ಪ್ರಧಾನಿ ಹುದ್ದೆಯ ರೇಸ್ ನಲ್ಲಿ ಬಲಿಪಶು ಆಗುವುದರಲ್ಲಿ ಸಂದೇಹವಿಲ್ಲ: ರಿಷಿ ಸುನಾಕ್

ಲಂಡನ್, ಜು.24: ಬ್ರಿಟನ್ ಪ್ರಧಾನಿ ಹುದ್ದೆಯ ರೇಸ್‌ನಲ್ಲಿ ಅಂತಿಮ ಹಂತದಲ್ಲಿ ಉಳಿದಿರುವ ಇಬ್ಬರು ಮುಖಂಡರಲ್ಲಿ ಒಬ್ಬರಾಗಿರುವ ಮಾಜಿ ಸಚಿವ ರಿಷಿ ಸುನಾಕ್, ಈ ರೇಸ್‌ನಲ್ಲಿ ತಾನು ಬಲಿಪಶು ಆಗುವುದರಲ್ಲಿ ತನಗೆ ಯಾವುದೇ ಸಂದೇಹವಿಲ್ಲ ಎಂದಿದ್ದಾರೆ.

ಪ್ರಧಾನಿ ಬೋರಿಸ್ ಜಾನ್ಸನ್ ಕಾರ್ಯವೈಖರಿಯನ್ನು ಟೀಕಿಸಿ ಅವರ ಸಂಪುಟದಲ್ಲಿ ವಿತ್ತಸಚಿವರಾಗಿದ್ದ ಸುನಾಕ್ ರಾಜೀನಾಮೆ ಸಲ್ಲಿಸಿದ್ದರು. ಅವರನ್ನು ಅನುಸರಿಸಿ ಸಚಿವರ ಸರಣಿ ರಾಜೀನಾಮೆ ಜಾನ್ಸನ್ ರಾಜೀನಾಮೆಗೆ ಕಾರಣವಾಗಿತ್ತು. ಈ ಕಾರಣದಿಂದ ಪಕ್ಷದೊಳಗಿನ ಜಾನ್ಸನ್ ಬೆಂಬಲಿಗರು ತನ್ನನ್ನು ವಿರೋಧಿಸಬಹುದು ಎಂದು ಪರೋಕ್ಷವಾಗಿ ಸುನಾಕ್ ಹೇಳಿದ್ದಾರೆ.

ಬೋರಿಸ್ ಜಾನ್ಸನ್ ರಾಜೀನಾಮೆಯಿಂದ ತೆರವಾಗಿರುವ ಪ್ರಧಾನಿ ಹುದ್ದೆಗೆ ಕನ್ಸರ್ವೇಟಿವ್ ಪಕ್ಷದ ಅಭ್ಯರ್ಥಿಯನ್ನು ಆಯ್ಕೆ ಮಾಡುವ ಬಹುಹಂತದ ಮತದಾನ ಪ್ರಕ್ರಿಯೆಯ ಇದುವರೆಗಿನ ಎಲ್ಲಾ ಹಂತಗಳಲ್ಲೂ ರಿಷಿ ಸುನಾಕ್ ಮುನ್ನಡೆ ಕಾಯ್ದುಕೊಂಡು ಬಂದಿದ್ದಾರೆ. ಅಂತಿಮ ಹಂತದಲ್ಲಿ ಸುನಾಕ್ ಮತ್ತು ಮಾಜಿ ಸಚಿವೆ ಲಿರ್ ಟ್ರೂಸ್ ಮಧ್ಯೆ ಸ್ಪರ್ಧೆ ನಡೆಯಲಿದ್ದು ಸೆಪ್ಟಂಬರ್ 5ರಂದು ಫಲಿತಾಂಶ ಘೋಷಿಸಲಾಗುವುದು. ಮುಂದಿನ ಹಂತದ ಚುನಾವಣೆಯಲ್ಲಿ ಕನ್ಸರ್ವೇಟಿವ್ ಪಕ್ಷದ ಸುಮಾರು 2 ಲಕ್ಷ ಸದಸ್ಯರು ಮತದಾನ ಮಾಡಲಿದ್ದಾರೆ. ಗುರುವಾರ ನಡೆದ ಮತದಾನ ಪೂರ್ವ ಸಮೀಕ್ಷೆಯಲ್ಲಿ ಲಿರ್ ಅವರು ಸುನಾಕ್ ವಿರುದ್ಧ 24 ಅಂಕಗಳ ಮುನ್ನಡೆ ಸಾಧಿಸಿರುವುದಾಗಿ ವರದಿಯಾಗಿದೆ.

ಬಳಿಕ ಮಧ್ಯ ಇಂಗ್ಲೆಂಡಿನ ಗ್ರಾಂಥಮ್ನಲ್ಲಿ ಪ್ರಚಾರ ಸಭೆಯಲ್ಲಿ ಮಾತನಾಡಿದ ಸುನಾಕ್, ಈ ರೇಸ್‌ನಲ್ಲಿ ತಾನು ಬಲಿಪಶು ಆಗಲಿದ್ದೇನೆ ಎಂಬ ಬಗ್ಗೆ ಸಂದೇಹವಿಲ್ಲ ಎಂದರು. ಕೆಲವು ಶಕ್ತಿಗಳು ತಮ್ಮ ಅಭ್ಯರ್ಥಿಗೆ ಪಟ್ಟಾಭಿಷೇಕವಾಗಬೇಕು ಎಂದು ಬಯಸುತ್ತಾರೆ. ಆದರೆ ಪಕ್ಷದ ಸದಸ್ಯರು ಆಯ್ಕೆ ಮಾಡಲಿದ್ದಾರೆ ಮತ್ತು ಅವರು ಕೇಳಲು ಸಿದ್ಧರಿದ್ದಾರೆ ಎಂದು ಭಾವಿಸುವುದಾಗಿ ಸುನಾಕ್ ಹೇಳಿದ್ದಾರೆ. ತೆರಿಗೆ ಕಡಿತದ ಮೊದಲು ಆರ್ಥಿಕತೆಯ ಎಚ್ಚರಿಕೆ ನಿರ್ವಹಣೆ ಅಗತ್ಯ ಎಂದ ಅವರು, 2030ರ ವೇಳೆಗೆ ರಕ್ಷಣಾ ವೆಚ್ಚವನ್ನು ಜಿಡಿಪಿಯ 3% ಕ್ಕೆ ಹೆಚ್ಚಿಸುವ ಟ್ರೂಸ್ ಅವರ ಘೋಷಣೆಯನ್ನು ಟೀಕಿಸಿದರು.

ಸುನಾಕ್ ಪ್ರಧಾನಿಯಾಗಿ ಆಯ್ಕೆಯಾದರೆ ಈ ಹುದ್ದೆಗೆ ಏರಿದ ಪ್ರಪ್ರಥಮ ಭಾರತೀಯ ಮೂಲದ ವ್ಯಕ್ತಿಯಾಗಿ ದಾಖಲೆ ಬರೆಯಲಿದ್ದಾರೆ. ಲಿರ್ ಟ್ರೂಸ್ ಆಯ್ಕೆಯಾದರೆ ಥ್ಯಾಚರ್ ಮತ್ತು ಥೆರೆಸಾ ಮೇ ಬಳಿಕ ಈ ಹುದ್ದೇಗೇರಿದ 3ನೇ ಮಹಿಳೆಯಾಗಲಿದ್ದಾರೆ.