ಹಣದುಬ್ಬರದ ಮೇಲೆ ಪ್ರಹಾರ: ಮತ್ತೆ 75 ಮೂಲ ಅಂಶಗಳಷ್ಟು ಬಡ್ಡಿದರ ಹೆಚ್ಚಿಸಿದ ಅಮೆರಿಕ ಫೆಡ್ಬ್ಯಾಂಕ್
ವಾಷಿಂಗ್ಟನ್: ಹಣದುಬ್ಬರದ ಮೇಲೆ ಪ್ರಹಾರಕ್ಕೆ ಮುಂದಾಗಿರುವ ಅಮೆರಿಕದ ಫೆಡರಲ್ ರಿಸರ್ವ್ ಬ್ಯಾಂಕ್ ಮತ್ತೊಮ್ಮೆ ಬೆಂಚ್ ಮಾರ್ಕ್ ಬಡ್ಡಿದರವನ್ನು 75 ಮೂಲ ಅಂಶಗಳನ್ನು ಹೆಚ್ಚಿಸಿದೆ. ಅಮೆರಿಕ ಕುಟುಂಬಗಳು ತತ್ತರಿಸುವಂತೆ ಮಾಡಿರುವ ಬೆಲೆ ಒತ್ತಡವನ್ನು ನಿವಾರಿಸುವುದು ಇದರ ಮುಖ್ಯ ಉದ್ದೇಶ ಎಂದು newindianexpress.com ವರದಿ ಮಾಡಿದೆ.
ಮೂಲ ಬಡ್ಡಿದರವನ್ನು 0.75%ದಷ್ಟು ಹೆಚ್ಚಿಸುತ್ತಿರುವುದು ಇದು ಎರಡನೇ ಬಾರಿ. ಇದು ಈ ವರ್ಷದಲ್ಲಿ ಮಾಡುತ್ತಿರುವ ನಾಲ್ಕನೇ ಪರಿಷ್ಕರಣೆಯಾಗಿದೆ. ನಾಲ್ಕು ದಶಕದಲ್ಲೇ ಪ್ರಬಲ ಎನಿಸಿದ ಹಣದುಬ್ಬರವನ್ನು ತಡೆಯುವ ನಿಟ್ಟಿನಲ್ಲಿ ವಿಶ್ವದ ಅತಿದೊಡ್ಡ ಆರ್ಥಿಕತೆ ಈ ನಿರ್ಧಾರ ಕೈಗೊಂಡಿದೆ.
ಅಮೆರಿಕದ ಆರ್ಥಿಕತೆ ನಿಧಾನವಾಗುತ್ತಿರುವ ಲಕ್ಷಣಗಳನ್ನು ಫೆಡ್ ಬ್ಯಾಂಕ್ ಗಮನಿಸಿದ್ದು, ಸಾಲದ ವೆಚ್ಚವನ್ನು ಹೆಚ್ಚಿಸುವ ತನ್ನ ಯೋಜನೆಯನ್ನು ಕೇಂದ್ರೀಯ ಬ್ಯಾಂಕ್ ಮುಂದುವರಿಸಲಿದೆ.
ಬೆಲೆ ಏರಿಕೆ, ಅಧ್ಯಕ್ಷ ಜೋ ಬೈಡನ್ ಅವರ ರಾಜಕೀಯ ವರ್ಚಸ್ಸಿಗೆ ಧಕ್ಕೆ ತಂದಿದ್ದು, ಉಕ್ರೇನ್ ಮೇಲೆ ರಷ್ಯಾ ನಡೆಸಿದ ಅತಿಕ್ರಮಣ ಇದಕ್ಕೆ ಮುಖ್ಯ ಕಾರಣ. ಈ ದಾಳಿಯಿಂದಾಗಿ ಜಾಗತಿಕ ಮಟ್ಟದಲ್ಲಿ ಆಹಾರ ಮತ್ತು ಇಂಧನ ಬೆಲೆ ಹೆಚ್ಚುತ್ತಿದೆ ಎಂದು ಅವರು ಹೇಳಿದ್ದಾರೆ.
ಅಮೆರಿಕದ ಆರ್ಥಿಕ ಹಿನ್ನಡೆಯನ್ನು ತಡೆಯಲಿದೆ ಎಂದು ಬೈಡನ್ ಹೇಳಿದ್ದರೂ, ಹಣದುಬ್ಬರವನ್ನು ತಹಬಂದಿಗೆ ತರುವ ಫೆಡ್ ಬ್ಯಾಂಕ್ನ ಪ್ರಯತ್ನಕ್ಕೆ ಬೆಂಬಲ ಸೂಚಿಸಿದ್ದಾರೆ. ಹಣದುಬ್ಬರ ಹಿನ್ನಡೆಯುತ್ತಿದೆ ಎನ್ನುವ ಪ್ರಬಲ ಸೂಚನೆ ಕಂಡುಬರುವವರೆಗೂ ಹಣದುಬ್ಬರ ಇಳಿಮುಖವಾಗುವ ನಿಟ್ಟಿನಲ್ಲಿ ನಾವು ಬಡ್ಡಿದರವನ್ನು ಹೆಚ್ಚಿಸುವ ದಾರಿಯಲ್ಲಿ ಮುನ್ನಡೆಯಲಿದ್ದೇವೆ ಎಂದು ಫೆಡ್ ಅಧ್ಯಕ್ಷ ಜೆರೋಮ್ ಪಾವೆಲ್ ಸ್ಪಷ್ಟಪಡಿಸಿದ್ದಾರೆ. ಹಣದುಬ್ಬರವನ್ನು ಶೇಕಡ 2ಕ್ಕೆ ಇಳಿಸುವ ಗುರಿ ನಮ್ಮದು ಎಂದು ಹೇಳಿದ್ದಾರೆ.
