದು, ಚಿತ್ರದಲ್ಲಿ ಧನುಷ್ ಪಾತ್ರದ ಕೆಲವು ದೃಶ್ಯವನ್ನು ಚಿತ್ರತಂಡವು ಬಿಡುಗಡೆ ಮಾಡಿದೆ. ಜುಲೈ 22 ರಂದು ನೆಟ್‌ಫ್ಲಿಕ್ಸ್‌ನಲ್ಲಿ ಬಿಡುಗಡೆಯಾಗಲಿರುವ ʼದಿ ಗ್ರೇ ಮ್ಯಾನ್ʼ ಚಿತ್ರದಲ್ಲಿ ಧನುಷ್ ವಿಶೇಷ ಪಾತ್ರವೊಂದನ್ನು ನಿರ್ವಹಿಸಿದ್ದಾರೆ. ಚಿತ್ರದಲ್ಲಿ ಧನುಷ್ ಹಂತಕನ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದು, ಆ ಪಾತ್ರವು ಆಕ್ರಮಣಕಾರಿಯಾಗಿರಲಿದೆ ಎಂದು ಚಿತ್ರ ನಿರ್ಮಾಪಕರು ಹೇಳಿಕೊಂಡಿದ್ದಾರೆ.ʼ
ಹಾಲಿವುಡ್‌ನಲ್ಲಿ ಅನೇಕ ಸೂಪರ್‌ ಹಿಟ್‌ ಚಿತ್ರಗಳನ್ನು ನೀಡಿರುವ ರಯಾನ್ ಗೊಸ್ಲಿಂಗ್ ಮತ್ತು ಅವೇಂಜರ್ಸ್‌ ನ ಕ್ಯಾಪ್ಟನ್‌ ಅಮೇರಿಕಾ ಖ್ಯಾತಿಯ ಕ್ರಿಸ್ ಇವಾನ್ಸ್ ಹಾಗೂ ಧನುಷ್ ರನ್ನು ಒಂದೇ ತೆರಯ ಮೇಲೆ ಕಾಣಲು ಅಭಿಮಾನಿಗಳು ಉತ್ಸುಕರಾಗಿದ್ದಾರೆ. ಧನುಷ್ ಮತ್ತು ರಯಾನ್ ಗೊಸ್ಲಿಂಗ್ ನಡುವಿನ ಹೋರಾಟದ ವೀಡಿಯೊವನ್ನು ನೆಟ್‌ಫ್ಲಿಕ್ಸ್ ಹಂಚಿಕೊಂಡಿದ್ದು, ಅಭಿಮಾನಿಗಳ ಕುತೂಹಲವನ್ನು ಇಮ್ಮಡಿಗೊಳಿಸಿದೆ.
ಗ್ರೇ ಮ್ಯಾನ್ ಮಾರ್ಕ್ ಗ್ರೇನಿ ಬರೆದ ಅದೇ ಹೆಸರಿನ ಕಾದಂಬರಿಯನ್ನು ಆಧರಿಸಿದೆ. ಚಿತ್ರದಲ್ಲಿ ರಿಯಾನ್ ಗೊಸ್ಲಿಂಗ್ ಕೋರ್ಟ್ ಜೆಂಟ್ರಿ ಪಾತ್ರವನ್ನು ನಿರ್ವಹಿಸುತ್ತಿದ್ದಾರೆ. ಸಿಯೆರಾ ಸಿಕ್ಸ್ ಏಜೆಂಟ್ ಆಗಿರುವ ಗೋಸ್ಲಿಂಗ್‌ ಪಾತ್ರವನ್ನು ಹಿಡಿಯುವುದೇ ಕ್ರಿಸ್ ಇವಾನ್ಸ್ ನಿರ್ವಹಿಸಿದ ಲಾಯ್ಡ್ ಹ್ಯಾನ್ಸೆನ್ ಪಾತ್ರದ ಕೆಲಸ. ಇದರ ನಡುವೆ ಧನುಷ್ ಪಾತ್ರವೂ ಸೇರುತ್ತದೆ. ರೆಗೆ-ಜೀನ್ ಪೇಜ್, ಜೆಸ್ಸಿಕಾ ಹೆನ್ವಿಕ್, ವ್ಯಾಗ್ನರ್ ಮೌರಾ, ಆಲ್ಫ್ರೆ ವುಡಾರ್ಡ್, ಜೂಲಿಯಾ ಬಟರ್ಸ್, ಎಮೆ ಇಕ್ವಾಕೋರ್ ಮತ್ತು ಸ್ಕಾಟ್ ಹೇಜ್ ಕೂಡ ಚಿತ್ರದ ಭಾಗವಾಗಿದ್ದಾರೆ.
ವಿಶ್ವಾದ್ಯಂತ ಸಾವಿರಾರು ಕೋಟಿ ರೂ ಗಳಿಸಿರುವ ಮಾರ್ವೆಲೆ ಅವೇಂಜರ್ಸ್‌ ಖ್ಯಾತಿಯ ರುಸೋ ಬ್ರದರ್ಸ್‌ ಈ ಚಿತ್ರದ ನಿರ್ದೇಶಕರಾಗಿದ್ದು, ಭಾರತದಲ್ಲಿ ನಡೆಯಲಿರುವ ಚಿತ್ರದ ಪ್ರೀಮಿಯರ್‌ ಶೋಗೆ ಧನುಷ್ ಜೊತೆ ಅವರೂ ಸೇರಲಿದ್ದಾರೆ ಎಂದು ವರದಿಯಾಗಿದೆ. ಭಾರತಕ್ಕೆ ಬರಲು ತೀವ್ರ ಉತ್ಸುಕರಾಗಿರುವುದಾಗಿ ನಿರ್ದೇಶಕರು ಹೇಳಿದ್ದಾರೆ.
ಧನುಷ್ 2018 ರಲ್ಲಿ ʼದಿ ಎಕ್ಸ್‌ಟ್ರಾರ್ಡಿನರಿ ಜರ್ನಿ ಆಫ್ ದಿ ಫಕೀರ್ʼ ಚಿತ್ರದ ಮೂಲಕ ಅಂತರಾಷ್ಟ್ರೀಯ ಮಟ್ಟದ ಸಿನೆಮಾ ಲೋಕಕ್ಕೆ ಪಾದಾರ್ಪಣೆ ಮಾಡಿದ್ದರು.
