ವಿಶ್ವದ ಅತ್ಯಂತ ಆಳದ ನೌಕಾಘಾತ: ಫಿಲಿಪ್ಪೀನ್ಸ್ ಸಮುದ್ರ ತಳದಲ್ಲಿ ಪತ್ತೆ

ನ್ಯೂಯಾರ್ಕ್, ಜು.19: ಕಳೆದ ತಿಂಗಳು ಫಿಲಿಪ್ಪೀನ್ಸ್ ಸಮುದ್ರದ 21,521 ಅಡಿ ತಳದಲ್ಲಿ ಪತ್ತೆಹಚ್ಚಲಾದ ಅಮೆರಿಕದ ನೌಕಾಪಡೆಯ ಹಡಗು ವಿಶ್ವದ ಅತ್ಯಂತ ಆಳದ ನೌಕಾಘಾತ ಎಂಬ ದಾಖಲೆಗೆ ಪಾತ್ರವಾಗಿದೆ ಎಂದು ಗಿನ್ನೆಸ್ ವಿಶ್ವದಾಖಲೆ ಸಂಸ್ಥೆ ಹೇಳಿದೆ.

 ದ್ವಿತೀಯ ವಿಶ್ವಯುದ್ಧದ ಸಂದರ್ಭ ಯುಎಸ್ಎಸ್ ಸ್ಯಾಮ್ಯುವೆಲ್ ಆರ್ ರಾಬರ್ಟ್ಸ್ ಎಂಬ ಈ ನೌಕೆ ಮುಳುಗಿತ್ತು. ಕಳೆದ ತಿಂಗಳು ಫಿಲಿಪ್ಪೀನ್ಸ್ನ ಸಮಾರ್ ದ್ವೀಪದ ಬಳಿ ಸಮುದ್ರದ ಮೇಲ್ಮೈಗಿಂತ 21,521 ಅಡಿ ಕೆಳಭಾಗದಲ್ಲಿ ಪತ್ತೆಹಚ್ಚಲಾಗಿದೆ. 1944ರ ಅಕ್ಟೋಬರ್ನಲ್ಲಿ ಲೆಯ್ಟೋ ಕೊಲ್ಲಿಯಲ್ಲಿ ಅಮೆರಿಕ ಮತ್ತು ಜಪಾನ್ ನೌಕಾಪಡೆಯ ನಡುವೆ ನಡೆದ ಯುದ್ಧದಲ್ಲಿ ಅಮರಿಕದ ಈ ನೌಕೆ ಮುಳುಗಿತ್ತು. ಆರಂಭದಲ್ಲಿ ಹಿನ್ನಡೆ ಅನುಭವಿಸಿದ್ದ ಅಮೆರಿಕದ ನೌಕಾಪಡೆ ಬಳಿಕ ಫಿಲಿಪ್ಪೀನ್ಸ್ ಅನ್ನು ವಶಪಡಿಸಿಕೊಂಡು ಜಪಾನ್ ನೌಕಾಪಡೆಯನ್ನು ಸೋಲಿಸಿತ್ತು.

ಅಮೆರಿಕದ ನೌಕಾಪಡೆಯಲ್ಲಿದ್ದ ಸ್ಯಾಮುವೆಲ್ ರಾಬರ್ಟ್ಸ್ ಮತ್ತು ಜಾನ್ಸ್ಟನ್ ಹಡಗುಗಳೆರಡೂ ಎರಡನೇ ವಿಶ್ವಯುದ್ಧದಲ್ಲಿ ಸಮುದ್ರದಲ್ಲಿ ಮುಳುಗಿದ್ದವು. ಸಮುದ್ರದ ತಳದಲ್ಲಿ ಈ ನೌಕೆ ದಕ್ಷಿಣ ಅಮೆರಿಕದ ಅತೀ ಎತ್ತರದ ಪರ್ವತ ಅಕೊನ್ಕಗುವದಷ್ಟು ಆಳದಲ್ಲಿದೆ. ಲಂಬ ಅಂತರದಲ್ಲಿ ಹೇಳುವುದಾದರೆ, ವಿಶ್ವದ ಅತೀ ಎತ್ತರದ ಕಟ್ಟಡ ಬುರ್ಜ್ ಖಲೀಫಾದಂತಹ 8 ಕಟ್ಟಡಗಳಷ್ಟು ಅಥವಾ 20 ಐಫಲ್ ಗೋಪುರದಷ್ಟು ಆಳದಲ್ಲಿ ಸಮುದ್ರದ ತಳದಲ್ಲಿತ್ತು ಎಂದು ವರದಿಯಾಗಿದೆ.

ಅಟ್ಲಾಂಟಿಕ್ ಸಾಗರದ ತಳದಲ್ಲಿ ಪತ್ತೆಯಾಗಿದ್ದ ಆರ್ಎಂಎಸ್ ಟೈಟಾನಿಕ್ ಹಡಗು 12,470 ಅಡಿ ಆಳದಲ್ಲಿತ್ತು. ಸ್ಯಾಮ್ಯುವೆಲ್ ಆರ್ ರಾಬರ್ಟ್ಸ್ ನೌಕೆ ಅದಕ್ಕಿಂತ 45% ಅಧಿಕ ಆಳದಲ್ಲಿ ಪತ್ತೆಯಾಗಿದೆ.