ಇಟಲಿ ಪ್ರಧಾನಿ ಮಾರಿಯೊ ರಾಜೀನಾಮೆ

ರೋಮ್, ಜು.21: ಸಮ್ಮಿಶ್ರ ಸರಕಾರದ ಮಿತ್ರಪಕ್ಷಗಳಲ್ಲಿರುವ ಭಿನ್ನಾಭಿಪ್ರಾಯಗಳನ್ನು ಶಮನಗೊಳಿಸುವ ಪ್ರಯತ್ನ ವಿಫಲವಾದ ಬಳಿಕ ಇಟಲಿಯ ಜನಪ್ರಿಯ ಪ್ರಧಾನಿ ಮಾರಿಯೊ ಡ್ರಾಘಿ ಗುರುವಾರ ತಮ್ಮ ಹುದ್ದೆಗೆ ರಾಜೀನಾಮೆ ಘೋಷಿಸಿರುವುದಾಗಿ ವರದಿಯಾಗಿದೆ. ವಿಶ್ವಾಸಮತವನ್ನು ಬೆಂಬಲಿಸಲು ಸರಕಾರದ ಮಿತ್ರಪಕ್ಷಗಳು ನಿರಾಕರಿಸಿದ ಹಿನ್ನೆಲೆಯಲ್ಲಿ ಪ್ರಧಾನಿ ರಾಜೀನಾಮೆ ಘೋಷಿಸಿದ್ದಾರೆ.

 ದೇಶದ ಹಿತದೃಷ್ಟಿಯಿಂದ ತಮ್ಮೊಳಗಿನ ಭಿನ್ನಾಭಿಪ್ರಾಯಗಳನ್ನು ಬದಿಗಿರಿಸುವಂತೆ ಮೈತ್ರಿಕೂಟದ ಮನವೊಲಿಸುವ ಪ್ರಯತ್ನವನ್ನು ಮಾರಿಯೊ ಡ್ರಾಘಿ ಬುಧವಾರ ನಡೆಸಿದ್ದರು. ಆದರೆ ಮೈತ್ರಿಕೂಟದ 3 ಪ್ರಮುಖ ಪಕ್ಷಗಳು ವಿಶ್ವಾಸ ಮತದಿಂದ ದೂರ ಉಳಿಯುವ ನಿಲುವು ಬದಲಿಸದ ಹಿನ್ನೆಲೆಯಲ್ಲಿ ಡ್ರಾಘಿ ರಾಜೀನಾಮೆ ನೀಡುವ ನಿರ್ಧಾರಕ್ಕೆ ಬಂದರು ಎಂದು ವರದಿಯಾಗಿದೆ.

ಈ ಅನಿರೀಕ್ಷಿತ ವಿದ್ಯಮಾನವು ದೇಶದಲ್ಲಿ ಮಧ್ಯಂತರ ಚುನಾವಣೆಯ ಸಾಧ್ಯತೆಯನ್ನು ತೆರೆದಿಟ್ಟಿದೆ. ಮಧ್ಯಂತರ ಚುನಾವಣೆ ನಡೆದರೆ ಬಲಪಂಥೀಯ ಮೈತ್ರಿಕೂಟ ಅಧಿಕಾರಕ್ಕೆ ಬರುವ ಸಾಧ್ಯತೆ ಹೆಚ್ಚಿದೆ ಎಂದು ಮಾಧ್ಯಮಗಳು ವರದಿ ಮಾಡಿವೆ. ತಮ್ಮ ಆಡಳಿತ ಶೈಲಿಯಿಂದ ಅಂತರಾಷ್ಟ್ರೀಯ ಮಟ್ಟದಲ್ಲಿ ಗೌರವಿಸಲ್ಪಡುವ 74 ವರ್ಷದ ಮಾರಿಯೊ ಡ್ರಾಘಿ ರಾಜೀನಾಮೆ ಪತ್ರವನ್ನು ಅಧ್ಯಕ್ಷ ಸೆರ್ಗಿಯೊ ಮ್ಯಟರೆಲಾಗೆ ಹಸ್ತಾಂತರಿಸಿದರು. ಅಧ್ಯಕ್ಷರು ಸಂಸತ್ತನ್ನು ವಿಸರ್ಜಿಸುವ ನಿರೀಕ್ಷೆಯಿದ್ದು ಸೆಪ್ಟಂಬರ್ ಅಥವಾ ಅಕ್ಟೋಬರ್ನಲ್ಲಿ ಚುನಾವಣೆ ನಡೆಯಬಹುದು.

ಅದುವರೆಗೆ ಹಂಗಾಮಿ ಪ್ರಧಾನಿಯಾಗಿ ಡ್ರಾಘಿ ಮುಂದುವರಿಯಬಹುದು ಎಂದು ವರದಿ ಹೇಳಿದೆ.

2021ರಲ್ಲಿ ಕೋವಿಡ್ ಸಾಂಕ್ರಾಮಿಕದ ಜತೆಗೆ ದೇಶಕ್ಕೆ ಎದುರಾದ ತೀವ್ರ ಆರ್ಥಿಕ ಬಿಕ್ಕಟ್ಟಿನ ಸಂದರ್ಭ ಮಾರಿಯೊ ಡ್ರಾಘಿಯನ್ನು ದೇಶದ ಪ್ರಧಾನಿಯನ್ನಾಗಿ ಘೋಷಿಸಲಾಗಿತ್ತು. ಡ್ರಾಘಿ ಯುರೋಪಿಯನ್ ಸೆಂಟ್ರಲ್ ಬ್ಯಾಂಕ್ ನ ಮಾಜಿ ಮುಖ್ಯಸ್ಥರಾಗಿದ್ದಾರೆ.

ಇತ್ತೀಚೆಗೆ ಪ್ರಕಟವಾದ ಸಮೀಕ್ಷೆಯ ಪ್ರಕಾರ, ಮಾರಿಯೊ ಮುಂದಿನ ಮೇ ತಿಂಗಳಿನಲ್ಲಿ ನಡೆಯುವ ಸಾರ್ವತ್ರಿಕ ಚುನಾವಣೆವರೆಗೆ ಪ್ರಧಾನಿಯಾಗಿ ಮುಂದುವರಿಯಬೇಕು ಎಂದು ದೇಶದ ಬಹುತೇಕ ಪ್ರಜೆಗಳು ಬಯಸುತ್ತಾರೆ. ಈ ಬೆಳವಣಿಗೆ ಸ್ಟಾಕ್ ಮಾರ್ಕೆಟ್ ಮೇಲೆ ಪರಿಣಾಮ ಬೀರಿದ್ದು ಇಟಲಿಯ ಸ್ಟಾಕ್ ಎಕ್ಸ್‌ಚೇಂಜ್ ಸೂಚ್ಯಂಕ ಗುರುವಾರದ ವಹಿವಾಟು ಆರಂಭದಲ್ಲಿ 2% ಕುಸಿತ ದಾಖಲಿಸಿದೆ.