ಐಟಿ ಟೆಕ್ಕಿಯ ಮೃತದೇಹ ಹೋಟೆಲ್ನಲ್ಲಿ ಪತ್ತೆ: ಅತ್ಯಾಚಾರ ಆರೋಪ
ನೋಯ್ಡಾ: ಇಲ್ಲಿನ ಸೆಕ್ಟರ್ 70ರ ಹೋಟೆಲ್ ಕೊಠಡಿಯಲ್ಲಿ 26 ವರ್ಷ ವಯಸ್ಸಿನ ಐಟಿ ಮಹಿಳಾ ಟೆಕ್ಕಿಯ ಮೃತದೇಹ ಪತ್ತೆಯಾಗಿದೆ. ಇದು ಮೇಲ್ನೋಟಕ್ಕೆ ಆತ್ಮಹತ್ಯೆ ಎಂದು ಕಂಡುಬಂದಿದೆ. ಆದರೆ ಪುತ್ರಿಯ ಮೇಲೆ ಅತ್ಯಾಚಾರ ಎಸಗಿ ಕೊಲೆ ಮಾಡಲಾಗಿದೆ ಎಂದು ತಂದೆ ನೀಡಿರುವ ದೂರಿನ ಬಗ್ಗೆ ತನಿಖೆ ನಡೆಸಲಾಗುತ್ತಿದೆ ಎಂದು ಪೊಲೀಸರು ಹೇಳಿದ್ದಾರೆ.
ಹೋಟೆಲ್ ಕೊಠಡಿಯ ಸೀಲಿಂಗ್ ಫ್ಯಾನ್ನಲ್ಲಿ ಮಹಿಳೆಯ ಶವ ನೇತಾಡುತ್ತಿತ್ತು.
ಸಾವಿಗೆ ಮುನ್ನ ಮಗಳು ದಾಖಲಿಸಿದ ವೀಡಿಯೊದಲ್ಲಿ ಆಕಾಶ್ ಎಂಬ ವ್ಯಕ್ತಿಯಿಂದ ತನ್ನನ್ನು ರಕ್ಷಿಸುವಂತೆ ಅರ್ಜುನ್ ಎಂಬಾತನಿಗೆ ಕಣ್ಣೀರಿಟ್ಟು ಮೊರೆ ಇಟ್ಟಿದ್ದಾಳೆ ಎಂದು ಮಹಿಳೆಯ ತಂದೆ ಆಪಾದಿಸಿದ್ದಾರೆ. ಆದರೆ ಈ ವೀಡಿಯೊವನ್ನು ಯಾವಾಗ ಹಾಗೂ ಎಲ್ಲಿ ಚಿತ್ರೀಕರಿಸಲಾಗಿದೆ ಎನ್ನುವುದು ಸ್ಪಷ್ಟವಾಗಿಲ್ಲ. ಸೋಮವಾರ ರಾತ್ರಿ ಮಹಿಳೆ ಒಬ್ಬರೇ ಕೊಠಡಿ ಪಡೆದಿದ್ದರು ಎಂದು ಹೆಚ್ಚುವರಿ ಡಿಸಿಪಿ ಅಂಕಿತಾ ಶರ್ಮ ಹೇಳಿದ್ದಾರೆ.
ಮರುದಿನ ಮಧ್ಯಾಹ್ನ 12 ಗಂಟೆಗೆ ಚೆಕೌಟ್ ಸಮಯದಲ್ಲಿ ಹೋಟೆಲ್ ಸಿಬ್ಬಂದಿ ಆಕೆಯನ್ನು ಸಂಪರ್ಕಿಸಲು ಪ್ರಯತ್ನಿಸಿದಾಗ ಯಾವುದೇ ಪ್ರತಿಕ್ರಿಯೆ ಇರಲಿಲ್ಲ. ಕೆಲ ಕಾಲ ಕಾದು ಬಳಿಕ ಬಾಗಿಲು ಒಡೆದು ನೋಡಿದಾಗ ಶವ ಫ್ಯಾನ್ನಲ್ಲಿ ನೇತಾಡುತ್ತಿತ್ತು ಎಂದು ವಿವರಿಸಿದ್ದಾರೆ. ಮಹಿಳೆ ಗಾಝಿಯಾಗಾದ್ನಲ್ಲಿ ಪೋಷಕರ ಜತೆ ವಾಸವಿದ್ದರು. ನೋಯ್ಡಾದ ಬಹುರಾಷ್ಟ್ರೀಯ ಕಂಪನಿಯಲ್ಲಿ ಉದ್ಯೋಗದಲ್ಲಿದ್ದರು.
ದೆಹಲಿಯ ಕನೌತ್ ಪ್ಲೇಸ್ನ ಕೆಫೆಯೊಂದರಲ್ಲಿ ಈಕೆಯನ್ನು ಭೇಟಿ ಮಾಡಿದ್ದ ಪೊಲೀಸ್ ಪೇದೆಯೊಬ್ಬರು ಹಾಗೂ ಇತರ ಮೂವರ ಕೈವಾಡದ ಶಂಕೆ ಇದೆ ಎಂದು ತಂದೆ ಆಪಾದಿಸಿದ್ದಾರೆ.
"ಮಗಳ ಮೇಲೆ ಅತ್ಯಾಚಾರ ನಡೆಸಿ, ಆತ್ಮಹತ್ಯೆಯಂತೆ ಬಿಂಬಿಸಲು ಸೀಲಿಂಗ್ ಫ್ಯಾನ್ಗೆ ಶವವನ್ನು ನೇತು ಹಾಕಲಾಗಿದೆ. ಉತ್ತರ ಪ್ರದೇಶದ ಪೊಲೀಸ್ ಒಬ್ಬರ ಕೈವಾಡ ಈ ಕೃತ್ಯದ ಹಿಂದೆ ಇದೆ ಎಂಬ ಶಂಕೆ ನಮ್ಮದು. ಇತರ ಮೂವರು ಇದರಲ್ಲಿ ಷಾಮೀಲಾಗಿದ್ದಾರೆ ಎಂಬ ಗುಮಾನಿ ಇದೆ" ಎಂದು ತಂದೆ ಹೇಳಿದ್ದಾರೆ.
