ಅಗತ್ಯ ವಸ್ತುಗಳ ಮೇಲೆ GST: ನಾಳೆಯಿಂದ (ಜು.18) ನಂದಿನಿ ಮೊಸರು, ಲಸ್ಸಿ, ಮಜ್ಜಿಗೆ ದರ ಏರಿಕೆ

ಬೆಂಗಳೂರು, ಜು.17: ಕೇಂದ್ರ ಸರಕಾರವು ಅಗತ್ಯ ವಸ್ತುಗಳ ಮೇಲೆ ಜಿಎಸ್ಟಿ (ಸರಕು ಹಾಗೂ ಸೇವಾ ತೆರಿಗೆ)ಯನ್ನು ವಿಧಿಸಿರುವ ಹಿನ್ನೆಲೆಯಲ್ಲಿ ‘ನಂದಿನಿ’ ಮೊಸರು, ಮಜ್ಜಿಗೆ ಮತ್ತು ಲಸ್ಸಿ ಪೊಟ್ಟಣಗಳ ದರವನ್ನು ಪರಿಷ್ಕರಿಸಿ ಬೆಲೆ ಹೆಚ್ಚಿಸಲಾಗಿದೆ.

ಈ ಕುರಿತು ಕರ್ನಾಟಕ ಸಹಕಾರಿ ಹಾಲು ಉತ್ಪಾದಕರ ಮಹಾಮಂಡಳಿ ನಿಯಮಿತ (ಕೆಎಂಎಫ್) ಪ್ರಕಟಣೆ ಹೊರಡಿಸಿದ್ದು, ಸೋಮವಾರದಿಂದ(ಜು.18) ಜಾರಿಗೆ ಬರುವಂತೆ 200 ಗ್ರಾಂ ಮೊಸರು (ಸ್ಯಾಚೆ) ಪ್ಯಾಕೆಟ್ ಬೆಲೆಯನ್ನು 10 ರೂ.ನಿಂದ 12ರೂ.ಗೆ, 500 ಗ್ರಾಂ ಮೊಸರು ಪ್ಯಾಕೆಟ್ ಬೆಲೆಯನ್ನು 22 ರೂ.ಗಳಿಂದ 24 ರೂ.ಗೆ 1 ಲೀಟರ್ ಮೊಸರು ಬೆಲೆಯನ್ನು 43 ರೂ.ಗಳಿಂದ 46 ರೂ.ಗೆ ಹೆಚ್ಚಿಸಲಾಗಿದೆ.

ಮಜ್ಜಿಗೆ 200 ಮಿಲಿ ಸ್ಯಾಚೆ ಪ್ಯಾಕೆಟ್ ಬೆಲೆಯನ್ನು 7 ರೂ.ನಿಂದ 8 ರೂ.ಗೆ, ಟೆಟ್ರಾ ಪ್ಯಾಕೆಟ್ ಬೆಲೆಯನ್ನು 10 ರೂ.ಗಳಿಂದ ಹೊಸ ದರ 11 ರೂ.ಗೆ, ಪೆಟ್ ಬಾಟಲ್‍ನ ಬೆಲೆಯನ್ನು 12 ರೂ.ಗಳಿಂದ 13 ರೂ.ಗಳಿಗೆ ಹೆಚ್ಚಿಸಲಾಗಿದೆ.

ಲಸ್ಸಿ 200 ಮಿಲಿ ಸ್ಯಾಚೆ ಪ್ಯಾಕೆಟ್‍ನ ಹಿಂದಿನ ದರ 10 ರೂ.ಗಳಿಂದ 11 ರೂ.ಗೆ, ಟೆಟ್ರಾ ಪ್ಯಾಕೆಟ್ ಸಾದ ಬೆಲೆಯನ್ನು 20 ರೂ.ಗಳಿಂದ 21 ರೂ.ಗೆ, ಟೆಟ್ರಾ ಪ್ಯಾಕೆಟ್ ಮ್ಯಾಂಗೋನ ಬೆಲೆಯನ್ನು 25 ರೂ.ಗಳಿಂದ ಹೊಸ ದರ 27 ರೂ.ಗೆ, ಪೆಟ್ ಬಾಟಲ್ ಸಾದ ಬೆಲೆಯನ್ನು 15 ರೂ.ಗಳಿಂದ 16 ರೂ.ಗೆ, ಪೆಟ್ ಬಾಟಲ್ ಮ್ಯಾಂಗೋಗೆ 20 ರೂ.ಗಳಿಂದ 21 ರೂ.ಗೆ ಹೆಚ್ಚಳ ಮಾಡಲಾಗಿದೆ.

ಮೊಸರು ಮತ್ತು ಮಜ್ಜಿಗೆ ಪೊಟ್ಟಣಗಳ ಮೇಲೆ ಈಗಾಗಲೇ ಹಳೆಯ ದರ ಮುದ್ರಿತವಾಗಿದ್ದು, ಮುದ್ರಿತ ದರಗಳ ಪ್ಯಾಕಿಂಗ್ ಸಾಮಗ್ರಿಗಳ ದಾಸ್ತಾನು ಮುಗಿಯುವವರಗೆ ಇಂಕ್‍ಜೆಟ್ ಮೂಲಕ ಪರಿಷ್ಕೃತ ದರಗಳನ್ನು ಪೊಟ್ಟಣಗಳ ಮೇಲೆ ಮುದ್ರಿಸಿ ಮಾರುಕಟ್ಟೆಗೆ ಸರಬರಾಜು ಮಾಡಲಾಗುತ್ತಿದೆ ಎಂದು ಕೆಎಂಎಫ್ ತಿಳಿಸಿದೆ.