ಇಂದಿನ ಕಾಲಘಟ್ಟಕ್ಕೆ ಬುದ್ಧ, ಅಂಬೇಡ್ಕರ್ ವಿಚಾರಧಾರೆಗಳು ಅತ್ಯಗತ್ಯ: ಲೇಖಕ ಎಚ್.ಎಸ್. ವೆಂಕಟೇಶ್ ಮೂರ್ತಿ
ಚಿಕ್ಕಮಗಳೂರು: ಇಂದಿನ ಕಾಲಘಟ್ಟದಲ್ಲಿ ಬುಧ್ಧ ಮತ್ತು ಅಂಬೇಡ್ಕರ್ ಅವರ ವಿಚಾರಧಾರೆಗಳು ಸಮಾಜದ ಸ್ವಾಸ್ಥ್ಯಕ್ಕಾಗಿ ಅತ್ಯಗತ್ಯ. ಈ ಕಾರಣಕ್ಕಾಗಿ ಮೊದಲು ಬುದ್ಧನ ಬಗ್ಗೆ ಬರೆಯುವ ಕನಸು ಕಂಡಿದ್ದೆ. ಈ ಸಂಬಂಧ ಸಾಕಷ್ಟು ಅಧ್ಯಯನ ಮಾಡಿ 2 ವರ್ಷ ಪರಿಶ್ರಮ ವಹಿಸಿ ಬುದ್ಧಚರಣ ಮಹಾಕಾವ್ಯ ರಚಿಸಿದ್ದೇನೆ ಎಂದು ಲೇಖಕ ಎಚ್.ಎಸ್.ವೆಂಕಟೇಶ್ಮೂರ್ತಿ ತಿಳಿಸಿದರು.
ರವಿವಾರ ನಗರದ ಕುವೆಂಪು ಕಲಾಮಂದಿರದಲ್ಲಿ ಸುಗಮ ಸಂಗೀತ ಗಂಗಾ, ಜಿಲ್ಲಾ ಕನ್ನಡ ಸಹಿತ್ಯ ಪರಿಷತ್, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಹಯೋಗದಲ್ಲಿ ಹಮ್ಮಿಕೊಂಡಿದ್ದ ಎಚ್.ಎಸ್.ವೆಂಕಟೇಶ್ಮೂರ್ತಿ ರಚಿತ ಬುದ್ಧಚರಣ ಅವಲೋಕನ ಹಾಗೂ ಬಿ.ಆರ್.ಲಕ್ಷ್ಮಣ್ರಾವ್ 75ನೇ ಅಭಿನಂದನಾ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಮಾತನಾಡಿದ ಅವರು, ಬುದ್ಧನ ಕುರಿತು ಮಹಾಕಾವ್ಯ ರಚಿಸಬೇಕೆಂಬ ಕನಸು ಹೊಂದಿದ್ದೆ. ಈ ಹಿನ್ನೆಲೆಯಲ್ಲಿ ನೇಪಾಳ ಸೇರಿದಂತೆ ಅನೇಕ ಸ್ಥಳಗಳಿಗೆ ಭೇಟಿ ನೀಡಿ ಅಧ್ಯಯನ ಮಾಡಿದೆ. ಎಷ್ಟು ಪ್ರಯತ್ನಪಟ್ಟರೂ ಕಾವ್ಯ ರಚನೆಗೆ ಬೇಕಾದ ಲಯ ಮತ್ತು ನೆಲಗಟ್ಟು ಕೈವಶವಾಗಿರಲಿಲ್ಲ. ನಮ್ಮ ಮನೆಯಲ್ಲೇ ನಡೆದ ಕೆಲವು ಕಹಿಘಟನೆಗಳು ಬುದ್ಧನ ಬಗ್ಗೆ ಮಹಾಕಾವ್ಯ ರಚಿಸುವ ಮನಸ್ಥಿತಿ ಬೆಳೆಸಿತು ಎಂದರು.
ಬುದ್ಧನ ಕಾರುಣ್ಯ ಮನಸ್ಸಿನಲ್ಲಿ ಸಂಚರಿಸಿತು. ಆಗ ಮಹಾಕಾವ್ಯ ಬರೆಯಲು ಶುರು ಮಾಡಿದೆ. ಹತ್ತು ವರ್ಷಗಳಿಂದ ಪೂರ್ವಸಿದ್ಧತೆ ಮಾಡಿಕೊಂಡು 2ವರ್ಷಗಳ ಸತತ ಪ್ರಯತ್ನದಿಂದ ಮಹಾಕಾವ್ಯ ರಚಿಸಿದೆ. ಕೋವಿಡ್ ಸಂದರ್ಭದಲ್ಲಿ ಉಂಟಾದ ಸಾವು ನೋವು, ಮನುಷ್ಯರ ಅಸಹಾಯಕತೆಯಂತಹ ಎಲ್ಲಾ ಅಂಶಗಳು ಕಾವ್ಯ ರಚನೆಗೆ ಕಾರಣವಾಯಿತು ಎಂದು ತಮ್ಮ ಅನುಭವವನ್ನು ಹಂಚಿಕೊಂಡ ಅವರು, ಗೋವಿಂದ ಪೈ ಅವರ ವೈಶಾಕ ಹೊರತುಪಡಿಸಿ ಕನ್ನಡ ಭಾಷೆಯಲ್ಲಿ ಬುದ್ಧನ ಕುರಿತು ಕೃತಿಗಳು ಬಂದಿಲ್ಲ. ಗೋವಿಂದ ಪೈ ಅವರ ವೈಶಾಕ ಮತ್ತು ಮಾಸ್ತಿಯವರ ಕಥೆಗಳು ನನ್ನ ಮೇಲೆ ಪ್ರಭಾವ ಬೀರಿದವು. ಬುದ್ಧಚರಣ ಮಹಾಕಾವ್ಯವನ್ನು ಆಡುಭಾಷೆಯಲ್ಲಿ ಬರದಿದ್ದು, ಸಾಹಿತ್ಯಾಸಕ್ತರಿಂದ ಉತ್ತಮ ಸ್ಪಂದನೆ ದೊರೆಯುತ್ತಿದೆ ಎಂದ ಅವರು, ಇಂದಿನ ಕಾಲಘಟ್ಟದಲ್ಲಿ ಬುದ್ಧ ಮತ್ತು ಅಂಬೇಡ್ಕರ್ ಅವರ ವಿಚಾರಧಾರೆಗಳು ಸಮಾಜಕ್ಕೆ ಅಗತ್ಯವಿದೆ. ಬುದ್ಧನ ಕಾರುಣ್ಯ, ಸ್ನೇಹ ಈ ಲೋಕಕ್ಕೆ ಇಂದು ಬೇಕಾಗಿದೆ. ಬುದ್ಧ ಮತ್ತು ಅಂಬೇಡ್ಕರ್ ಅವರ ಜೀವನದ ಮೌಲ್ಯ ಸರ್ವಕಾಲಿಕ ಎಂದರು.
ಚುಟುಕು ಕವಿ ದುಂಡಿರಾಜ್ ಮಾತನಾಡಿ, ಮಹಾಕಾವ್ಯಗಳ ಅಧ್ಯಯನದ ಬಗ್ಗೆ ಅಷ್ಟು ಆಸಕ್ತಿಯನ್ನು ತೆಳೆದಿರಲಿಲ್ಲ. ಎಚ್.ಎಸ್.ವೆಂಕಟೇಶ್ಮೂರ್ತಿ ಅವರ ಬುದ್ಧಚರಣ ಮಹಾಕಾವ್ಯ ಮಹಾಕಾವ್ಯವನ್ನು ಓದುವ ಗೀಳನ್ನು ಹೆಚ್ಚಿಸಿತು. ವಿ.ಕೃ.ಗೋಕಾಕ್ ಅವರ ಭಾರತ ಸಿಂಧು ರಶ್ಮಿಯುವ ನನಗೆ ಹನಿಗವನಗಳನ್ನು ರಚಿಸಲು ಸ್ಫೂರ್ತಿ ನೀಡಿತು ಎಂದ ಅವರು, ಬುದ್ಧಚರಣ ಒಳ್ಳೆಯ ಕವಿಗೆ ಸಿಗಬೇಕಾದ ಎಲ್ಲಾ ಅಂಶಗಳನ್ನು ಒಳಗೊಂಡಿದೆ ಎಂದು ಬಣ್ಣಿಸಿದರು.
ಲೇಕಖ ಬಿ.ಆರ್.ಲಕ್ಷ್ಮಣ್ರಾವ್ ಮಾತನಾಡಿ, ಎಚ್.ಎಸ್.ವೆಂಕಟೇಶ್ಮೂರ್ತಿ ಅವರ ಮಹಾಕಾವ್ಯ ಬದುಕನ್ನು ಬಿಚ್ಚಿಡುವ ಕೆಲಸ ಮಾಡಿದೆ. ಪ್ರತೀ ಬಾರಿಯೂ ಕಾವ್ಯವನ್ನು ಓದಿದಾಗಲು ವಿಶೇಷ ಅರ್ಥವನ್ನು ನೀಡುತ್ತದೆ ಎಂದರು.
ಹಿರಿಯ ಪತ್ರಕರ್ತ ಸ.ಗಿರಿಜಾಶಂಕರ್ ಬಿ.ಆರ್.ಲಕ್ಷ್ಮಣ್ರಾವ್ ಕೃತಿಯನ್ನು ವಿಮರ್ಶಿಸಿದರು. ಉಪನ್ಯಾಸಕ ಸತ್ಯನಾರಾಯಣ್ ಎಚ್.ಎಸ್.ವೆಂಕಟೇಶ್ಮೂರ್ತಿ ಮಹಾಕಾವ್ಯದ ಕುರಿತು ಮಾತನಾಡಿದರು.
ಕಾರ್ಯಕ್ರಮದಲ್ಲಿ ನಗರಸಭೆ ಅಧ್ಯಕ್ಷ ವೇಣುಗೋಪಾಲ್, ಆಶಾಕಿರಣ ಅಂಧಮಕ್ಕಳ ಶಾಲೆ ಡಾ.ಜೆ.ಪಿ.ಕೃಷ್ಣೇಗೌಡ, ಕನ್ನಡ ಸಾಹಿತ್ಯ ಪರಿಷತ್ ಜಿಲ್ಲಾಧ್ಯಕ್ಷ ಸೂರಿ ಶ್ರೀನಿವಾಸ್, ಎಂ.ಆರ್.ದತ್ತಾತ್ರಿ, ಉಪನ್ಯಾಸಕ ನಾಗರಾಜ್ ರಾವ್ ಕಲ್ಕಟ್ಟೆ, ವಕೀಲ ವೆಂಕಟೇಶ್ ಮತ್ತಿತರರು ಉಪಸ್ಥಿತರಿದ್ದರು. ಕಾರ್ಯಕ್ರಮದ ವೇಳೆ ಗಮಕವಾಚನ ಮತ್ತು ಸುಗಮ ಸಂಗೀತ ಗಂಗಾ ಕಲಾವಿದರಿಂದ ಗೀತೆಗಳ ಗಾಯನ ಕಾರ್ಯಕ್ರಮ ನಡೆಯಿತು.
